Свет
Во Европа првпат пронајден инвазивен вид пчели, последиците може да бидат сериозни

Колонија на инвазивната црвена џуџеста медена пчела е пронајдена првпат во Европа. Ова откритие на видот Apis florea на Малта ги зголеми стравувањата од можни сериозни последици.
Овие инвазивни пчели потекнуваат од Азија, а нивното појавување во Европа предизвика тревога кај локалните пчелари и чувари на природата, кои стравуваат од катастрофални последици за родната популација на пчели, пишува „Гардијан“.
„Загрижувачки е што на Малта е пронајден Apis florea. Тие веројатно ќе се натпреваруваат за полен и нектар со нашите родни опрашувачи, група инсекти што веќе се во опаѓање. Исто така, многу е веројатно дека овие пчели ќе пренесат повеќе болести на кои европските пчели може да имаат мал отпор“, предупреди Дејв Гулсон, професор по биологија на Универзитетот во Сасекс.
Претходните извештаи покажуваат дека инвазивните црвени џуџести медоносни пчели полека се шират од Азија до Блискиот Исток и североисточна Африка, но до сега не беа регистрирани во Европа.
Откога колонијата беше откриена и идентификувана и беше потврдено дека се работи за видот Apis florea, веднаш беше отстранета и уништена. Сепак, истражувачите се сомневаат дека група пчели веќе ја напуштиле кошницата за да почнат нова колонија.
Близината на колонијата до слободното пристаниште Бирзебуг, главниот карго-центар на Малта, сугерира дека пчелите можеби пристигнале со трговски брод.
Истражувачите веруваат дека благите зими на Малта и другите јужноевропски земји го поддржуваат опстанокот на овој инвазивен вид.
Џулијана Рангел, професорка по пчеларство на Универзитетот А&М во Тексас, истакнува дека за само неколку години овој вид би можел да се прошири на други места.
„Единственото нешто што можеме да го направиме е да бидеме внимателни, да известуваме секојпат кога ќе се забележат нови или поинакви примероци, да ги отстрануваме кога тие се позитивно идентификувани, да ја пребаруваме околината и да продолжиме со мониторингот, особено во влезните пристаништа, каде што роевите може да патуваат со бродови“, додава Рангел.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Бебе старо само 7 дена е пронајдено покрај контејнер во Белград

Во раните утрински часови во Земун, на улицата Дунавска, покрај контејнер, пронајдено е новороденче. Како што дознава српски „Телеграф“, станува збор за бебе старо само седум дена.
Детето било завиткано во пешкир, а по пристигнувањето на брзата помош, покажувало знаци на живот. Веднаш било пренесено во Клиничката болница Земун, каде што му била укажана медицинска помош.
Повеќе информации засега не се познати.
фото: принтскрин
Европа
23 лица загинаа во рускиот воздушен напад врз Киев вчера, вклучувајќи и двегодишно дете

Во рускиот воздушен напад врз Киев вчера загинаа најмалку 23 лица, вклучувајќи и двегодишно дете, потврдија украинските власти.
Во нападот, кој беше дел од вториот најголем воздушен напад врз Украина од почетокот на војната, беа вклучени 598 беспилотни летала и 31 ракета.
Зградата на Делегацијата на ЕУ и просториите на Британскиот совет беа погодени во Киев. Украинските служби за итни случаи соопштија дека спасувачите работеле цела ноќ за расчистување на урнатините, отстранувајќи повеќе од 2.260 тони урнатини и обезбедувајќи психолошка поддршка на 147 лица.
Белата куќа соопшти дека американскиот претседател Доналд Трамп „не е задоволен од веста, но не е ниту изненаден“, со оглед на долготрајната војна.
Руските напади погодија повеќе локации низ главниот град, вклучувајќи го центарот на Киев и неговите предградија.
фото: принтскрин
Европа
Турскиот шеф на дипломатијата: Русија го промени својот услов за завршување на војната

Турскиот министер за надворешни работи, Хакан Фидан, изјави дека Турција не била присутна на неодамнешните состаноци за војната во Украина бидејќи не е страна во војната. Тој нагласи дека Турција има улога на неутрален посредник.
„Ние не сме страна во војната. Не требаше да бидеме на масата ниту во Алјаска ниту во Вашингтон. Бидејќи Трамп ги обединува завојуваните страни“, рече Фидан за време на интервјуто за TGRT Haber, одговарајќи на прашањата за отсуството на Анкара од неодамнешните состаноци меѓу американскиот претседател Доналд Трамп и украинскиот претседател Володимир Зеленски и европските лидери.
Фидан изрази надеж за перспективите за мир. „Се надеваме на мир меѓу Русија и Украина. Имаме доволно причини за таа надеж“, рече тој, истакнувајќи дека одредени позиции развиени за време на третата рунда разговори во Истанбул подоцна се материјализирале и во разговорите во Алјаска.
Тој нагласи дека Русите го измениле својот став. „Претходно, Русите бараа целосно преземање на териториите на четири региони. Сега се откажаа од овие барања и, освен за еден регион, постојните фронтовски линии ќе останат“, објасни тој.
Тој изјави дека Русија бара предавање на 25-30 проценти од регионот Донецк кој сè уште не е под нејзина контрола. Фидан верува дека губењето на регионот Донецк би ја комплицирало одбраната на Украина доколку борбите продолжат по некое време.
За потсетување, третата рунда преговори меѓу делегациите на Украина и Русија се одржа во Истанбул на 23 јули. Двете страни се согласија за нови размени, не само на заробени војници, туку и на цивили. Украинската делегација ја предводеше Рустем Умеров, а руската делегација Владимир Медински.
фото: принтскрин