Свет
Во САД откриени делови од мотори за авиони без сертификат, истрага е спроведена и во Европа

Американската федерална управа за авијација (FAA) вчера предупреди дека некои модели на млазни мотори CF6 на Генерал електрик“ може да содржат делови со лажни сертификати барајќи од сопствениците да ги проверат резервите на авионите и делови.
AOG Technics со седиште во Велика Британија продаваше изолатори за моторите CF6 на GE без лиценца, предупреди FAA.
Производителот на млазни мотори CFM International во средата изјави дека AOG Technics можеби продала илјадници делови од моторот со фалсификувана документација. Се сомневаат дека делови за моторите CFM56, произведени од компанијата GE-Safran CFM, и за многу мал број мотори CF6, кои главно се користат за напојување товарни авиони и се произведени од „Генерал електрик“, можеби се продадени без сертификација.
До понеделник беше утврдено дека околу 96 мотори може да содржат делови со фалсификувана документација.
Метју Рив, адвокат на CFM, и неговите косопственици „Генерал електрик“ и „Сафран“, во поднесоците во Високиот суд во Лондон рече дека досега идентификувале два фалсификувани формулара на FAA за стотици делови од моторот CF6.
Овој мотор се користи главно од товарни авиони вклучувајќи го и огромното мнозинство товарни авиони „боинг 767“ и воените авиони за полнење гориво „KC-767“ во флотите на Италија и Јапонија.
Доколку се најдат делови со лажен сертификат во моторите CF6, сопствениците и операторите на авионите мора да ги отстранат и зачуваат, истакна американскиот регулатор.
Европските регулатори соопштија дека ги истражуваат наводите од извештајот дека некои делови испорачани од AOG Technics без валидни сертификати биле пронајдени во моторите CFM56 вградени во некои авиони „ербас“ и „боинг“.
По објавувањето, авиокомпаниите сменија делови на десетици авиони. Досегашните промени вклучија само дел од вкупно 23 илјади мотори CFM56.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Трамп: „Разговарав со Биби, ние сме на иста страна по секое прашање“

Американскиот претседател Доналд Трамп телефонски разговараше со израелскиот премиер Бенјамин Нетанјаху и оцени дека САД и Израел се „на иста страна“.
„Тукушто разговарав со премиерот на Израел, Биби Нетанјаху, во врска со голем број теми, вклучувајќи ја трговијата, Иран итн. Разговорот помина многу добро. На иста страна сме по секое прашање“, напиша Трамп на својата социјална мрежа „Truth Social“.
Претходно, израелските медиуми објавија дека Трамп ќе разговара со израелскиот премиер за договорот за заложниците во Газа, како и за нуклеарните преговори со Иран, според два извори запознаени со ова прашање.
Разговорите меѓу лидерите доаѓаат неколку дена по втората рунда разговори за нуклеарниот договор меѓу САД и Иран во Рим и откако преговорите за договор со милитантната група Хамас за заложниците дојдоа во ќорсокак.
Свет
Кинескиот претседател: Царините ѝ штетат на мултилатералната трговија

Кинескиот лидер Шји Џјинпинг денес изјави дека царините и „штетат“ на мултилатералната трговија, според кинеските државни медиуми.
Тој го изјави ова на средба со азербејџанскиот претседател Илхам Алиев, кој е во официјална посета на Пекинг.
„Царините му штетат на мултилатералниот трговски систем и го дестабилизираат светскиот економски поредок“, рече Шји.
Американскиот претседател Доналд Трамп воведе царини од 145 проценти за повеќето производи што пристигнуваат од Кина, а Кина возврати со воведување на свои царини од 125 проценти за американските производи.
Алиев е во Пекинг со цел да постави нов курс за билатералните односи, според кинеските државни медиуми.
Односите со Азербејџан, кој се наоѓа на раскрсницата меѓу Азија и Европа, се важни за Пекинг, особено како дел од иницијативата „Еден појас, еден пат“, која има за цел да го зајакне влијанието на Кина во светот.
Џјинпинг денес изјави дека двете земји одржуваат блиски врски „и покрај меѓународната ситуација која постојано се менува“.
Свет
Откажани мировните преговори за Украина

Мировните преговори за Украина, кои беа закажани за денеска во Лондон, а требаше да ги води британскиот министер за надворешни работи Дејвид Лами, се одложени, соопшти британското Министерство за надворешни работи.
Во соопштението се наведува дека состанокот за мировните преговори за Украина со министрите за надворешни работи закажан за денеска (среда) е одложен.
Во исто време, се додава дека разговорите на официјално ниво ќе продолжат зад затворени врати, без присуство на медиумите, пренесува The Guardian.
Дипломати од Велика Британија, Франција, Германија, Украина и САД денеска требаше да одржат нова рунда разговори во Лондон со цел постигнување прекин на огнот во тригодишната војна меѓу Украина и Русија. Меѓутоа, откако украинскиот претседател Володимир Зеленски го отфрли предлогот на САД за признавање на анектираниот Крим како дел од Русија, министерот за надворешни работи на САД го откажа своето патување во Лондон.
По него учеството на денешната рунда дијалог го откажаа и други врвни дипломати кои во Лондон испратија пониски функционери.
Претходната рунда мировни преговори за Украина се одржа во Париз, а на неа присуствуваа претставници на САД, Франција, Велика Британија, Германија и Украина.