Сите 100.000 примероци од новиот број на француското издание на магазинот „Плејбој“ со министерката Марлен Скијапа на насловната беа продадени за три часа, изјави директорот Кристоф Флорентин.

Тој додаде дека се испечатени дополнителни 60.000 примероци.

Вообичаено, во Франција се продаваат околу 30.000 примероци од секое издание на „Плејбој“.

Политичарката позира во облека и на ниедна фотографија не беше гола, но списанието сепак беше распродадено, очигледно поради нејзиното интервју.

Скијапа беше многу критикувана во Франција затоа што се согласила да се фотографира за „Плејбој“. Веста дека нејзината фотографија ќе ја краси насловната страница доаѓа во време кога француската влада се соочува со гневни демонстранти против пензиските реформи.

French minister’s Playboy issue sells out. Marlene Schiappa’s non-nude appearance in the magazine had spurred criticism from the country’s political ecosystem. pic.twitter.com/1dhX6arJly

— [email protected] (@frederickcheng5) April 17, 2023

Министерката за социјална економија, Скијапа, позира во бел фустан на фотографиите на „Плејбој“ и зборува за феминизмот и правата на жените. Таа во интервјуто го брани правото на жените „да бидат токму онакви какви што сакаат да бидат“.

„Доколку сакаат да се облекуваат како калуѓерки и никогаш да не ги запознаат мажите што ги сакаат, треба да бидат поддржани во тоа. Но, и ако сакаат да позираат без облека во списание“, рече таа и откри дека се гордее затоа што напишала еротска литература.

Во интервјуто таа одговара на прашања од типот: „Дали политиката е љубезна?“, „Дали чувството на моќ е задоволство? и „Дали се сметаш себеси за искушувач“.

Министерката задолжена за родова еднаквост, Изабел Ром, ја критикува одлуката на својата колешка да даде интервју за „Плејбој“.