Свет
Во Франција температурите над 40 степени, највисоко ниво на тревога: има и жртви

Две лица починаа во Франција од болести поврзани со топлината, а повеќе од 300 добија итна медицинска помош, изјави француската министерка за животна средина, Ањес Пание-Рунашер, додека поголемиот дел од Европа се бори со топлотен бран.
Голем дел од Франција беше погоден од екстремна топлина, при што 16 департмани, вклучувајќи го и Париз, беа во тревога за највисоко ниво на топлина претходно. Температурите достигнаа повеќе од 41 Целзиусов степен во јужна и во централна Франција, а во главниот град беа регистрирани 38 степени.
Медиумите објавија дека температурите во некои делови од Франција во јули ги достигнале своите највисоки нивоа откога се водат евиденции.
Највисокото ниво на тревога, црвено, остана во сила само за четири области, иако се очекува температурите да достигнат до 39 Целзиусови степени. Некои училишта ќе останат затворени, а олеснување се очекува в четврток.
Во соседна Германија метеоролошката служба го предвиде најжешкиот ден во годината досега, со температури што достигнуваат 40 Целзиусови степени.
Голем пожар за време на топлотен бран одзеде животи на две лица на шпанско обработливо земјиште.
Телата на еден земјоделец и на еден од неговите вработени беа пронајдени додека се гаснеше пожар во областа Торефете во близина на каталонскиот град Коско, соопшти регионалната влада доцна во вторникот. Тие беа заробени во возило опкружено со пламен.
Пожарот, 90-ина километри северозападно од Барселона, уништи најмалку 5.000 хектари земја, според извештаите на медиумите.
Стотина пожарникари се распоредени, а речиси 20.000 жители во регионот привремено добија совет да не ги напуштаат своите домови. Некои се евакуирани како мерка на претпазливост.
Швајцарските нуклеарни централи во тревога
Во меѓувреме, во Швајцарија, еден од реакторите во нуклеарната централа Безнау, во близина на германската граница, е затворен поради топла вода од реката, објави операторот на централата „Axpo“ во средата. Другиот реактор работи со половина капацитет.
Мерките имаат цел заштита на екосистемот на реката Аре во согласност со строгите еколошки прописи.
„Прекумерното загревање на веќе топлиот воден тек треба да се спречи во текот на жешките летни периоди за да не се оптоварува дополнително флората и фауната“, се вели во соопштението на Акспо.
Реката обезбедува вода за ладење за нуклеарната централа, која потоа се враќа во реката на малку повисока температура.
Двата реактора во Безнау почнаа да работат во 1969 и 1971 година, што ги прави меѓу најстарите нуклеарни централи што сè уште работат во светот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Џими Кимел се враќа на екранот

Американскиот водител Џими Кимел утре се враќа на екранот со својот популарен ноќен шоу-програм, откако продукцијата беше привремено стопирана поради неговите контроверзни коментари за убиството на Чарли Кирк, соопшти Дизни.
„Емисјата ја суспендиравме за да избегнеме дополнителни тензии во чувствителен момент за земјата“, порачаа од компанијата, додавајќи дека по разговори со Кимел, одлучиле да продолжат со снимањето.
Кимел, познат по својата критика кон Доналд Трамп, на 14 септември коментираше дека осомничениот напаѓач, Тајлер Робинсон, бил поддржувач на поранешниот претседател. Тој ја исмеа и реакцијата на Трамп по убиството на Кирк, прикажувајќи изјава во која претседателот зборува за реновирање на Белата куќа.
„Ова не е начин на кој возрасен човек тагува по убиство на пријател. Вака четиригодишно дете тагува за златна рипка“, саркастично додаде Кимел.
Емисјата на Кимел се емитува на „Еј-би-си“, телевизија во сопственост на Дизни.
Свет
Франција ја призна Палестина

Францускиот претседател Емануел Макрон вечерва на Генералното собрание на ОН потврди дека Франција ја признава Палестина како независна држава.
Со ова, Франција се приклучува на земји како Обединетото Кралство, Канада и Австралија, кои го направија истиот чекор во последните недели.
„Светот е на чекор до губење на шансата за мир. Време е да се стави крај на војната во Газа“, порача Макрон, додавајќи дека решението со две држави е единствен пат.
Израел остро реагираше, оценувајќи дека признавањето е награда за тероризмот и повтори дека палестинска држава нема да се случи.
Палестинските власти го поздравија чекорот и го оценија како неповратен пат кон дводржавно решение.
Со Франција, вкупно 153 земји-членки на ОН – речиси 80 отсто ја имаат признато Палестина.
Во меѓувреме, Израелската офанзива продолжува. Според здравствени власти во Газа, во последните 24 часа загинале 61 лице, со што вкупната бројка од 7 октомври 2023 достигнува 65.344 загинати.
Свет
Голем напад со беспилотни летала врз Москва, небото е затворено

Москва вечерва беше нападната со беспилотни летала.
Градоначалникот на Москва, Сергеј Собјанин, објави дека противвоздушните сили собориле вкупно девет дронови , а подоцна уште два. Жителите на Московскиот регион слушнале експлозии на пристапот кон градот, а според првите информации што ги објавија руските медиуми, нема повредени или голема материјална штета.
Многу откажани и одложени летови
Повеќе од 35 летови беа откажани и одложени на московските аеродроми Шереметјево, Домодедово и Внуково во вечерните часови поради украински напади со беспилотни летала. Работата на аеродромот Шереметјево беше привремено суспендирана.
„До 20:19 часот по московско време, 21 лет беше одложен, а уште еден откажан во Шереметјево. Девет одложувања и две откажувања беа регистрирани во Домодедово, а четири летови беа одложени во Внуково“, објавуваат руските медиуми.
Руските медиуми наведуваат дека по нападот, тајната служба на ФСБ и Истражниот комитет ќе спроведат истрага и дека се очекува кривична постапка за тероризам. Оперативните служби на терен ги проверуваат остатоците од беспилотните летала и проверуваат дали предизвикале дополнителна штета.