Свет
Во Црна Гора уапсен руски милијардер, поранешен соработник на Путин

Во Тиват е уапсен рускиот државјанин Игор Чујан по кого беше распишана потерница од московскиот Интерпол, пренесува „Вјести“.
„И.Ц. (55), државјанин на Руската Федерација, кој се бара од НЦБ Интерпол Москва заради спроведување кривични постапки во Руската Федерација за кривично дело давање/примање поткуп во непрофитна организација, е лишен од слобода“, соопшти црногорското Министерство за внатрешни работи.
Чујан е осомничен дека од 2012 до 2018 година како акционер и сопственик на банка остварил незаконска добивка во износ од 340 милиони рубли со извршување на споменатите кривични дела. Нему му беше одреден екстрадициски притвор од истражен судија на Високиот суд во Подгорица.
Во јануари 2009 година Владимир Путин го назначи Чујан за шеф на Федералната служба за регулирање на пазарот на алкохол, а против него поведе истрага девет години подоцна.
Претходно, локалните медиуми објавија дека барањето на адвокатот Николај Егоров поднесено до Путин во 2018 година стана основа за истрага против Чујан. Истрагата беше поведена на 27 април 2018 година, а обвинението против Чујан беше поднесено на 2 август по што по него беше распишана федерална и меѓународна потерница.
Според доказите, во периодот од 2013 до 2016 година, без согласност на Управниот одбор на ОФК банка, издадени се 115 необезбедени заеми, во вкупна вредност од речиси 14,2 милијарди руби, на компании контролирани од еден од најголемите дистрибутери на алкохолни пијалаци во тоа време – „Статус група“ ДОО. Истрагата утврди дека тие компании се фиктивни.
За време на истрагата службениците на Истражниот комитет на Русија дојдоа до заклучок дека Чујан ги користел и ОФК банка и компанијата „Статус група“, како и дека смислил шема за измама.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израел до Иран: Ако ги нападнете нашите градови, ќе возвратиме на рафинериите и лидерите на режимот

Израел му порача на Иран дека, во случај на напад на балистичка ракета врз израелски населби и цивилни цели, ќе одговори со гаѓање на иранските рафинерии и лидерите на режимот.
Како што изјави за „Канал 12“ висок израелски безбедносен функционер, Израел јасно му ставил до знаење на Техеран дека нема да толерира напади врз цивили и дека во тој случај цели ќе бидат стратешката инфраструктура и политичкото раководство на Иран.
Свет
Ројтерс: Луѓето на Трамп го предупредија Катар и неговите сојузници неколку часа пред израелскиот напад

Американскиот Стејт департмент однапред информирал неколку регионални сојузници на Блискиот Исток за планираниот израелски напад врз Иран, неколку часа пред почетокот на операцијата, тврдат тројца извори запознаени со ситуацијата, пренесува Ројтерс.
Во дипломатската нота испратена во четвртокот попладне, Стејт департментот потврдил дека израелскиот напад ќе се случи доцна во ноќта. Катар бил меѓу земјите кои го добиле предупредувањето.
Во пораката се наведува дека Вашингтон не учествувал во израелската операција ниту дал каква било поддршка. Се истакнува и дека претседателот Доналд Трамп јасно ја изразил својата желба за мир во регионот, но и цврстиот став дека на Техеран не смее да му се дозволи да развива нуклеарно оружје.
За потсетување, Израел започна бран воздушни напади низ Иран ноќта меѓу четвртокот кон петокот, тврдејќи дека погодил нуклеарни локации, ракетни фабрики и високи воени команданти, што може да биде долготрајна операција чија цел е да се спречи Иран да развие атомска бомба.
Стејт департментот не одговори веднаш на барањето за коментар.
Свет
Најмалку 86 загинати и 341 ранети во израелските воздушни напади

Најмалку 86 лица загинаа, а 341 беа ранети во израелските воздушни напади во петокот, објави иранската новинска агенција Фарс, цитирана од „Анадолија“.
Во главниот град Техеран загинаа 78 лица, а 329 беа ранети. Најмалку уште осум лица ги загубија животите, а 12 се ранети во нападите на Табриз, град во северозападниот дел на Иран.
Израел започна сеопфатна воена операција против Иран, во која учествуваа 200 борбени авиони. Целите беа иранската нуклеарна програма и можностите за лансирање ракети со долг дострел.
Во нападите загинаа високи воени функционери и научници кои работеа на нуклеарната програма.
Премиерот Бенјамин Нетанјаху рече дека целната воена операција ќе продолжи се додека е потребно.
Иран вети строга казна и побара итен состанок на Советот за безбедност на Обединетите нации.
Американскиот претседател Доналд Трамп на социјалната мрежа „Вистина“ објави дека му дал на Иран „можност за договор“ и го повика да ја искористи сега, „пред да биде предоцна“.
Оваа ескалација фрла сомнеж за иднината на нуклеарните преговори меѓу Техеран и Вашингтон, кои се водат со посредство на Оман. Шестата рунда индиректни преговори, закажана за в недела, сега најверојатно ќе биде откажана, велат извори запознаени со ситуацијата.