Свет
Вработена во лондонската железница починала од Ковид-19 бидејќи заразен човек ја плукнал в лице
Една 47-годишна вработена во лондонската железница починала неколку недели откако човек, кој тврдел дека е заразен со коронавирус, ја плукнал и кашлал кон неа додека работела на железничката станица во Лондон, пренесува „Брејтбарт“.
На 22 март, Бели Муџинга, вработена во билетарницата, била нападната заедно со својата колешка од страна на еден маж додека биле на должност во станицата „Викторија“ во Лондон. Двете жени добиле симптоми на коронавирус неколку дена по нападот.
Опишувајќи го грозоморниот напад, нејзиниот сопруг Лусамба Годе Каталај изјави за ИТВ:
„Човекот ја праша што прави, зошто е таму, а таа му рекла дека работи. Човекот им кажал дека е заразен со вирусот и ги плукнал. Тие го пријавиле кај својот претпоставен. Бели се врати дома и ми раскажа сè“.
Муџинга била хоспитализирана на 2 април и ставена на респиратор, но починала три дена подоцна. Нејзиниот сопруг изјавил дека таа имала хронични проблеми со респираторниот систем пред да се зарази со вирусот и операција четири години претходно. Каталеј последен пат ја видел сопругата дента кога била хоспитализирана.
Британската полиција соопшти дека отвориле кривична истрага за инцидентот.
Синдкатот, пак, иницира прашање зошто Муџинга воопшто работел на железничката станица со нејзините здравствени проблеми и посочи дека размислуваат да преземат правни дејства и за ова прашање.
„Како ранлива личност во ризична категорија и со нејзината здравствена состојба, која му била позната на нејзиниот работодавец, постојат прашања зошто таа не била повлечена од првите редови во оваа пандемија. Наместо да зборуваме за олеснување на изолацијата, владата најпрвин мора да преземе соодветни мерки на претпазливост и заштита за да не бидат загубени повеќе животи“, вели Мануел Кортес од ТСАА.
Коментирајќи го трагичниот напад, портпаролот на премиерот Борис Џонсон рече:
„Одвратно е клучен работник да биде нападнат на овој начин додека ѝ служи на јавноста“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Египет ги повика Хамас и Израел да покажат флексибилност и да постигнат договор за прекин на огнот во Газа што е можно поскоро
Египет апелираше до Хамас и Израел да покажат флексибилност за што поскоро да се постигне прекин на огнот во борбите во Газа, соопшти утрово египетското Министерство за надворешни работи. Египет смета дека преговорите во Каиро не доведоа до прекин на огнот. Тие во моментов се во „деликатна фаза“, а делегациите на Хамас и Израел го напуштија главниот град на Египет, се наведува во соопштението.
Во телефонски разговор со американскиот државен секретар Ентони Блинкен, египетскиот министер за надворешни работи Самех Шукри ја нагласи „важноста да се повикаат страните да покажат флексибилност и да ги направат сите неопходни напори за постигнување договор за прекин на огнот и на тој начин да се стави крај на хуманитарната трагедија во Газа. соопшти Министерството.
Каиро стравува од опасноста, израелската операција во Рафах да ја загрози стабилноста и безбедноста на регионот, се додава во соопштението на египетската дипломатија.
Блинкен потврди дека Соединетите Американски Држави се против голема воена операција во Рафах и какво било принудно раселување на Палестинците од Газа, изјави неговиот портпарол Метју Милер.
Израелската армија во вторникот распореди тенкови во Рафах и ја презеде контролата на граничниот премин со Египет, блокирајќи го главниот премин за конвои со хуманитарна помош кон опколената палестинска територија.
Свет
Десетици илјади Палестинци бегаат од Рафах
Десетици илјади раселени Палестинци ги спакуваа своите шатори и други работи и бегаат од Рафах во други делови на Појасот Газа поради израелската закана од инвазија, пишува АП.
Израел постојано се закануваше дека ќе го нападне Рафах, каде засолниште побараа околу 1,3 милиони Палестинци, повеќе од половина од населението на Газа.
Еден од раселените рече дека не знае каде да оди.
Израелскиот премиер Бенјамин Нетанјаху денеска изјави дека американската закана дека нема да достави одредено оружје нема да го спречи Израел да продолжи со офанзивата во Појасот Газа.
Во текот на оваа недела израелските сили започнаа ограничена операција при која го зазедоа граничниот премин Рафах од палестинска страна и го блокираа влезот на хуманитарна помош.
ОН објавија дека северот на Појасот Газа веќе е во состојба на „тотален глад“.
Израел смета дека Рафах е последното упориште на борците на палестинското движење Хамас и дека армијата мора да влезе во тој град за да го уништи тоа движење и да ги врати заложниците кои беа киднапирани на 7 октомври.
Европа
Украина: Русите го нападнаа Харков, уништени се згради, меѓу повредените има и дете
Украина ги уништи сите 10 беспилотни летала во руски напад во текот на ноќта, но две лица се повредени, а станбени згради во регионот Харков беа зафатени од пожар, соопштија денеска украинските власти.
Воздухопловните сили на Телеграм соопштија дека Русија лансирала и две противвоздушни наведувани ракети. Портпаролот на украинските воздухопловни сили во телевизиски пренос изјави дека руските ракети најверојатно биле насочени кон североисточниот град Харков.
Гувернерот на регионот Харков, Олех Синехубов, рече дека три станбени куќи биле запалени, а десетици биле оштетени како резултат на рускиот напад, чија цел, според него, била и инфраструктурата и станбените области. На фотографиите што ги објави Синехубов на Телеграм, се гледаат големи пламени јазици од станбените згради.
„Две лица, меѓу кои и едно 11-годишно дете, се ранети во нападот и се на медицинска помош“, рече Синехубов на апликацијата Телеграм.
Ројтерс сè уште не ја потврди независно оваа вест. Москва негира дека цели на цивили во овие „легитимни напади врз воената, енергетската и транспортната инфраструктура на Украина“.