Приштинска „Газета“ објави дека дошле до писма, кои, како што наведува медиумот, британскиот адвокат Џефри Најс ѝ ги упатил на косовската влада, поради парите кои му ги должи.

Како што се наведува, во писмата, Најс нагласува дека косовската влада му должи речиси половина милион евра за неговите професионални услуги. Како што пишува „Газета“, сегашниот претседател, а поранешен премиер, Хашим Тачи, наредил на тогашниот заменик шеф на дипломатијата, Петрит Селими, да контактира со Најс и да му понуди да работи за косовската влада.

Најс, кој бил обвинител во Хашкиот трибунал во случајот против Слободан Милошевиќ, го напуштил тој суд во 2006 година. Подоцна за „Лондон ривју оф букс“ по повод извештајот на Дик Марти и другите наводи за трговија со човечки органи против тогашниот косовски лидер, вклучително и Тачи, напиша дека тој не е одржлив.

Најс во тој текст заклучил дека извештајот на Марти нема ништо што би ги поддржало обвинувањата. Ставот на Најс е причина поради која Тачи одлучил да го ангажира, пишува „Газета“и додава дека во писмото, Најс навел дека ја прифаќа понудата и дека се согласува со финансиките услови понудени од Селими. Тој во писмото тврди дека после некое време, исплатите престанале и дека тој морал да си ги бара парите лично преку мејл, но дека ни тоа не дало резултати.