Свет
Германски припадник на ИД имал централна улога во мрежата на напаѓачот од Виена

Германски припадник на Исламската држава можеби имал централна улога во мрежата во која учествувал и виенскиот терорист, пренесуваат австриските медиуми.
Исламистот, поранешен жител на Хамбург идентификуван со иницијалите В.А., е германски државјанин кој бил уапсен и осуден во 2017 година како странски терористички борец и се верува дека се преселил во Виена во јануари годинава.
Според извештајот на австрискиот таблоид „Кронен цајтунг“, Германецот бил центарот на транснационална радикална исламистичка екстремистичка мрежа во која имало и радикали кои живеат во швајцарскиот град Винтертур, а кои беа уапсени по терористичкиот напад во Виена на почетокот на месецов.
В.А. беше уапсен пред терористичкиот напад во Виена во октомври и депортиран во Германија. Според весникот, тој преку интернет одржувал контакт со соборците- екстремисти, вклучувајќи го и напаѓачот од Виена, Кујтим Фејзула.
Истражителите сè уште ги разгледуваат обвинувањата дека тој, исто така, подготвувал терористички напад, но 22-годишникот беше опишан како „прекинувач“ за исламските радикали низ цела Европа.
За Кујтим Фејзула, исто така, се вели дека имал контакт со турски приврзаник на Исламска држава, кој е во притвор во Австрија од октомври. СМС-пораките собрани за време на истрагата на турскиот екстремист откриваат врски и со виенскиот напаѓач и со неговиот круг.
Терористичкиот напад во Виена, во кој беа убиени четири лица во центарот на градот, се случи по неколку други исламски терористички напади во Франција.
Австрискиот канцелар Себастијан Курц вети дека ќе се справи и со тероризмот и со идеологиите на политичкиот ислам по нападот и ја повика ЕУ да го стори истото. Минатата недела, Курц објави дека неговата влада ќе се обиде да ги криминализира политичките исламски идеологии со создавање нови закони за гонење на оние кои пропагираат идеи што тој ги нарече „почва за размножување“ на тероризмот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Медински: Ако Киев и НАТО се обидат да ги вратат новите руски региони, ќе следи нуклеарна војна

Помошникот на рускиот претседател Владимир Путин, Владимир Медински, денес изјави дека ако Киев и НАТО се обидат да ги вратат новите региони на Руската Федерација, ќе има нуклеарна војна.
Во интервју за Раша тудеј, Медински рече дека може да се случи нуклеарна војна ако конфликтот во Украина престане без да се склучи вистински мир, бидејќи, според него, Киев и НАТО ќе се обидат да ги вратат новите територии на Руската Федерација, пренесува ТАСС.
„Ако го запреме конфликтот по линијата на фронтот и не се договориме за вистински мир, туку само склучиме некаков вид примирје, тогаш ова ќе биде – знаете, имаше спорен регион меѓу Ерменија и Азербејџан, Карабах – тогаш овој регион ќе се претвори во огромен Карабах“, рече Медински, кој е шеф на руската делегација на разговорите со украинската страна.
Тој рече дека Москва не сака да создаде „џиновски Карабах, непризнаен од никого, поради кој може да избувне нуклеарна војна“.
„По некое време, Украина, заедно со НАТО, со своите сојузници, ќе се приклучи на НАТО, ќе се обиде да го врати, а тоа ќе биде крај на планетата, тоа ќе биде нуклеарна војна“, рече Медински.
Тој додаде дека Русија затоа сака да се склучи „целосен мир“.
„Затоа, сакаме да ја запреме војната, да склучиме целосен мир и да ги признаеме новите територии“, рече Медински, зборувајќи за териториите што Русија ги презеде од почетокот на војната во Украина, пренесува Танјуг.
Свет
Венс за Газа: Израел не врши геноцид, но тие слики ми го кршат срцето

Потпретседателот на САД, Џеј Ди Венс, ги отфрли обвинувањата дека Израел врши геноцид во Газа, но изрази жалење што на некои од неговите луѓе им недостасува човечност и не го гледаат сегашното страдање на Палестинците во енклавата разорена од војна, објавија денес израелските медиуми.
„Ги гледам тие видеа, тие слики и ми го кршат срцето“, рече Венс во подкастот на комичарот Тео Вон, кој ги опиша како „ужасни“ слики од Газа.
Потпретседателот на САД рече дека неговата земја се обидува да реши два проблема – од една страна, тука се невините Палестинци, а од друга страна, невините израелски заложници, кои, како што истакна, се вклучени во ужасното насилство што продолжува.
„Се обидуваме да им обезбедиме што е можно повеќе помош на луѓето“, рече Венс, објави „Тајмс оф Израел“.
Како што наведе, од друга страна, Израел е нападнат од ужасна терористичка организација, а луѓето понекогаш забораваат дека оваа војна започна по ужасен терористички напад во кој загинаа многу невини израелски цивили.
Венс нагласи дека администрацијата на претседателот Доналд Трамп се обидува да постигне мирно решение кое би го уверило Израел дека Хамас никогаш повеќе нема да го нападне и да убие маса цивили.
„Исто така, мора да им дадете што е можно повеќе хуманитарна помош и поддршка на Палестинците бидејќи тие се вклучени во сето ова“, рече американскиот функционер, кој не разговараше за политичко решение на поширокиот израелско-палестински конфликт, според „Тајмс оф Израел“.
Венс посочи дека не му се допаѓа фактот што целата дебата за Израел и Палестинците донекаде го деградирала човештвото, бидејќи има луѓе, претежно од левицата, кои целосно игнорираат дека толку многу невини Израелци биле убиени во терористички напад, додека други од десницата целосно го игнорираат фактот дека децата биле во средината на ова насилство. Потпретседателот на САД, исто така, ги критикуваше оние во произраелските и републиканските кругови кои тврдат дека специјалниот пратеник за Блискиот Исток, Стив Виткоф, не е доволно „произраелски ориентиран“.
Ванс тврди дека Израел не врши геноцид во Газа, додавајќи дека не мисли дека Израелците намерно се обидуваат да ги убијат сите Палестинци, туку дека им е нанесен тежок удар и се стремат да ја уништат терористичката организација Хамас што го нанесе. „Од друга страна, видов луѓе од мојата политичка средина кои гледаат видеа од невини палестински деца и велат „тие го заслужиле тоа“.
Не, не, ако имате душа, тогаш срцето ви се крши кога ќе видите како мало дете страда“, рече Ванс, додавајќи дека ова ја навело администрацијата на Трамп да се обиде да го запре конфликтот, пренесува Танјуг.
Регион
Драма во Црна Гора: две жени од Србија извлечени на брегот од силните морски струи и ветер

Две српски државјанки беа спасени денес во водите на Јадранското Море, откако силни морски струи ги одвлекоа далеку од брегот.
Како што соопшти Управата за поморска безбедност и управување со пристаништата во Црна Гора, двете жени од Србија биле однесени од брегот кај Сутоморе од силните морски струи и ветер.
Управата изјави дека центарот за поморски операции добил повик за помош утрово во 8:33 часот, по што спасувачкиот брод со екипажот испловил кон областа Сутоморе.
„На лице место пронашле две српски државјанки кои биле во морето. Тие веднаш биле извлечени од водата и безбедно транспортирани со брод на Управата за поморска безбедност и управување со пристаништата до брегот, каде што ги пречекала екипата за итни случаи“, се додава во соопштението.
Управата истакна дека акцијата била завршена брзо и ефикасно, а спасувачката екипа била поддржана од брод од Секторот за гранична полиција со екипаж.