Европа
Голема акција на чешката полиција: Уапсени лица кои биле под директива на руската тајна служба
Ноќта од вторник кон среда чешката полиција почна голема акција.
Според чешките медиуми, во акцијата биле уапсени повеќе од 10 чешки државјани, кои работеле под команда на агенти на руската тајна служба ГРУ, за која се верува дека спроведува хибридни воени операции низ целиот свет.
Стотици полицајци учествувале во ноќната операција на чешките безбедносни сили.
Чешката полиција се сомнева дека уапсените организирале патувања на чешки граѓани во украинскиот регион Донбас, каде учествувале во борбите на страната на проруските сепаратисти, под наредба на ГРУ.
Чешка во саботата протера 18 руски дипломати кои ги идентификуваше како персонал на тајните служби. Русија одговори во понеделникот со протерување на дваесет чешки дипломати како одмазда.
Зад одлуката на чешкиот премиер Андреј Бабиш да ги протера руските дипломати стои откритието за серијата мистериозни експлозии што се случија во складиште за муниција во 2014 година во местото Врбетице, 330 километри југоисточно од Прага.
За експлозијата најпрво се сметаше дека е несреќен случај. Но, како што објавија чешкиот премиер Бабиш и министерот за надворешни работи, Јан Хамачек, чешките власти сега се сомневаат дека руските разузнавачки служби ја предизвикале експлозијата.
„Постои основано сомнение за вмешаност на официри на руската разузнавачка служба ГРУ, единица 29155, во експлозијата на складиштето за муниција во областа Врбетица“, рече Бабиш на состанокот eмитуван во живо на телевизија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Украина: Русите го нападнаа Харков, уништени се згради, меѓу повредените има и дете
Украина ги уништи сите 10 беспилотни летала во руски напад во текот на ноќта, но две лица се повредени, а станбени згради во регионот Харков беа зафатени од пожар, соопштија денеска украинските власти.
Воздухопловните сили на „Телеграм“ соопштија дека Русија лансирала и две противвоздушни наведувани ракети. Портпаролот на украинските воздухопловни сили во телевизиски пренос изјави дека руските ракети, најверојатно, биле насочени кон североисточниот град Харков.
Гувернерот на регионот Харков, Олех Синехубов, рече дека три станбени куќи биле запалени, а десетици биле оштетени како резултат на рускиот напад, чија цел, според него, биле и инфраструктурата и станбените области. На фотографиите што ги објави Синехубов на „Телеграм“ се гледаат големи пламени јазици од станбените згради.
„Две лица, меѓу кои и едно 11-годишно дете, се ранети во нападот и се на медицинска помош“, рече Синехубов на апликацијата „Телеграм“.
„Ројтерс“ сè уште не ја потврди независно оваа вест. Москва негира дека цели на цивили во овие „легитимни напади врз воената, енергетската и транспортната инфраструктура на Украина“.
Европа
Повредени двајца полицајци во Париз кога маж им го украл пиштолот и пукал во нив
Двајца полицајци се повредени во престрелка во полициската станица во Париз, кога на еден од нив му бил одземен пиштолот од маж кој претходно бил приведен поради напад со нож врз жена.
„Полицијата интервенираше и го донесе овде, во полициската станица, и тој потоа му го грабна пиштолот на полицаецот“, изјави началникот на полицијата Лорен Нунес.
Обвинителството соопшти дека еден од полицајците е во тешка состојба, пренесува „Монд“.
Полицијата возвратила, а напаѓачот се здобил со повреди во пределот на градниот кош, по што бил пренесен во болница.
Како што информираат од болницата, животот на напаѓачот не е во опасност.
Европа
Путин го избра премиерот
Рускиот претседател Владимир Путин предложи повторно именување на Михаил Мишустин за премиер во неговиот нов претседателски мандат, изјави утрово претседателот на Државната дума, долниот дом на рускиот парламент.
Откако Путин во вторникот положи заклетва за нов шестгодишен претседателски мандат, тамошната влада, според одредбите на рускиот Устав, поднесе оставка.
И додека во последните денови се шпекулираше дека може да има промени на некои важни и суштински позиции, а руските независни медиуми споменуваа евентуално заминување на Михаил Мишустин од премиерската позиција, Путин повторно го предложи за таа функција.
„Претседателот Владимир Владимирович Путин достави до Државната дума предлог за кандидатурата на Михаил Владимирович Мишустин за функцијата премиер. Денеска претставниците ќе донесат одговорна одлука за ова прашање во име на нивните гласачи“, изјави претседателот на Думата, Вјачеслав Володин на апликацијата Телеграм.
Ова е петти мандат на Путин на власт, а тој го номинираше Мишустин за премиер за прв пат во јануари 2020 година, кога Владата предводена од Дмитриј Медведев поднесе оставка по најавените важни уставни промени во политичкиот систем на земјата од страна на претседателот.
Мишустин, кој ќе зборува во Думата пред гласањето, мора да одговори како ќе реши низа задачи што Путин и ги постави на владата, вклучително и „зголемување на одбранбената способност на нашата земја“, рече Володин.