Свет
Големи протести против расизмот се шират во светот
Илјадници демонстранти излегоа на улиците во Европа и Австралија, како и стотина во Токио и Сеул, за да ги поддржат американските протести против полициската бруталност.
Протестите кои се шират во светот покажуваат се поголем бес и гнев поради полициските постапки кон етничките малцинства, а избија откако американски полицаец на 25 мај во Минеаполис, со колено на вратот го задуши Афроамериканецот Џорџ Флојд, за време на апсење.
Протести против расизмот какви што не се видени досега на Стариот континент, сега се шират во делови на Европа, со десетици илјади демонстранти на улиците.

Во Лондон и покрај дождот на улица излегоа илјада демонстранти, собирајќи се пред зградата на парламентот. Демонстрантите носеа заштитни маски поради коронавирусот и извикуваа слогани како „Без правда нема мир, не за расистичката полиција“, исто како и демонстрантите во САД.
Министерката за внатрешни работи, Прити Пател ги повика луѓето да не излегуваат на протестите поради опасност од пандемијата. Коронавирусот во Британија одзеде најмногу животи после САД.
На протест излегоа и граѓаните на Берлин, Хамбург и на Варшава.
Париските власти ги забранија протестите пред американската амбасада и на ливадите околу Ајфеловата кула, но демонстрантите сепак се собраа покрај амбасадата на САД, носејќи натписи како „Црните животи се важни“. Силите за безбедност поставија заштитна ограда преку плоштадот за да ги спречат демонстрантите дополнително да се доближат до амбасадата, а во близина е и Ајфеловата кула, седиштето на францускиот претседател.
Протестите се одржаа и во Азија и во Австралија, но со помал одѕив поради мерките за физичка дистанца кои се на сила.
Полицијата во Бризбејн, еден од австралиските градови во кои се одржаа протести, проценува дека на улиците излегле 10 илјади луѓе, кои носеле заштитни маски и натписи „Црните животи се битни“. Многумина се завиткале во абориџински знамиња, повикувајќи на престанок на лошиот полициски третман врз автохтоното австралиско население.
Судот во Сиднеј ја отфрли забраната за собир поради коронавирусот, па на протестот излегоа неколку илјади луѓе.
Во Токио демонстрантите се собраа и против наводната полициска бруталност кон Курдите.
Неколку десетици илјади јужнокорејски активисти од странство се собраа во Сеул, додека во Банкок активистите својот протест го изразија на интернет.
Тајланѓаните пак се снимаат во црна облека, со рацете во воздух и со натписи за поддршка на американските демонстранти.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Во лизгањето на земјиштето во Индонезија 25 луѓе го загубија животот
Спасувачите денеска ги прекинаа операциите за пребарување на жртвите во лизгањето на земјиштето во индонезиската покраина Западна Јава, откако беа пронајдени 14 тела на вториот ден од операциите, со што вкупниот број потврдени жртви достигна 25, пренесе ДПА, повикувајќи се на официјален претставник.
Обилните дождови што почнаа еден ден претходно предизвикаа лизгање на земјиштето вчера изутрината во близина на село во округот Западен Бандунг.
Официјални претставници изјавија дека до 80 лица се уште се водат како исчезнати.
„Сите тела беа евакуирани до 16 часот во центарот за идентификација на жртвите од катастрофата. Подоцна во текот на денот, спасувачките операции беа прекинати поради безбедносни причини, бидејќи условите на теренот во погодената област останаа нестабилни и постоеше ризик од понатамошно лизгање на земјиштето“, изјави Аде Диан Пермана, раководител на службата за пребарување и спасување во Бандунг.
Лизгањето на земјиштето често се случува во Индонезија за време на дождовната сезона, особено во густо населените и планински области на Јава, најнаселениот остров во земјата, пренесе ДПА.
Свет
Зеленски побара од сојузниците повеќе муниција за одбрана на Укаина
Украинскиот претседател Володимир Зеленски денеска побара од сојузниците повеќе муниција за противвоздушната одбрана на Украина со цел подобро да се спротивстави на руските напади, што оставија стотици илјади жители на Киев без електрична енергија и греење сред зима.
„Само оваа недела, Русите лансираа повеќе од 1.700 борбени беспилотни летала, повеќе од 1.380 наведувани бомби и 69 ракети од различни видови. Затоа ракетите за системите за противвоздушна одбрана се потребни секој ден, и ние продолжуваме да соработуваме со САД и Европа за да обезбедиме подобра заштита на нашиот воздушен простор“, рече Зеленски по пристигнувањето во Вилнус, објавија француските медиуми.
Зеленски во Вилнус се сретна со претседателот на Литванија, Гитанас Науседа. На средбата станало збор за поддршката на украинскиот енергетски систем и воената соработка меѓу двете земји.
Свет
Поради снежно невреме повеќе од 700.000 домови во САД останаа без струја
Снежно невреме го погоди поголемиот дел од САД, оставајќи стотици илјади луѓе без струја, додека влошување на временските услови се очекува и во областите на Њујорк, Филаделфија и Вашингтон.
Најтешко погодени се државите Мисисипи, Луизијана и Тексас, каде што околу 730.000 домаќинства останаа без струја, а се проценува дека дури 190 милиони луѓе се изложени на ризик од прекини во снабдувањето со електрична енергија и греење.
Невремето зафати површина од околу 3.000 километри, од Ново Мексико до Мејн, а во неколку држави е прогласена вонредна состојба. Снежните врнежи и мразот предизвикаа големи проблеми во сообраќајот, затворање на патиштата и откажување на илјадници летови.
Властите ги повикуваат граѓаните да останат дома, додека центри за затоплување на населението се отворени во Њујорк и Вашингтон.

