Свет
Големо снежно невреме ги зафати САД: Затворени училишта, откажани летови

Голема зимска бура, придружена со силен ветер и снег, денеска го погоди американскиот Среден Запад, што доведе до затворање на стотици училишта и големи проблеми во воздушниот и патниот сообраќај.
Зимско временско предупредување беше издадено за повеќе од 50 милиони Американци утринава, бидејќи бурата се движеше низ западните и северните делови на САД, а потоа кон исток, објави „Ројтерс“.
Утре во текот на денот на места се очекуваат и до 60 сантиметри снег и брзина на ветер до 97 километри на час, соопшти Националната метеоролошка служба.
Невремето ја погоди и Калифорнија и донесе мешавина од снег и лапавица на исток, вклучувајќи ја и Нова Англија, каде синоптичарите ги предупредија возачите да внимаваат на лизгави патишта.
Патиштата покриени со снег го направија патувањето опасно во горниот дел на Средниот Запад, а далноводите покриени со мраз и соборените дрвја може да доведат до прекин на електричната енергија доцна денес и утре, што ќе го оневозможи патувањето, соопшти Центарот за предвидување на времето на Метеоролошката служба во Колеџ Парк.
Експертите велат дека зголемената зачестеност и интензитет на вакви бури, прошарани со екстремни горештини и сушни периоди, се последица на климатските промени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
40 ранети во Израел, двајца критично

Вкупно 40 лица побарале медицинска помош по вечерашниот ирански ракетен напад врз Израел, соопштија локалните здравствени служби. Двајца од повредените се во критична состојба.
Најголем број пациенти се лекуваат во болницата Ичилов во Тел Авив – 18 лица.
Според лекарите, пријавените повреди вклучуваат рани од шрапнели, вдишување чад и состојба на шок.
Свет
Израелската војска: Иран истрела помалку од 100 балистички ракети, повеќето ги пресретнавме

Портпаролката на израелската војска, Ефи Дефрин, рече дека помалку од 100 балистички проектили биле истрелани од Иран кон Израел.
Дефрин рече дека „повеќето од ракетите биле пресретнати од воздушната одбрана или паднале пред да стигнат до израелска територија“.
„Регистрирани се ограничен број погодоци на згради, а дел од штетата е предизвикана од фрагменти од пресретнати проектили“, додаде тој.
Според израелските медицински служби, во нападот биле ранети 40 лица.
Свет
Нетанјаху: Ова е можност за иранскиот народ да се спротивстави на режимот

Израелскиот премиер Бенјамин Нетанјаху вечерва и порача на јавноста дека можат да ги напуштат засолништата, откако новиот бран ирански ракети прелета над израелска територија.
„Иранскиот режим никогаш не бил послаб. Ова е можност за иранскиот народ да се спротивстави на режимот“, рече Нетанјаху во вечерашното обраќање.
Тој директно им се обрати и на граѓаните на Иран: „Јас сум со вас, израелскиот народ е со вас“, рече тој.
Министерот за одбрана на Израел, Израел Кац изјави дека Иран „ја преминал црвената линија со лансирање ракети кон израелските цивилни области“ и најави: „Техеран ќе плати висока цена“.
Оваа иранска одмазда следеше по израелските воздушни напади на иранска територија, при што беа погодени нуклеарни постројки и беа убиени високи команданти и научници.