Поранешниот британски премиер Гордон Браун изјави дека владата треба да го одложи за една година официјалниот процес за напуштање на ЕУ за да организира одржување собир на граѓани, кој би го разбил политичкиот застој.

Со приближувањето на 29 март, кога конечно треба да се дојде до брегзитот, Обединетото Кралство се наоѓа во најголема политичка криза во последните 50 години.
Пропадна предлогот на премиерката Тереза Меј со кој ќе се постигнеше пријателски развод со независна трговска политика. Парламентот го отфрли договорот, што е најголем пораз за некој британски лидер во модерната историја.

Браун, кој беше лабуристички премиер од 2007 до 2010 година, рекол дека постои растечки гнев во јавноста, затоа што, како што нагласил, луѓето ја гледаат елитата надвор од допирот со парализираниот парламент.

„Тоа е комбинација од блокиран парламент, уште повеќе поделена земја и растечка недоверба меѓу парламентот и луѓето поради што сум загрижен за нашето единство“, рекол Браун.

„Ако парламентот не може да го реши проблемот што сам го создаде и ако сме во неистражени води како брод на море, без компас, карти или елеци за спасување, тогаш време е од почеток да размислиме“, порача Браун.

Собирите на граѓани, кои се основани низ светот, служат за советување со граѓаните за општествени или политички предизвици што политичарите не успеале да ги решат.