Дмитриј Медведев, заменик-претседател на рускиот Совет за безбедност, изјави дека вчерашниот разговор меѓу Доналд Трамп и Владимир Путин бил „исклучително важен“.

Тој остро ја критикуваше администрацијата на Џо Бајден за прекин на официјалните контакти, тврдејќи дека тоа го донело светот „на работ на апокалипсата“.

Според руската државна новинска агенција Тас, Медведев тврдел дека ниту една американска администрација пред Бајден не ја „блокирала комуникацијата меѓу лидерите“.

„Напротив, светските лидери отсекогаш наоѓале начин за дијалог и токму тоа овозможило да се надминат кризите“, рече тој.

Тој, исто така, предупреди дека ако непријателите на Москва не сфатат дека Русија е невозможно да се победи, „нуклеарниот часовник на судниот ден ќе продолжи незапирливо да отчукува кон полноќ“.

Најмалку едно лице загина денеска во обид за самоубиствен бомбашки напад во Кабул, изјави портпаролот на Министерството за внатрешни работи.

Бомбашот се обидел да влезе во зградата на Министерството за урбан развој.

Припадник на безбедносните сили отворил оган и го активирал експлозивот што го носел бомбашот самоубиец.

Во експлозијата загина едно лице кое се наоѓало во близина, а тројца се повредени, изјави портпаролот.

По разговорот меѓу Доналд Трамп и Владимир Путин, изјава за медиумите даде и германскиот министер за одбрана Борис Писториус. Тој рече дека ако Путин е навистина сериозен за мировните преговори – иако се сомнева во тоа – треба да го покаже тоа со запирање на нападите врз Украина. Тој нагласи дека Европа мора да биде вклучена во какви било преговори, особено ако Трамп очекува европските сојузници да играат мировна улога во идните договори, како што предложи американскиот министер за одбрана Хегсет.

Писториус додаде дека ќе беше подобро САД да не направеа отстапки за Русија уште пред да започнат преговорите, мислејќи на прашањето за членството на Украина во НАТО и можните територијални загуби. Тој, исто така, предупреди дека брзото постигнување мировен договор нема нужно да ги отстрани сите грижи за сè поагресивната политика на Русија во регионот и нагласи дека Европејците нема да можат да си дозволат „да седат и да се релаксираат“.

Писториус повика на внимателен пристап во реакциите на најавата за мировни преговори, нагласувајќи дека Путин продолжува да ја провоцира Европа и останува закана. На прашањето кој треба да ја претставува Европа во евентуалните преговори, Писториус ја спомена можноста за учество на Германија, но додаде дека тоа е прашање за кое одлучуваат други – но тој инсистираше на тоа дека Европа мора да го има својот глас на преговарачката маса.