Свет
Две ракети експлодираа близу Амбасадата на САД во Багдад
Две ракети експлодираа во близина на Амбасадата на САД во Багдад. Странски дипломати известуваат дека биле вклучени и сирените за итни случаи, пренесува „Брејтбарт“.
Најновиот напад во рамките на затворената Зелена зона, во која се наоѓаат странски амбасади и згради на ирачката влада, доаѓа во време на зголемени тензии меѓу двата главни сојузници на Багдад, Техеран и Вашингтон.
Странски извор за безбедност во Зелената зона соопшти дека две ракети удриле близу до Амбасадата на САД, а трета паднала во реката Тигар, кон која гледа амбасадата .
„Едната удри на околу три метри во комплексот на амбасадата“, рече изворот.
Ирачки безбедносен извор потврди дека две ракети „катјуша“ експлодирале во близина на амбасадата нешто пред полноќ. Откриено е дека биле истрелани од областа во јужниот дел на Багдад, каде што се забележани ирачки паравоени сили. Ниту една група не ја презеде одговорноста за нападите.
Последниот ракетен напад врз Зелената зона во Багдад се случи на 19 мај, само неколку дена откако САД најавија заминување на целиот несуштински дипломатски персонал од Ирак. По неколкудецениските конфликти, Ирак уживаше во период на релативна стабилност откако прогласи победа над џихадистичката група Исламска држава кон крајот на 2017 година. Во знак на подобрена безбедносна состојба, ирачките власти од минатата година работат на олабавување на безбедносните ограничувања околу Зелената зона.
Бетонски заштитни ѕидови се отстранети и дозволен е сообраќај низ зоната за првпат по повеќе од една деценија, но американската амбасада останува една од најбезбедните области во зоната.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Почина бебето кое беше извадено од утробата на мртвата мајка во Газа
Почина бебето кое во неделата со царски рез во Газа беше спасено од утробата на мртвата мајка, пишува Би-Би-Си.
Бебето е родено по итен царски рез извршен врз трудница која била убиена во израелски напад врз градот Рафа во Газа.
Освен мајката на Сабрин Ал Сакани, меѓу загинатите се и таткото на новороденото девојче и нејзината тригодишна сестра Малак.
Бебето при раѓањето тежело 1,4 килограми, а се родило во триесеттата недела од бременоста на мајката. Веднаш по царскиот рез беше сместено во инкубатор во болницата во Рафа заедно со уште едно бебе.
Но, девојчето после неколку дена почнало да има сериозни здравствени проблеми. Лекарите го реанимирале, но сепак починало вчера.
16 деца биле убиени за време на два воздушни напади на Рафа минатиот викенд, при бомбардирање на комплекс од станбени згради.
Израелските одбранбени сили (ИДФ) соопштија дека цел биле борците и инфраструктурата на Хамас и воените комплекси.
Свет
Британските разузнавачи: Русите се’ побрзо напредуваат во Украина
По заземањето на источноукраинскиот град Авдијевка, руските трупи напредуваат побрзо во областа, објави денеска британското Министерство за одбрана во своето секојдневно известување.
„Руските копнени сили навлегоа и создадоа тесен коридор на украинска територија со цел да влезат во градот Очеретин, приближно 15 километри северно од центарот на Авдијивка“, пишува на профилот на Министерството за одбрана.
Оцеретин во областа Доњецк имал околу 3.500 жители пред почетокот на војната.
И по заземањето на Авдијивка во средината на февруари, Русите се уште сметаат дека освојувањето на таа област е една од клучните операции, оценува британското Министерство за одбрана.
„Иако претрпуваат големи загуби, многу е веројатно дека руските копнени сили се во позиција континуирано да ги гаѓаат украинските позиции во областа и дека презеле контрола врз неколку помали населби“, додаваат тие.
Украина се брани од руската инвазија повеќе од две години. Британското Министерство за одбрана редовно објавува информации за напредокот на војната. Москва го обвинува Лондон за ширење дезинформации.
Европа
16-годишно момче избодено во училиште во Германија
16-годишно момче е тешко повредено кога утрово околу 8 часот било избодено од тинејџер (17) во училиште во Нојкирхен-Влуин.
На нападот наводно му претходела вербална расправија.
Постариот ученик наеднаш извадил нож и го ранил 16-годишникот во горниот дел од телото.
Момчето итно било пренесено во болница, а лекарите велат дека неговата состојба е стабилна.
По прободувањето напаѓачот побегнал од училиштето, но полицијата брзо го лоцирала и го уапсила.
Според инспекторот, немало опасност по безбедноста на другите деца во училиштето.