Европа
Двојно зголемен бројот на мигранти кои починале на пат кон Европа, објави Меѓународната организација за миграција

Во првата половина на 2021 година најмалку 1.146 луѓе се удавија во Средоземното Море, наспроти 513 во истиот период минатата година.
Најмалку 1.146 лица загинаа обидувајќи се да стигнат по морето во Европа во првите шест месеци од 2021 година и тој број е повеќе од двојно зголемен во споредба со истиот период минатата година, објави денеска Меѓународната организација за миграција (ИОМ).
Според податоците на ИОМ, во првата половина на 2020 година најмалку 513 лица се удавиле обидувајќи се да го преминат морето за да стигнат до европското копно.
„ИОМ го повторува својот повик до државите да преземат итни и проактивни чекори за да се намалат загубите на живот на патиштата за поморска миграција кон Европа и да се усогласат со нивните обврски според меѓународното право“, рече генералниот директор на организацијата.
Тој додаде дека зголемувањето на напорите за пребарување и спасување, воспоставувањето предвидливи механизми за слетување и обезбедувањето пристап до безбедни и легални миграциски патишта се клучни чекори кон постигнување на оваа цел.
Бројот на луѓе кои се обиделе да преминат кон Европа преку Средоземното Море се зголемил за 58 проценти во периодот од јануари до јуни годинава во споредба со истиот период во 2020 година.
Во првата половина на 2021 година, од повеќето мажи, жени и деца кои се удавиле обидувајќи се да дојдат во Европа, 896 од нив загинале во Средоземното Море.
Околу 250 лица се удавија додека се обидоа да стигнат до шпанските Канарски Острови, на западноафриканско-атлантската рута, велат од ИОМ.
Според последниот извештај, зголемениот број на смртни случаи е поврзан со недоволните операции за пребарување и спасување на Средоземното Море и на атлантската рута до Канарските Острови, каде што расте и бројот на пресретнувања покрај северноафриканскиот брег.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Ковчегот на папата Франциско затворен, погребот в сабота наутро

Од средата наутро, кога телото на покојниот папа Франциско беше пренесено во базиликата „Свети Петар“, низ неа поминаа 150.000 луѓе од целиот свет. Ковчегот на папата беше затворен вечерва, а погребот ќе се одржи в сабота наутро.
Пред церемонијата на запечатување, во ковчегот на папата беа поставени 12 монети, по една за секоја година од неговиот понтификат, како и краток запис и извештај за неговото папство. Церемонијата ја водеше кардиналот Кевин Фарел, камерлегно на Светата Римска црква.
Реки верници доаѓаат во Рим за да присуствуваат на утрешниот погреб на папата Франциско, а се очекува и пристигнување на бројни делегации од целиот свет.
Во Рим се воведени строги безбедносни мерки, со илјадници волонтери и полицајци, систем против дронови, снајперисти на покривите и борбени авиони подготвени за полетување.
Европа
Жена во Шпанија ја продала новородената ќерка за 2.000 евра на двојка која не можела да има деца

Шпанската полиција уапси 37-годишна жена која ја продала својата новородена ќерка на пар кој се лекува од неплодност, јавува АФП.
Полицијата соопшти дека жената била уапсена минатиот месец во Мостолес, јужно предградие на Мадрид. Брачен пар осомничен за купување дете и двајца нивни роднини беа уапсени во јужниот град Кордоба.
Според прелиминарната истрага, жената се согласила да им ја предаде својата новородена ќерка на двојката за 2.000 евра. Сепак, по породувањето, таа се предомислила и побарала да ѝ го вратат детето.
Двојката, според АФП, одбила да го врати бебето освен ако жената не им го врати платениот износ, плус дополнителни 1.000 евра за покривање на трошоците што тврделе дека ги направиле во текот на месецот што го поминале со неа во Кордоба пред да се роди детето.
Полицијата започна истрага откако една жена поднесе жалба тврдејќи дека семејство во Кордоба го „киднапирало“ нејзиното новородено бебе. Детето е предадено во центар за заштита на деца во Кордоба. Полицијата, исто така, објави дека властите ѝ одзеле уште шест деца на жената во 2022 година поради занемарување.
Европа
Зеленски: Подготвени сме да разговараме за територија, но само под еден услов

Украинскиот претседател Володимир Зеленски изјави денес дека Украина ќе биде подготвена да разговара за територијални прашања како дел од мировните преговори, но само откако Русија ќе се согласи на целосен и безусловен прекин на огнот.
„Целосно и безусловно примирје отвора можност да се разговара за сè“, изјави Зеленски пред новинарите во Киев.
Тој ја коментираше и изјавата на американскиот претседател Доналд Трамп, кој во интервју за „Тајм“ изјави дека „Крим ќе остане со Русија“.
„Она што го кажува претседателот Трамп е вистина. Се согласувам со него дека денес немаме доволно оружје за да ја вратиме контролата врз Кримскиот Полуостров“, рече Зеленски.
Да потсетиме дека украинските претставници претходно решително ја отфрлија можноста за какви било територијални отстапки во замена за мир со Русија.