Свет
Детали за летот на Зеленски до САД: Украинскиот лидер бил следен од цела флота шпионски и борбени авиони на НАТО

Флота од тајни шпионски и борбени авиони на НАТО го следеше украинскиот претседател Володимир Зеленски додека тој патуваше од Киев до Вашингтон во САД, пишува „Дејли мејл“.
Боинг Ц-40А на американската морнарица го превезувал Зеленски преку Атлантскиот Океан, а на тој дел од патувањето го придружувал и борбен авион.
Посетата на украинскиот претседател на САД првпат беше спомната кога претседателката на Претставничкиот дом на САД, Ненси Пелоси, учествуваше на Првиот парламентарен самит на Меѓународната кримска платформа во Загреб на крајот на октомври. Американскиот претседател Џо Бајден и Зеленски разговараа за средба во Вашингтон на 11 декември, а Белата куќа официјално го покани украинскиот лидер на 14 декември.
Зеленски им кажа на Бајден и на Белата куќа дека сака неговото прво патување во странство од почетокот на војната во Украина да биде во САД. Украинскиот претседател на 16 декември ја прифати поканата, а два дена подоцна беше потврдено дека тој навистина ќе дојде во Вашингтон. Тогаш за се беше информиран кабинетот на претседателката на Претставничкиот дом, Ненси Пелоси.
Десетчасовното патување на Зеленски, кое вклучуваше средба со Бајден во Овалната соба, нивната заедничка прес-конференција во Белата куќа и обраќање пред американскиот Конгрес, беше организирано релативно брзо.
Зеленски пристигна од Украина рано во средата на железничката станица во полскиот град Пжемишл, град недалеку од украинско-полската граница каде прво пристигнуваат многу од оние што бегаат од војната во Украина. Украинскиот претседател потоа беше префрлен на аеродромот во Жешов заедно со американската амбасадорка во Украина Бриџит Бринк во возилото на американската амбасада. Зеленски се качи на авионот во 08:15 часот, кој потоа го префрли во воздухопловната база Ендрјус во американската држава Мериленд, недалеку од Вашингтон, каде што слета нешто по 12:00 часот. До Белата куќа може да се стигне со автомобил од воздухопловната база Ендрус за 30 минути.
Зеленски леташе со авион на американското воено воздухопловство што вообичаено го користат официјални лица кои се наоѓаат веднаш под американскиот претседател и потпретседател по важност.
Белата куќа ја испрати потврдата за пристигнувањето на Зеленски дури во среда во 01 часот, бидејќи сакаше да се увери дека тој без проблеми ја напуштил Украина.
За безбедно прелетување над Северното Море и руските подморници кои патролираат во него, од Германија е испратен шпионски авион Боинг Е-3 Сентри, познат и како АВАКС.
Додека леташе над Велика Британија, го следеше борбен авион McDonnell Douglas F-15 Eagle на американските воздухопловни сили, кој вообичаено е стациониран во базата во Милденхол, округот Сафолк. Штом Зеленски го напушти шкотскиот воздушен простор, Ф-15 се врати во базата.
Летот со кој Зеленски пристигна од Европа во САД, љубопитните можеа да го следат преку Интернет во последната етапа од патувањето, додека патуваше преку Атлантикот. Накратко се појави и на онлајн услугите за следење летови додека минуваше низ Германија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израел со одговор на Британија: Промената на ставот го наградува Хамас и им штети на мировните напори

Министерството за надворешни работи на Израел реагираше на најавата на Велика Британија дека ќе ја признае Палестина доколку Израел не преземе конкретни чекори кон прекин на конфликтот во Газа и обновување на мировниот процес што води кон решение за две држави.
„Промената на ставот на британската влада во овој момент, по францускиот потег и внатрешниот политички притисок, претставува награда за Хамас и им штети на напорите за постигнување прекин на огнот во Газа и рамка за ослободување на заложниците“, се вели во соопштението на израелското Министерство за надворешни работи на X.
Британскиот премиер Кир Стармер го објави потенцијалниот потег неколку дена откако францускиот претседател Емануел Макрон изјави дека Париз ќе ја признае палестинската држава на Генералното собрание на Обединетите нации во септември.
Во официјалното соопштение од Даунинг стрит се наведува дека признавањето на Палестина е „неотуѓиво право на палестинскиот народ“ и дека ставот на британската влада отсекогаш бил дека признавањето ќе биде дел од поширокиот мировен процес, според медиумите.
Сепак, се наведува дека поради „сè понеподносливата ситуација во Газа и намалената надеж за мировен процес“, сегашниот контекст бара порешителна акција.
Стармер истакна дека признавањето ќе следи ако израелската влада не се согласи на итен и траен прекин на огнот, јасна посветеност на мировен процес што води кон решение за две држави и недвосмислена посветеност дека нема да има анексија на територија на Западниот Брег.
Тој, исто така, повтори дека „нема еквивалентност меѓу Израел и Хамас“ и дека барањата на Велика Британија кон Хамас остануваат: ослободување на сите заложници, прифаќање на прекин на огнот, откажување од каква било политичка улога во идното управување со Газа и целосно разоружување.
Фото: принтскрин
Свет
Велика Британија: Ќе ја признаеме Палестина во септември ако Израел не се согласи со нашите услови

Велика Британија ќе признае палестинска држава во септември ако Израел не се согласи на прекин на огнот во Газа, не дозволи помош од ОН и не преземе други чекори кон долгорочен мир, објави британскиот премиер Кир Стармер, според светските медиуми.
Стармер свика редок летен состанок на кабинетот за да се разговара за ситуацијата во Газа.
Тој им рече дека Велика Британија ќе ја признае државата Палестина пред Генералното собрание на Обединетите нации, „освен ако израелската влада не преземе значајни чекори за да ја заврши ужасната ситуација во Газа, не постигне прекин на огнот, не вети дека нема да има анексија на Западниот Брег и не се обврзе на долгорочен мировен процес што ќе обезбеди решение за две држави“.
Тој исто така рече дека Хамас мора да ги ослободи сите заложници што ги држи, да се согласи на прекин на огнот, „да прифати дека нема да игра никаква улога во владата на Газа и да се обврзе на разоружување“. Во телевизиска изјава, Стармер рече дека неговата влада ќе го процени „степенот до кој страните ги исполниле овие чекори“ во септември пред да донесе конечна одлука за признавање.
Велика Британија долго време ја поддржува идејата за постоење на независна палестинска држава покрај Израел, но верува дека признавањето треба да дојде како дел од договореното решение за конфликтот.
Притисокот за формално признавање на палестинската државност се зголеми откако францускиот претседател Емануел Макрон објави дека неговата земја ќе стане првата голема западна сила што ќе признае палестинска држава.
Повеќе од 250 од вкупно 650 пратеници во Долниот дом потпишаа писмо со кое ја повикуваат британската влада да признае палестинска држава. Стармер истакна дека и покрај условите што ги поставил, Велика Британија верува дека „државноста е неотуѓиво право на палестинскиот народ“, пренесуваат агенциите.
Фото: принтскрин
Регион
Млад човек се удави во Улцињ: трагедија во Црна Гора

Млад човек се удави во Улцињ денеска, во попладневните часови, јавуваат медиумите во регионот.
Според написите, давењето се случило на „Големата плажа“.
Засега нема информации за идентитетот на загинатиот.
Според последните извештаи било подигнато црвено знаме бидејќи имало големи бранови во морето.