Европа
Доколку се укинат ковид-мерките, два милиона луѓе ќе умрат за два месеца во Кина, предвидуваат експертите

Во Кина наглото укинување на строгиот режим на мерки против коронавирусот може да доведе до речиси два милиона смртни случаи во следните два месеца.
Ова го покажа новото истражување на Центарот за рак „Фред Хачинсон“ во Сиетл, Вашингтон, врз основа на податоците за смртноста објавени од одредени универзитети во Кина, како и податоци на интернет.
Студијата вели дека зголемувањето на бројот на смртни случаи далеку ги надмина официјалните податоци на кинеската влада, која процени во јануари дека 60.000 луѓе починале од Ковид-19 во болница по напуштањето на стратегијата за нулта толеранција на коронавирусот еден месец порано.
Се проценува дека имало 1,87 милион смртни случаи повеќе кај населението на возраст од 30 и повеќе години помеѓу декември 2022 година и јануари 2023 година гледајќи ги сите провинции во континентална Кина, освен Тибет.
Одлуката на Кина во декември минатата година да стави крај на тригодишниот период на спроведување на стратегија за нулта толеранција за коронавирусот доведе до огромно зголемување на бројот на хоспитализирани и смртни случаи за кои здравствените експерти велат дека во голема мера се недоволно пријавени од кинеската влада.
Светските здравствени експерти постојано ја повикуваа Кина да открие повеќе податоци за зголемувањето на бројот на хоспитализирани и смртни случаи од коронавирусот.
Кина престана да објавува официјални дневни податоци за бројот на починати од Ковид-19 на крајот на 2022 година.
Светската здравствена организација (СЗО) соопшти дека имало 121.628 смртни случаи од коронавирусот во Кина, а речиси седум милиони луѓе починале на глобално ниво.
Една кинеска провинција накратко објави податоци на својата веб-страница во јули, кои покажуваат дека бројот на кремирање се зголемил 70 отсто во првиот квартал од оваа година, но податоците подоцна биле отстранети, објави „Ројтерс“.
Највисоките кинески лидери прогласија решителна победа над коронавирусот во февруари. Сепак, здравствените власти во Пекинг во четвртокот рекоа дека коронавирусот останува заразна болест број еден во главниот град, според кинеските државни медиуми.
Официјалните лица рекоа дека новата варијанта на омикрон, наречена EG.5, е моментно доминантен вид во Кина.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Ковчегот на папата Франциско затворен, погребот в сабота наутро

Од средата наутро, кога телото на покојниот папа Франциско беше пренесено во базиликата „Свети Петар“, низ неа поминаа 150.000 луѓе од целиот свет. Ковчегот на папата беше затворен вечерва, а погребот ќе се одржи в сабота наутро.
Пред церемонијата на запечатување, во ковчегот на папата беа поставени 12 монети, по една за секоја година од неговиот понтификат, како и краток запис и извештај за неговото папство. Церемонијата ја водеше кардиналот Кевин Фарел, камерлегно на Светата Римска црква.
Реки верници доаѓаат во Рим за да присуствуваат на утрешниот погреб на папата Франциско, а се очекува и пристигнување на бројни делегации од целиот свет.
Во Рим се воведени строги безбедносни мерки, со илјадници волонтери и полицајци, систем против дронови, снајперисти на покривите и борбени авиони подготвени за полетување.
Европа
Жена во Шпанија ја продала новородената ќерка за 2.000 евра на двојка која не можела да има деца

Шпанската полиција уапси 37-годишна жена која ја продала својата новородена ќерка на пар кој се лекува од неплодност, јавува АФП.
Полицијата соопшти дека жената била уапсена минатиот месец во Мостолес, јужно предградие на Мадрид. Брачен пар осомничен за купување дете и двајца нивни роднини беа уапсени во јужниот град Кордоба.
Според прелиминарната истрага, жената се согласила да им ја предаде својата новородена ќерка на двојката за 2.000 евра. Сепак, по породувањето, таа се предомислила и побарала да ѝ го вратат детето.
Двојката, според АФП, одбила да го врати бебето освен ако жената не им го врати платениот износ, плус дополнителни 1.000 евра за покривање на трошоците што тврделе дека ги направиле во текот на месецот што го поминале со неа во Кордоба пред да се роди детето.
Полицијата започна истрага откако една жена поднесе жалба тврдејќи дека семејство во Кордоба го „киднапирало“ нејзиното новородено бебе. Детето е предадено во центар за заштита на деца во Кордоба. Полицијата, исто така, објави дека властите ѝ одзеле уште шест деца на жената во 2022 година поради занемарување.
Европа
Зеленски: Подготвени сме да разговараме за територија, но само под еден услов

Украинскиот претседател Володимир Зеленски изјави денес дека Украина ќе биде подготвена да разговара за територијални прашања како дел од мировните преговори, но само откако Русија ќе се согласи на целосен и безусловен прекин на огнот.
„Целосно и безусловно примирје отвора можност да се разговара за сè“, изјави Зеленски пред новинарите во Киев.
Тој ја коментираше и изјавата на американскиот претседател Доналд Трамп, кој во интервју за „Тајм“ изјави дека „Крим ќе остане со Русија“.
„Она што го кажува претседателот Трамп е вистина. Се согласувам со него дека денес немаме доволно оружје за да ја вратиме контролата врз Кримскиот Полуостров“, рече Зеленски.
Да потсетиме дека украинските претставници претходно решително ја отфрлија можноста за какви било територијални отстапки во замена за мир со Русија.