Портпаролот на ЕУ за надворешна политика Петер Стано ги осуди денешните руски напади врз украинските градови.

Посебно го осуди нападот врз станбена зграда во Днепар, во кој загинаа најмалку 35 цивили, меѓу кои и две деца.

„ Русија продолжува да го покажува своето нехумано лице и продолжува со своите брутални ракетни напади. Овие акции се воени злосторства и мора веднаш да престанат. Нема да има неказнивост за овие дејствија. ЕУ силно, најостро, ги осудува руските напади врз цивили, вклучително и нападите врз енергетска инфраструктура“, изјави тој.

Додаде дека овие акции само ја зајакнуваат решеноста на ЕУ да и помогне на Украина и дека ЕУ ќе ја прошири својата помош за Украина се додека тоа е потребно. Ова, рече тој, е уште еден доказ за тоа како Русија го ескалира овој конфликт. Зборувајќи за европските санкции против Русија, Стано рече дека санкциите имаат негативно влијание и врз ЕУ.

„ Се воведуваат рестриктивни мерки за да се покаже дека не се согласувате со кршење на меѓународните закони, Повелбата на Обединетите нации или човековите права. Кога станува збор за санкции против трговијата, енергијата…билатералните односи со партнерот со кој сте имале размена во минатото, секако дека има и влијание врз нас. Но, не смееме да заборавиме дека најголемото влијание на санкциите е на другата страна, кај оние што ги санкционираме“, вели тој.

Стано рече и дека веќе може да се види дека санкциите ја постигнуваат својата цел и ја „намалуваат способноста на Кремљ да напредува“ во нападите.

„Путин не постигна ниту една од своите стратешки цели што ги формулираше во февруари и има проблеми да ги продолжи акциите на неговата војска убијци и ограбувачи“, рече Стано.

На прашањето дали размислува за дијалог за ставање крај на војната, Стано изјави дека дијалогот отсекогаш бил политика на Унијата.

Тој потсети дека пред точно една година ЕУ била подготвена да преговара со Русија за сите прашања, но дека Русија одбила.

„Рускиот одговор беше отфрлање и напад на Украина. Досега Русија не покажа желба за разговор. Имаше напори во таа насока, посети, телефонски разговори со Кремљ, кои Путин секогаш ги одбиваше“, заклучи Стано.