Свет
Залужни сменет, Зеленски го назначи Сирски за нов врховен командант на украинската армија

Претседателот на Украина, Володимир Зеленски, го разреши врховниот командант Валериј Залужни и на негово место го назначи генералот Александар Сирски.
„Се сретнав со генералот Залужни, му се заблагодарив за двегодишната служба. Разговаравме и за тоа кој би можел да се приклучи на раководството на вооружените сили. Време е за такво ресетирање. Од денеска нов лидерски тим го презема раководството на Вооружените сили на Украина. „Го назначив генерал-полковник Сирски за врховен командант на вооружените сили на Украина“, рече Зеленски.
Зеленски во интервју на 4 февруари за италијанската медиумска куќа „Раи“ потврди дека планира големо ресетирање на украинското раководство, кое би можело да вклучи неколку кадровски промени.
Залужни заедно со претседателот објави слична порака со заедничка фотографија.
„Само што се сретнавме со претседателот. Важен и сериозен разговор. Донесена е одлука за потребата од промена на пристапот и стратегијата. Предизвиците во 2022 година се различни од оние во 2024. Затоа, секој мора да се промени и да се прилагоди на новата реалност. Ајде да победиме заедно“, додаде тој.
Извор на „Киев Индипендент“ во Генералштабот на вооружените сили на Украина минатата недела потврди дека Залужни требало да биде отпуштен.
САД, му порачаа на Киев дека нема да се мешаат во кадровските одлуки во земјата, а тоа го потврди и американскиот советник за национална безбедност Џејк Саливан на 4 февруари.
Залужни е врховен командант од јули 2021 година. Извештаите за несогласувања меѓу Зеленски и Залужни за прв пат се појавија во ноември 2023 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Американскиот сенатор Греам: Го молам Ватикан да размисли Трамп да биде папа

Американскиот сенатор Линдзи Греам, републиканец од Јужна Каролина, во објава на „Икс“ напиша дека Трамп треба да биде новиот папа.
„Бев возбуден кога слушнав дека претседателот Трамп е отворен за идејата да стане следниот папа. Навистина би бил кандидат во сенка, но би ги замолил конклавата и католичките верници да бидат со отворен ум за оваа можност! Првата комбинација папа – претседател на САД има многу предности. Ние го следиме белиот чад… Трамп MMXXVIII!“, напиша тој на „Икс“.
Доналд Трамп вчера изјави дека би сакал да биде папа. „Би сакал да бидам папа. Тоа би бил мојот прв избор“, му рече американскиот претседател на новинар, кој го праша за конклавата.
Тој продолжи нагласувајќи дека нема фаворит, но посочи дека Тимоти Долан, надбискупот на Њујорк, би можел да биде добар избор. „Не знам. Немам фаворит. Но, морам да кажам дека имаме кардинал од место наречено Њујорк, кој е многу добар, па ќе видиме што ќе се случи“, рече Трамп.
Греам е познат по значајните промени во политичките ставови, особено во врска со Доналд Трамп и надворешната политика.
Европа
Осумнаесет општински службеници во Истанбул завршија во затвор

Турски суд затвори 18 службеници на градската власт во Истанбул поради обвиненија за корупција продолжувајќи ја репресијата против опозицијата поради која беше затворен и градоначалникот Екрем Имамоглу.
Имамоглу, главен политички ривал на претседателот Ердоган и водечки на анкетите, беше затворен во март во очекување судење по обвиненијата за корупција. Тој се соочува и со обвиненија за помагање терористичка група.
Градоначалникот ги негира сите обвиненија, а неговото апсење ги предизвика најголемите протести во Турција во последната деценија, економски превирања и обвинувања за политизирано судство. Владата ги отфрла овие тврдења и вели дека судството е независно.
НТВ објави дека 34 од 52 лица приведени за време на викендот биле ослободени со кауција. Турските медиуми пред четири дена објавија дека властите привеле десетици вработени во општина Истанбул како дел од правните истраги насочени кон Имамоглу проширувајќи ја репресијата против опозицијата, која почна кон крајот на минатата година.
Меѓу приведените се генералниот секретар, началникот на кабинетот на Имамоглу и претседателот и заменик-претседателот на Управата за водоснабдување и канализација.
Европа
Шведската полиција уапси осомничен за пукањето во кое загинаа три лица

Шведската полиција објави дека привела осомничено лице по пукањето во кое загинаа три лица во градот Упсала во вторникот.
Лицето е осомничено за убиство и е едно од неколкуте лица што се испрашуваат како дел од истрагата, изјавија полицајци за новинарите.
Пукањето се случило во фризерски салон во Упсала, додадоа тие.
Полицијата соопшти дека инцидентот се смета за изолиран и не е поврзан со големите прослави на Валпургиската ноќ, што се очекуваат во Упсала в среда.