Свет
Захарова: Изјавата на Дуда за распоредување нуклеарно оружје во Полска е провокација
Портпаролката на руското Министерство за надворешни работи, Марија Захарова, денеска изјави дека во случај да се појави американско нуклеарно оружје на територијата на Полска, соодветните објекти веднаш ќе бидат додадени на списокот на легитимни цели за уништување во ситуација на директна воен конфликт со НАТО.
Таа тоа го изјави откако претседателот на Полска, Анджеј Дуда во интервју за весникот „Факт“ изјави дека полските власти се подготвени да примат американско нуклеарно оружје на своја територија.
„Ваквите провокативни изјави на полското раководство не се новинa“, рече Захарова.
Таа изјави дека полските власти долго време не ги кријат своите амбиции во однос на тоа како поцврсто да се држат до американското нуклеарно оружје стационирано во Европа и активно да ги вклучат во нивната длабоко непријателска политика кон Русија.
Според неа, на Полска очигледно не и е доволно тоа што е веќе членка на НАТО и што е активно вклучена во развојот на таканаречените „заеднички нуклеарни мисии“.
„Сето ова заедно води до фактот дека во сопственото воено планирање се однесуваме кон Полска со посебно внимание и во согласност со заканите што и се појавуваат на Русија од оваа земја“, рече Захарова.
„Полскиот фактор, се разбира, беше земен предвид од нас и нашите белоруски пријатели во процесот на преземање дополнителни мерки за зајакнување на безбедноста на Унијата“, рече таа.
„Сепак, се чини дека Варшава манијакално се обидува да привлече уште поголемо внимание на воените планери во рускиот Генералштаб. Не е тешко да се претпостави дека во случај на појава на американско нуклеарно оружје на полска територија, соодветните објекти веднаш ќе бидат додадени на листата на легитимни цели за уништување во ситуација на директен воен конфликт со НАТО“, заклучи Захарова.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Орбан: Подготовките за самитот Трамп-Путин во Будимпешта продолжуваат
Унгарскиот премиер Виктор Орбан изјави дека подготовките за состанокот меѓу американскиот претседател Доналд Трамп и рускиот лидер Владимир Путин во Будимпешта продолжуваат, иако самитот беше привремено одложен поради одбивањето на Москва да прифати прекин на огнот во Украина, јави Ројтерс.
Рускиот министер за надворешни работи Сергеј Лавров изјави дека барањето за итен прекин на огнот е спротивно на договорите постигнати на претходниот самит на Алјаска, предлагајќи наместо тоа привремено примирје.
„Министерот за надворешни работи Петер Сијарто е во Вашингтон. Подготовките продолжуваат, датумот сè уште е неизвесен. Кога ќе дојде време – ќе се одржи.“
Трамп, кој претходно најави средба во обид да го прекине војниот конфликт, изјави дека не сака да одржи „бесмислен состанок“, но најави дека во следните два дена ќе има нови информации.
Орбан, долгогодишен сојузник на Трамп, одржува и блиски односи со Москва, што често го става во судир со Европската унија.
Свет
(Видео) Во тешка несреќа со повеќе возила загинаа над 60 лица во Уганда
Teшка сообраќајна несреќа се случи на еден од главните автопати во Уганда, пришто животот го загубија 63 лица, потврди полицијата. Трагедијата се случила на автопатот Кампала-Гулу, еден од најпрометните во земјата, пишува Би-Би-Си.
Според полицискиот извештај, несреќата се случила 15 минути по полноќ по локално време. Два автобуси што се движеле во спротивни насоки се судриле челно додека се обидувале да избегнат камион и автомобил. Еден од автобусите одеднаш скршнал за да избегне судир, но со тоа предизвикал „фронтален и страничен судир“ што започнал „верижна реакција“. Во хаосот што следел, другите возила ја изгубиле контролата и се превртеле.
🔴 At least 63 dead in #Uganda bus crash
A tragic road accident involving two buses on one of Uganda’s busiest highways has killed at least 63 people and left several others injured, authorities confirmed on Wednesday. The crash occurred shortly after midnight on the highway… pic.twitter.com/ZS0jPbUV0m
— News.Az (@news_az) October 22, 2025
Покрај загинатите, повредени се и голем број патници од сите вклучени возила, кои се однесени во болница во градот Кирјандонго. Полицијата започна истрага за да ги утврди сите околности на несреќата. Тие ги предупредија возачите да избегнуваат „опасно и невнимателно престигнување“, посочувајќи дека таквото однесување е „една од водечките причини за сообраќајни несреќи во земјата“.
Свет
Повеќе од 850 експерти и јавни личности бараат запирање на развојот на вештачката интелигенција
Повеќе од 850 познати личности, меѓу кои водечки експерти за вештачка интелигенција, технолошки пионери и јавни фигури, во средата ја потпишаа изјавата со која се повикува на запирање на развојот на таканаречената „суперинтелигенција“ — форма на вештачка интелигенција што би ги надминала човечките способности во повеќето когнитивни задачи.
Изјавата ја потпишале основачот на „Вирџин груп“ Ричард Бренсон, коосновачот на „Епл“ Стив Возниак, како и научниците Јошуа Бенџио и Џеф Хинтон, познати како татковци на современата ВИ“. Меѓу потписниците е и Стјуарт Расел од Универзитетот Беркли.
Во документот се наведува дека развојот на вакви системи носи сериозни ризици од губење на слободата, достоинството и контролата, до закана за националната безбедност и можно исчезнување на човечкиот род.
Потписниците бараат мораториум на развојот на суперинтелигентни системи, сè додека не се постигне широк општествен консензус и научен договор за нивната безбедност и контрола, пренесе „Си-ен-би-си“.
Покрај технолошките и академските имиња, потписници има и од други области – универзитетски професори, верски лидери, медиумски личности и поранешни американски функционери од двете политички партии.
На списокот се најдоа и поранешниот началник на Генералштабот на американската армија Мајк Мален, поранешната советничка за национална безбедност Сузан Рајс, како и Стив Бенон и Глен Бек, блиски сојузници на американскиот претседател Доналд Трамп.
Интересно, меѓу потписниците се и принц Хари и Меган Маркл, што ѝ даде на иницијативата дополнителна глобална видливост. Организаторите наведуваат дека бројот на потписници и натаму расте.

