Украинскиот претседател Володимир Зеленски го повика Доналд Трамп да заземе јасна позиција за да го запре Владимир Путин и да ја заврши војната во Украина. Зеленски во ексклузивно интервју за „Скај њуз“ од претседателската палата во Киев рече дека единствениот начин да се стави крај на конфликтот лежи во дефинирани безбедносни гаранции, за кои, вели тој, е потребна храброста на Трамп, објави „Скај њуз“.

Зеленски изрази надеж дека британскиот премиер Кир Стармер ќе ја објасни иднината на Украина за време на државната посета на американскиот претседател на Велика Британија оваа недела. „Навистина се надевам дека тој (Стармер) ќе може да има многу специфична дискусија за безбедносните гаранции на САД за Украина“, рече тој.

„Пред да ја завршиме војната навистина сакам сите договори да бидат во сила. Сакам да имаме документ што е поддржан од Соединетите Американски Држави и од сите европски партнери. Ова е многу важно“, нагласи украинскиот лидер додавајќи: „За да се случи ова, ни треба јасна позиција од претседателот Трамп“.

Украинскиот претседател исто така го повика американскиот лидер да преземе силни лични чекори за да го запре Путин. Неговиот апел доаѓа откога Трамп ги повика сојузниците во НАТО да престанат да купуваат руска нафта и воведе царини за Кина за да извршат притисок врз Москва.

„Верувам дека Соединетите Американски Држави се доволно силни за да донесат свои одлуки“, рече Зеленски. „Верувам дека Доналд Трамп може да ни даде системи за воздушна одбрана во доволни количини, а Соединетите Американски Држави имаат доволно од нив“.

Тој додаде дека е уверен оти Вашингтон може да воведе санкции што ќе ѝ наштетат на руската економија. „Сигурен сум дека САД може да применат доволно санкции за да ѝ наштетат на руската економија плус Доналд Трамп има доволно моќ да го натера Путин да се исплаши од него“, рече тој потсетувајќи дека Европа веќе воведе 18 пакет-санкции. „Сè што недостига сега е силен пакет-санкции од САД“.

Зеленски исто така ги даде своите коментари во контекст на неодамнешниот самит меѓу Трамп и Путин на Алјаска. Тој рече дека Трамп му дал многу на Путин и требало да плати повеќе за состанокот.

„Верувам дека доколку беше трилатерален состанок (со вклучена Украина), ќе имавме некаков резултат“, додаде тој.

По веста дека британските борбени авиони пресретнале руски дрон над Полска, Зеленски предупреди дека Путин ја тестира силата на Северноатлантскиот договор. „Тој го тестира НАТО“, рече тој. „Тој сака да види за што е подготвено НАТО, за што се способни, дипломатски и политички, и како локалното население ќе реагира на тоа“.

Според него, Москва испраќа уште една порака: „Не осмелувајте се да ѝ дадете на Украина дополнителни системи за воздушна одбрана бидејќи можеби ќе ви бидат потребни и вам“.

Фото: принтскрин