Европа
Зеленски за „Билд“: Веќе немам солзи за плачење, чувствувам омраза кон Русија
Само неколку часа по гранатирањето на железничката станица во украинскиот град Краматорск, во кој загинаа најмалку 50 цивили, Зеленски даде претходно договорено големо интервју за германски „Билд“.
„Не можам повеќе да плачам, немам солзи за плачење“, одговори Зеленски на прашањето на новинарот дали уште плаче кога ќе се случи масакр како оној во Краматорск или во Буча, со стотици мртви.
Претседателката на Европската комисија, Урсула фон дер Лаен, ја посети Украина на денот на нападот во Краматорск.
„Ова е нашиот воен живот. Денес беше трагично утро, пред толку важен состанок. Никогаш не можете да се навикнете на овие жртви“, коментира Зеленски.
Дали Зеленски ја мрази Русија?
„Да, чувствувам омраза кон Русија, кон руските војници. Кога ќе ги видам овие слики пред мои очи. Убиени деца без нозе, без раце. Тоа е гнев, тоа е страшно.
Како татко природно мислам на моите деца во такви моменти. Мислам на моменти како дипломирање или свадба, па помислувам на родителите на мртвите деца. Никогаш нема да ги доживеат тие моменти со своите деца. Секако дека се лутам во такви моменти“.
Дали се плаши дека може да се откријат уште многу злосторства во украинските места?
„Што се случува во селата на југот, во Керсон, Запорожје и на исток – не знаеме. Многу градови се едноставно целосно уништени. Нема куќи, нема луѓе – не знам што ќе најдеме таму“.
Најлошото нешто што Зеленски го слушнал во последните неколку дена?
„Билд“ пишува дека еден шеф на европска влада побарал од Зеленски да му докаже дека злосторствата во Буча не биле исценирани. Зеленски не сакаше да открие за кого станува збор, но потврди дека во неколку наврати му побарал докази.
Дали ја обвинува Германија за одложувањето на санкциите?
„Да, некои земји, Германија е една од нив, се против ембаргото за нафта и гас. Мило ми е што петтиот пакет санкции на ЕУ вклучува ембарго за јаглен и дрва.
Германија не нè поддржа со оружје. Германија отворено кажа дека нема да бидеме членка на НАТО. Но, ако сме искрени: германската реторика е променета. Германија е конзервативна и студена, но сега има придвижување“.
Може ли Зеленски да седне на маса со Путин?
„Денес Украина нема друг избор освен да седне на преговарачка маса. Но, ниту една друга сила во Русија нема моќ да ја запре оваа војна. Тој сам одлучува кога ќе заврши оваа војна“.
Што гледа кога ги затвора очите ноќе?
„Не гледам ништо. Многу е тешко да се заспие. Не можам да се сетам кога последен пат добро спиев“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Британска компанија ги тужи „Фајзер“ и „Бионтек“: Ја украдоа нашата технологија за вакцина против Ковид
Британската фармацевтска компанија GlaxoSmithKline (GSK) денеска поднесе тужба пред федералниот суд во Делавер против американскиот Pfizer и германскиот BioNTech, тврдејќи дека тие ги прекршиле нејзините патенти за технологијата на гласник РНК (mRNA) во нивните вакцини против Ковид-19.
Вакцините Comirnaty на Pfizer и BioNTech ги прекршуваат иновациите на GSK заштитени со патент во mRNA вакцините, развиени „повеќе од десет години пред“ пандемијата на ковид-19, се вели во тужбата.
Патентите ја покриваат технологијата за пренос на нестабилна гласничка РНК во човечки клетки, која научниците почнаа да ја развиваат во 2008 година, а GSK стана сопственик кога го купи бизнисот со вакцини на Novartis во 2015 година, се додава.
Британската компанија бара парична отштета од Pfizer и BioNTech, вклучително и такси за патент, без да наведе износ.
Портпаролката на Pfizer во соопштението нагласи дека компанијата е „сигурна во својата позиција во однос на интелектуалната сопственост поврзана со Comirnaty“ и дека има намера „енергично да се брани“ од тврдењата на GSK. Портпаролот на BioNTech одби да ја коментира тужбата.
Портпаролот на GSK рече дека компанијата верува дека нејзините патенти „ја обезбедуваат основната технологија што се користи во mRNA вакцините на Pfizer и BioNTech против ковид-19“. GSK е „подготвен да ги лиценцира овие патенти под комерцијално разумни услови за да обезбеди пристап“ до вакцините.
Европа
(Видео) 19-годишна девојка во Украина се обидела да го продаде синот, барала 23.500 евра
Во украинскиот град Днипро, 19-годишна девојка се обидела да го продаде сопствениот двегодишен син, соопшти локалната полиција, пренесоа украинските медиуми.
Девојката наводно побарала еден милион гривни, што е околу 23.500 евра за своето дете. 19-годишната девојка наводно му го понудила детето на својот познаник и договорила средба со него. Во вторникот полицијата приведе маж додека носел пари на договорена локација.
Девојката наводно рекла дека не сака да се грижи за својот син, па решила да го продаде. Со парите што ги добила планирала да отвори сопствен бизнис.
Детето е земено во полиција и предадено на надлежните органи. Против неговата мајка е подигнато обвинение за трговија со луѓе.
Европа
Уапсени тројца мажи во истрагата за бруталното убиство на Хрват во Даблин
Уапсени се тројца мажи осомничени за убиството на 31-годишен Хрват, Јосип Штрок во Даблин минатиот месец, пишуваат ирските медиуми.
Тие се осомничени дека ги претепале Штрок, кој живеел и работел во Даблин, и неговиот пријател. Штрок почина од повредите на 3 април.
Неговиот пријател за хрватските медиуми изјавил дека биле во продавница и планирале да се дружат, кога група луѓе им кажала да почнат да зборуваат англиски.
„Немате почит кон нашата земја, ова е Ирска…“, изјави тој за Јутарњи. Тие влегле во автобусот и не забележале дека напаѓачите ги следат и биле нападнати одзади.
„Прво ме удрија со нешто, не знам дали беше шипка или палка. Ги прашав полицајците за деталите што ги виделе на видеото, а кои наводно ги имаат“, рече тој, додавајќи дека следното нешто се сеќава е кога се разбудил во болница.