Како што пишува Би-би-си во својата анализа, Пекинг јасно става до знаење дека нема да отстапи пред најновите трговски притисоци на американскиот претседател Доналд Трамп.

Кинеското Министерство за трговија соопшти дека секој нов бран на американски царини ќе предизвика дополнителни кинески контрамерки насочени кон американските стоки. Во писмената изјава тие ја обвинија администрацијата на Трамп за „уцена“, предупредувајќи: „Ако САД истраат на овој пат, Кина ќе се бори до крај“.

Би-Би-Си истакнува дека Кина реагирала особено остро на тврдењето на Трамп дека неговите царини се „реципрочни“, нарекувајќи ги „неосновани“ и „типично еднострано насилничко однесување“.

Анализата заклучува дека е тешко да се поверува дека Трамп навистина очекувал Кина да ги повлече минатонеделните контрамерки само затоа што најавил нови. Освен што ќе го изгуби образот, не се очекува и кинеската влада, која сега отворено го нарекува американскиот претседател насилник, да попушти пред таква личност.

Според Би-би-си, Пекинг, со својот цврст став кон трговскиот хаос поттикнат од Вашингтон, може да смета на поширока политичка поддршка од меѓународната заедница, но и на нови трговски можности надвор од САД кои барем делумно би ги надоместиле загубите на американскиот пазар.

Но, аналитичарите предупредуваат дека ова не е поволен момент за трговска војна. Кинеската економија е под притисок, со слаба домашна потрошувачка, долготрајна криза во секторот на недвижности и висока невработеност кај младите.

Сега Кина се соочува со дополнителен ризик: можен колапс во трговијата со втората по големина економија во светот.

Како што пренесува Би-Би-Си, Комунистичката партија одлучила, и покрај се, да испрати сигурна порака до граѓаните. Во редакцијата во „Пиплс дејли“, официјалниот весник на партијата, се вели: „Кина има храброст и самодоверба да се соочи со последиците… таа е целосно способна да одговори на овој предизвик“.

Американскиот претседател Доналд Трамп синоќа објави дека во петок ќе го има својот годишен преглед во медицинскиот центар Волтер Рид во Мериленд.

„Никогаш не сум се чувствувал подобро, но сепак, мора да се направи!“, напиша 78-годишниот Трамп во објава на платформата Truth Social.

Нов Зеланд нема да ги ревидира своите економски и фискални планови и покрај превирањата на глобалните финансиски пазари предизвикани од тарифните планови на американскиот претседател Доналд Трамп, изјави денеска министерката за финансии Никола Вилис.

Глобалната трговска војна, предизвикана од огромните царини на Трамп, дополнително ескалира вчера – откако тој се закани дека ќе ги зголеми царините за Кина, а Европската унија предложи свои контрацарини – бришејќи трилиони долари во вредност на берзите.

Трамп воведе еднострана царина од 10 отсто за Нов Зеланд, што е најниско ниво на неговите реципрочни царини за целиот увоз во САД. Нов Зеланд рече дека нема да возврати.

Иако трговските политики на Трамп претставуваат ризици, Вилис рече дека нејзината влада презела мерки за ефикасно да се движи во период на несигурност на глобалните финансиски пазари.

„Иако се непожелни, овие ефекти веројатно ќе бидат скромни во споредба со влијанието врз многу други земји“, им рече Вилис на новинарите.

„Имаме доволно отпорност да го издржиме ова и сме во среќна позиција во однос на другите што можеме да се држиме до нашата економска и фискална стратегија“, додаде таа.

САД се вториот најголем пазар во Нов Зеланд по Кина. Минатата година, оваа пацифичка земја испрати околу 12 отсто од својот вкупен извоз во САД, покажуваат официјалните податоци.

Стоките што Нов Зеланд најмногу ги извезува во САД, како што се млечните производи, месото и овошјето, се меѓу најтргуваните стоки во светот, што дава поголема предност за диверзификација на извозните пазари, рече Вилис.