Свет
Израелскиот амбасадор во ЕУ: Нашите врски со земјите во Европа слабеат

Амбасадорот на Израел во Европската Унија, Хаим Регев, денес ги предупреди израелските новинари во Брисел за „дипломатската ерозија“ на односите меѓу Тел Авив и ЕУ, како и за другите предизвици со израелската јавна дипломатија.
„Нема дипломатско цунами, но секако постои дипломатска ерозија со која мора да се справиме“, изјави Регев за новинарите за време на брифингот за медиумите во Брисел, пренесе „Тајмс оф Израел“.
Регев рече дека Министерството за надворешни работи „работи“ и „води многу интензивна дипломатска кампања“, според официјални лица, но призна дека симпатиите кон Израел се намалуваат додека неговата војна со палестинската милитантна група Хамас во Газа се одолговлекува.
ЕУ во вторникот се согласи да го преиспита Договорот за асоцијација со Израел, наведувајќи ги наводните кршења на човековите права во Газа.
„Можам да кажам со прилично висок степен на сигурност дека нема да има консензус за целосно откажување на договорот, дури ни за делумно“, рече Регев.
Тој исто така рече дека „Европа гледа ужасни слики и се бори да се справи со нив“, како и дека Израел повеќе нема поддршка каква што имаше на почетокот на војната.
Регев, исто така, изјави дека, иако не е премногу загрижен за Договорот за асоцијација меѓу ЕУ и Израел, француско-саудиската иницијатива за признавање на палестинска држава за време на конференцијата на Обединетите нации во јуни претставува значаен дипломатски предизвик.
Тој додаде дека израелската армија не ги објавува своите податоци за жртвите од Газа, што ги наведува меѓународните тела да се потпираат на алтернативни извори, како што е Министерството за здравство управувано од Хамас, и нагласи дека враќањето на хуманитарната помош во Газа би можело да ги подобри дипломатските односи, пренесува Танјуг.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Најголемата воена база во Данска ја надлетуваат неидентификувани беспилотни летала

Неидентификувани беспилотни летала синоќа се регистрирани над најголемата воена база во Данска, соопшти данската полиција.
– Можам да потврдам дека во петокот околу 20 часот и 15 минути имавме мал инцидент што траеше неколку часа. Еден или два дрона се забележани пред и над воздухопловната база во Каруп. Не ги соборивме, изјави претставник на данската полиција.
Изминатите денови дронови надлетуваа над цивилни и воени објекти, поради што привремено беше затворен воздушниот простор на Данска.
Премиерката на Данска, Мете Фредериксен претходните инциденти со нарушувањето на воздушниот простор ги поврза со наводни руски активности со дронови низ Европа, но не понуди докази. Москва ги негираше обвинувањата.
Регион
Ужас во Јагодина: Внук ги заклал бабата и дедото и избегал

Двојно убиство се случило во близина на Јагодина. Според првичните информации М.М. (39) ги заклал бабата Р.Ж. (76) и дедото Р.М. (79) и избегал. Неофицијално, убиството се случило во селото Богава, општина Деспотовац, а телата на сопружниците биле пронајдени рано утрово во семејната куќа.
Полицијата е на местото на настанот и во тек е истрага, а пристигнати се и обвинителот на Вишото јавно обвинителство во Јагодина.
Свет
Украина го префрла производството на оружје во земјите од НАТО

Украинската одбранбена индустрија започнува со работа во Данска, обезбедувајќи им на производителите на оружје со седиште во Киев заштита од руски ракети и пренесувајќи го своето воено искуство во Европа.
Данското Министерство за индустрија и финансии претходно овој месец објави дека украинската одбранбена компанија „Фаер Поинт“ преместува дел од своите производствени процеси во таа земја, оценувајќи го тоа како важен чекор за безбедноста на Украина, што во исто време „создава нови можности за соработка со данските и европските компании“.
Тоа е првиот чекор во новата иницијатива наречена „Гради за Украина“, за која Данска издвои повеќе од 50 милиони долари за да им помогне на украинските одбранбени компании да започнат бизнис, објавува „Бизнис инсајдер“.
Проектот им овозможува на украинските компании да произведуваат на поконвенционален начин, наместо да го кријат или нарушуваат процесот на производство за да избегнат да станат мети на руски ракети и беспилотни летала.
За Данска и нејзините сојузници, соработката носи директно искуство на украинските компании во производството на оружје за големата војна. Тоа знаење е непроценливо.
Засега, барем јавно, проектот вклучува само една украинска компанија. Компанијата „Фаер Поинт“, која исто така произведува дронови и ракети, планира да произведува ракетно гориво во Данска за одбранбените потреби на Украина. Останатите украински компании кои произведуваат хаубици, ракети, дронови и друго оружје сè уште го прават тоа во земјата.