Свет
Израел ги пронајде телата на двајцата заложници во Појасот Газа

Израелските власти денес објавија дека телата на двајцата заложници што беа киднапирани во октомври 2023 година се пронајдени во Појасот Газа.
Премиерот Бенјамин Нетанјаху изјави дека останките на Џудит Вајнштајн и Гад Хагај се пронајдени и вратени во Израел во специјална операција на армијата и агенцијата за внатрешна безбедност, „Шин Бет“.
„Заедно со сите граѓани на Израел мојата сопруга и јас изразуваме искрено сочувство до драгите семејства. Срцата нè болат поради најстрашната загуба. Нека биде благословен нивниот спомен“, рече тој во изјавата.
Двојката шетала рано наутро на 7 октомври 2023 година во близина на нивниот дом во кибуцот Нир Оз кога милитантите предводени од Хамас го нападнале јужен Израел. Речиси 1.200 луѓе биле убиени, претежно цивили, а 251 бил киднапиран.
Вајнштајн успеала да се јави во службите за итни случаи и да ги информира дека и таа и нејзиниот сопруг биле застрелани и испратила порака до нејзиното семејство.
Двајцата имаат два сина, две ќерки и седум внуци.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Сијарто: Крајот на војните е можен само преку преговори

Ниеден вооружен конфликт никогаш не завршил на бојното поле, а решение може да се најде само преку дипломатија, поради што медијацијата меѓу завојуваните страни е исклучително важна, изјави денес во Њујорк унгарскиот министер за надворешни работи Петер Сијарто.
За време на состанокот за медијација меѓу завојуваните страни на маргините на Генералното собрание на Обединетите нации во Њујорк, Сијарто истакна дека медијацијата е особено важна за Унгарија, која се соочува со безбедносни предизвици поради војната во соседна Украина, како и поради нелегалната миграција, што е исто така последица од вооружените конфликти, според соопштението за медиумите на министерството, пренесено од МТИ.
„Затоа се залагаме за мир низ целиот свет и ја поддржуваме секоја иницијатива насочена кон постигнување мирно решение. Колку побрзо завојуваните страни седнат на преговарачка маса, толку побрзо ќе има шанса војната да заврши, да се спасат повеќе животи и да се спречи поголемо уништување“, рече Сијарто.
Свет
Трамп: Русите не добија ништо во офанзивата

Претседателот на САД, Доналд Трамп, изјави дека Русија речиси и да нема територијални добивки во неодамнешните напади врз Украина, иако потроши огромни ресурси и претрпе големи загуби.
„Со сите тие тешки бомбардирања во последните две недели, тие речиси и да не добија“, им рече Трамп на новинарите во Белата куќа за време на состанокот со турскиот претседател Реџеп Таип Ердоган.
„Нема да наречам никого хартиен тигар, но Русија потроши милиони и милиони долари на бомби, ракети, муниција и – животи, нивните животи – и тие речиси ништо не добија“, додаде тој.
Изјавите на Трамп ја нагласуваат неговата промена во реториката за војната во Украина. Неговите обиди да посредува меѓу Киев и Москва досега не успеаја, при што Кремљ ги отфрла повиците за прекин на огнот и продолжува со воздушните напади врз украинските градови.
Американскиот претседател, исто така, рече дека е „срамно“ што Русија продолжува да убива толку многу луѓе, додавајќи: „Путин треба да престане“.
Зборувајќи заедно со Ердоган, Трамп рече дека би сакал Турција да престане да купува руска нафта и го повтори своето барање Европа да престане да увезува руска енергија. Тој додаде дека Ердоган може да има „големо влијание“ врз војната бидејќи е почитуван и од Москва и од Киев. Додека Киев и некои европски лидери ја поздравија промената во реториката на Трамп, други ја гледаат како сигнал дека Белата куќа сака да го намали ангажманот и да префрли поголема одговорност за војната на Европа.
Промената доаѓа во време на зголемени тензии меѓу НАТО и Русија, откако сојузниците ја обвинија Москва за повторени упади во нивниот воздушен простор од страна на руски беспилотни летала и авиони. Трамп потоа рече дека земјите од НАТО треба да соборуваат руски авиони што ги кршат нивните граници – што беше дочекано со одобрување од многу членки на алијансата на исток.
Фото: ЕПА
Свет
Мерц: Замрзнатите руски средства треба да се користат за помош на Украина

Германскиот канцелар, Фридрих Мерц, се залага замрзнатите руски средства во Европа да се користат за стекнување средства за одбрана на Украина, објавува „Фајненшл тајмс“.
„Европската унија би можела да ѝ даде на Украина бескаматен заем во износ од 140 милијарди евра, а замрзнатите руски средства во Европа би послужиле како гаранција“, напиша германскиот канцелар Фридрих Мерц (Христијанско-демократска унија ЦДУ) во гостинска статија за „Фајненшл тајмс“.
Како што рече Мерц, Украина ќе го врати заемот само кога Русија ќе ја компензира за штетите предизвикани за време на војната. Така, помошта на ЕУ за Украина би се финансирала со заем, а не со средства од националните буџети како порано, а средствата на Руската централна банка, кои се блокирани во Белгија, би послужиле како депозит.
Во исто време, Мерц нагласи дека е против конфискацијата на рускиот имот бидејќи тоа би било спротивно на меѓународното право.
Мерц рече дека е време Русија да биде принудена на преговарачка маса.
Тој рече дека ќе разговара за оваа тема со колегите од Европската Унија на претстојниот самит во Копенхаген.
Претседателката на Европската комисија – и партиска колешка на Мерц – Урсула фон дер Лајен, исто така, пред две недели рече дека треба да се најде начин за користење на замрзнатите руски средства во Европа за поефикасна одбрана на Украина од руската агресија.
Фото: ЕПА