Свет
Иран: Кина и Русија нè предадоа
Рускиот претседател Владимир Путин изјави дека неоправданите американски напади врз иранските нуклеарни постројки го ставаат светот во голема опасност и вети дека ќе се обиде да им помогне на луѓето од Исламската Република.
Американскиот претседател Доналд Трамп и Израел јавно изнесоа шпекулации за атентатот врз врховниот лидер ајатолахот Али Хамнеи и промената на режимот, чекори за кои Русија се плаши дека би можеле да го втурнат целиот регион во голема војна, анализираат светските медиуми.
Путин денес го прими иранскиот министер за надворешни работи Абас Аракчи во Кремљ, заедно со неговиот министер за надворешни работи Сергеј Лавров, помошникот за надворешна политика на Кремљ Јуриј Ушаков и Игор Костјуков, шеф на руската воена разузнавачка агенција ГРУ.
„Апсолутно неиспровоцираната агресија против Иран нема основа или оправдување“, му рече Путин на Аракчи, додавајќи дека сака да разговара за начините за смирување на кризата.
„Од наша страна, ние вложуваме напори да му помогнеме на иранскиот народ.“
Аракчи требало да му достави на Путин писмо од ајатолахот Хамнеи во кое врховниот лидер бара поголема помош од Русија, изјавил висок извор за Ројтерс. Нема потврда од Москва дека ова се случило.
Иран досега не е импресиониран од руската поддршка, изјавиле ирански извори за Ројтерс, а земјата сака Путин да направи повеќе за да го поддржи против Израел и САД. Иранските претставници велат дека сметаат дека Русија не направила доволно за да го поддржи Техеран и се чувствуваат предадени од големите сили како Русија и Кина. Изворите не објаснија каков вид помош сака Техеран, пренесува медиумот.
Путин, чија војска води војна во Украина, покажа мал интерес за конфликт со САД околу Иран во време кога Трамп се обидува да ги поправи односите со Москва, истакнува Ројтерс. Русија потпиша договор за стратешка соработка со Иран во јануари, но тој договор не вклучуваше клаузула за меѓусебна одбранбена помош.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Израелскиот амбасадор во ОН до специјалната известувачка: „Вие сте вештерка, се обидувате да нѐ проколнете“
Седницата на Третиот комитет на Генералното собрание на Обединетите нации се вжешти откако израелскиот амбасадор во ОН, Дани Данон, остро ја нападна специјалната известувачка Франческа Албанезе поради нејзиниот извештај во кој Израел се обвинува за кршење на човековите права и за меѓународната поддршка што ја добива.
„Госпоѓо Албанезе, секојпат кога се обидувате да го проколнете Израел со лаги и клевети, вашите клетви не успеваат. Вие сте вештерка, а овој извештај е уште една страница во вашата книга на волшепства“, изјави Данон обраќајќи ѝ се преку видео-врска.
Албанезе не можеше лично да присуствува на седницата, бидејќи САД ѝ воведоа санкции и ѝ ја укинаа визата во јули, со образложение дека вршела „нелегитимен притисок врз Меѓународниот кривичен суд“ за постапки против американски и израелски функционери.
Во најновиот извештај, Албанезе остро го критикува Израел, но и обвинува повеќе држави — меѓу нив САД, Велика Британија, Германија и Унгарија — дека се соучесници поради дипломатска или воена поддршка на Израел.
Канада, Австралија и Нов Зеланд се обвинети дека ги „ослабуваат“ резолуциите на ОН што го критикуваат Израел, додека Франција, Италија, Хрватска и Грција се спомнати затоа што му дозволиле на премиерот Бенјамин Нетанјаху да користи нивен воздушен простор и покрај налогот за апсење од Меѓународниот кривичен суд.
Извештајот ги споменува и неколку арапски и муслимански земји, меѓу кои Египет, Јордан, Катар, Саудиска Арабија, Турција, Индонезија, Пакистан и ОАЕ, поради поддршка на мировниот план на Доналд Трамп, кој, според Албанезе, „олеснува нов облик на окупација“.
Свет
Кралот Чарлс му ги одзема титулите на принц Ендру и го сели од кралската резиденција
Британскиот крал Чарлс официјално покрена постапка за одземање на сите титули и почести на принцот Ендру, како и негово селење од резиденцијата „Ројал лоџ“, јави Си-Ен-Ен.
Одлуката уследи по нови реакции во јавноста поради поврзаноста на Ендру со осудениот сексуален преступник Џефри Епштајн и објавувањето на мемоарите на Џуфре, која го обвини принцот за сексуално злоставување додека била тинејџерка, обвинение што тој го негира.
Во соопштение на Бакингемската палата се наведува дека „Неговото Височество денес започна формална постапка за одземање на стилот, титулите и почестите на принц Ендру“ и дека тој отсега ќе биде познат како Ендру Маунтбатен Виндзор.
Палатата потврди дека Ендру ќе мора да се исели од резиденцијаа и да се пресели во приватен престој, додека неговите ќерки, принцезите Евгенија и Беатрис, ги задржуваат своите титули.
Во изјавата се нагласува дека „кралското семејство останува со мислите и најдлабокото сочувство со жртвите и преживеаните на сите облици на злоупотреба“.
Јавноста со остри реакции го коментира случајот, особено по откритијата дека Ендру за резиденцијата платил симболичен износ и плаќал минимална кирија, иако од 2019 година не е активен член на кралското семејство.
Свет
Саграда Фамилија официјално стана највисока црква во светот
Познатата барселонска базилика Саграда Фамилија од денес е и официјално највисоката црква во светот, откако беше поставен новиот дел од централната кула, пренесе „Гардијан“.
Делото на Антонио Гауди сега се издига на 162,91 метар, со што ја надмина катедралата во германскиот Улм, висока 161,53 метра. Во следните месеци се очекува кулата на Исус Христос да ја достигне својата крајна висина од 172 метра.
Темелите на базиликата се поставени во 1882 година, а Гауди починал пред да го види проектот завршен.
Последните децении работите се забрзани благодарение на милионите туристи што ја посетуваат црквата; минатата година ја разгледале 4,9 милиони луѓе, а приходите од билетите целосно се користат за финансирање на изградбата.
Комплетното завршување на Саграда Фамилија се очекува околу 2035 година, а 2026 ќе се одбележи 100-годишнината од смртта на Гауди со низа културни настани.

