Свет
Иран предупреден од Белата куќа за последиците ако одговори на новите израелски напади
Белата куќа соопшти дека вечерашните израелски напади врз Иран треба да ги прекинат директните напади меѓу двете земји, истовремено предупредувајќи го Техеран за последиците доколку одговори.
Висок функционер на Белата куќа рече дека администрацијата верува дека израелската операција треба да ја „затвори директната воена размена“ меѓу Израел и Иран, и оти другите сојузници на САД се согласуваат.
Израел во текот на ноќта нападна воени цели во Иран како одговор на ракетните напади на Техеран претходно овој месец.
Иран соопшти дека неговиот систем за противвоздушна одбрана „успешно се спротивставил на израелските напади врз воени цели во провинциите Техеран, Кузестан и Илам со ограничена штета на некои локации“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Во тајфун на Филипините загинаа повеќе од 80 луѓе, десетици се водат за исчезнати
Бројот на загинати од тајфунот Трами на Филипините, локално познат како тропската бура Кристина, се искачи на 81, јавија локалните медиуми.
Според Националниот совет за управување со катастрофи, досега животот го загубиле 81 лице, 66 се повредени, а 34 се водат за исчезнати во различни региони на земјата, објави порталот „Манила тајмс“.
Најмалку 47 лица загинаа во провинцијата Батангас.
Нова тропска бура позната како Леон или Пагаса исто така се очекува да ја погоди земјата овој викенд. Локалните власти објавија дека околу 24.988 луѓе од различни региони се евакуирани на безбедни места. Филипините вчера наредија целосна мобилизација на своите вооружени сили бидејќи бурата Трами ги преплави градовите.
Тропската бура Трами, локално позната како Кристине, силно ја погоди архипелагот во Југоисточна Азија со обилни врнежи и силен ветер.
Регионите јужно од главниот град Манила претрпеа големи штети додека невремето се пресели низ западните Филипини кон Јужното Кинеско Море.
Свет
Тројца мажи загинаа во судир на два авиони во Австралија
Тојца мажи загинаа откако два лесни авиони денеска се судрија во воздух и се урнаа во шумска област југозападно од Сиднеј, јавува „Анадолија“.
Австралиската полиција, пожарникари и екипи на Итната помош пристигнаа пеш на местото на несреќата, 88 километри југозападно од Сиднеј.
Вршителот на должноста началник на полицијата во Нов Јужен Велс, Тимоти Калман, потврди дека авион „цесна 182“ со две лица се судрил со ултралесен авион од блискиот аеродром во кој имало маж.
Причината за несреќата ќе ја истражува Австралиското биро за безбедност на транспортот.
Свет
Живот после напад
Жителите на Техеран денеска се занимаваа со секојдневните работи и покрај ноќните напади на израелската армија недалеку од иранската престолнина.
„Тоа не беше вистински напад“, рече Мусави, 57-годишен продавач на шафран во луксузна област во северен Техеран, пиејќи чај. Тој им кажа на новинарите за неговата 28-месечна служба во иранската армија за време на иранско-ирачката војна која траеше од 1980 до 1988 година.
„Не се плашиме од голема војна, но Иран во секој случај реагира“, вели Мусави.
Израел изврши серија прецизни напади врз воени цели, вклучително и капацитети за производство на ракети, ракетни системи земја-воздух и системи за противвоздушна одбрана, објави израелската армија.
Нападите се сметаат за реакција на иранскиот напад врз Израел на 1 октомври, кога врз еврејската држава беа истрелани речиси 200 балистички проектили.
Училиштата во Техеран денеска останаа отворени, а воздушниот сообраќај се одвива вообичаено. Иронично, иранската валута, ријалот, по неколкунеделен пад се зголеми во однос на еврото, пренесе „Индекс“.
Иранските државни медиуми тврдат дека израелските борбени авиони не успеале да навлезат во иранскиот воздушен простор и дека штетата била минимална.
Израел го послуша советот на Соединетите Држави да не го бомбардира иранскиот нафтен сектор или нуклеарните постројки, рече аналитичарот тесно поврзан со елитната иранска Исламска револуционерна гарда (ИРГЦ).
Тој додаде дека треба да се забележи дека иранскиот министер за надворешни работи Абас Арагчи претходно овој месец за време на турнејата низ земјите од Блискиот Исток изјави дека Иран не се стреми да ескалира конфликтот.
Сепак, конечната одлука нема да ја донесе владата, туку врховниот водач Али Хамнеи и ИРГЦ.
Иранското општество е навикнато на кризи и тешки економски околности. Многу жители на Техеран денеска, како и обично, вежбаат во градските паркови и покрај нападите. Некои слушнале за нив дури потоа.
„Воопшто не го забележав нападот синоќа“, рече 20-годишниот студент по архитектура, додавајќи дека не се плаши од „напад од Израел, бидејќи знае дека нивните цели се воени и не се насочени кон населението.