Европа
Истражување: Европејците со намалена доверба во вакцината на „Астразенека“

Довербата на Европејците во вакцината на „Астразенека“ oпаѓа откако неколку земји пријавија несакани ефекти, како што се згрутчување на крвта, иако научни студии утврдија дека вакцината е безбедна и ефикасна, покажува истражување на јавното мислење.
Така, зголемен е бројот на Французи, Германци, Италијанци и Шпанци кои сметаат дека вакцината е небезбедна, иако тоа не влијаело на довербата во другите вакцини, односно на „Фајзер“ и „Модерна“, покажува истражувањето спроведено од Институтот за истражување на јавното мислење „Југов“ (YouGov). Истражувањето опфатило околу 8.000 луѓе во седум европски земји, а било спроведено меѓу 12 и 18 март.
61 процент од Французите сметаат дека вакцината не е безбедна, 18 проценти повеќе отколку во февруари, а истото го мислат и околу 55 проценти од Германците или 15 проценти повеќе во споредба со минатиот месец.
Во Италија и Шпанија повеќето луѓе сметале дека вакцината од „Астразенека“ е безбедна, 54 и 59 проценти, но тие стапки во последното истражување опаднале на 36 и 38 проценти, наведува „Југов“.
Само во Велика Британија довербата во вакцината е стабилна, покажа истражувањето. Мнозинството од испитаниците, 77 проценти, сè уште велат дека вакцината е безбедна, во споредба со 79 проценти кои имаат доверба во вакцината на „Фајзер“.
Европската агенција за лекови (ЕМА) ги испита извештаите за невообичаените крвни нарушувања кај примателите на вакцината од „Астразенека“ и минатата недела објави дека придобивките од вакцината ги надминуваат ризиците и препорача и натаму да продолжи нејзината употреба.
Во текот на март голем број европски земји, вклучувајќи ги Франција, Германија и Италија, престанаа да ја користат вакцината откако Данска и Норвешка пријавија изолирани случаи на крвавење, згрутчување на крвта и низок број на тромбоцити.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Полицијата го идентификуваше напаѓачот во Манчестер: уште тројца уапсени

Полицијата за борба против тероризмот потврди дека напаѓачот во утринскиот напад врз синагогата во Манчестер е 35-годишниот Џихад ал Шами, британски државјанин од сириско потекло.
„Врз основа на она што го знаеме во моментов, нашите евиденции не укажуваат на какви било претходни антитерористички истраги во врска со ова лице“, соопшти полицијата.
Тие додадоа дека три лица – двајца мажи на возраст од 30 години и една жена на возраст од 60 години – се уапсени и се приведени под сомнение за извршување, подготовка и поттикнување терористички акти.
Двајца мртви на местото на настанот, тројца тешко повредени
Полицијата потврди дека двајца мажи се прогласени за мртви на местото на нападот, додека тројца други мажи се во болница со сериозни повреди. Еден од нив претрпел убодна рана, друг бил удрен од автомобил вклучен во нападот, а трет подоцна сам отишол во болница со повреда за која се сомнева дека ја здобил додека полицијата го запирала напаѓачот.
Европа
(Видео) Орбан: Посилни сме од Русија; Туск: Ми се допаѓа кога ги користи моите аргументи

Унгарскиот премиер Виктор Орбан повтори дека Европската Унија не треба да се плаши од Русија бидејќи е посилна од неа во однос на капацитетите. „Вистинската опасност е економската стагнација и губењето на конкурентноста“, рече Орбан.
Додека полскиот премиер Доналд Туск разговараше со група полски новинари на маргините на состанокот на Европската политичка заедница во Копенхаген, еден од нив реши да му постави прашање на Орбан, кој беше во близина и даваше коментари на унгарските новинари.
„Кој претставува главна закана за Европа“, извика новинарот, очекувајќи коментар од унгарскиот политичар.
Туск потоа му рече на Орбан: „Ова е провокација“.
Сепак, Орбан остана смирен и му одговори на новинарот: „Вистинската опасност? Економска стагнација и губење на конкурентноста“.
„Не Русија?“, праша потоа полскиот новинар.
😅Best dialogue at the Copenhagen summit!
– Orban: “We all spend more on armaments than Russia, so why are we afraid? We are stronger than them.”
– Tusk (tugging Orban by the sleeve): “I love it when he uses my arguments.” pic.twitter.com/7YF9Hs3Wfs
— NEXTA (@nexta_tv) October 2, 2025
„Ние сме посилни од Русија. Направете некои споредби и засновајте го вашето мислење на факти. Имаме повеќе од 400 милиони луѓе, а Русија има околу 130. Погледнете го европскиот БДП, толку е голем. Русија е толку мала. Сè заедно, 27 земји, трошиме повеќе за војската отколку Русите. Па зошто се плашиме? Ние сме посилни од нив“, нагласи Орбан.
„Ми се допаѓа кога ги користи моите аргументи“, се вмеша Туск. Орбан додаде дека европските земји мора „да се обединат и заедно да ги бранат своите интереси“.
Пред неколку дена, Орбан изјави дека Русија „веќе ја добила“ војната против Украина, иако е воено и економски слаба. Орбан, исто така, рече дека руските беспилотни летала ќе бидат соборени ако влезат во унгарскиот воздушен простор.
Европа
(Видео) Путин: Ако сме „хартиен тигар“ и напредуваме, тогаш што е НАТО?

Рускиот претседател Владимир Путин го критикуваше американскиот претседател Доналд Трамп за тоа што ја нарече Русија „хартиен тигар“ и рече дека Москва брзо ќе одговори ако смета дека Европа ја провоцира.
Трамп, кој претходно изјави дека Киев треба да се откаже од територија за да се стави крај на војната, минатата недела ја промени својата реторика, велејќи дека Украина може да ја врати целата територија што Русија ја зазеде и опишувајќи ја Русија како „хартиен тигар“. Тој го повтори тоа оваа недела.
„Руските сили напредуваат по целата фронтова линија во Украина“
Путин, зборувајќи на состанокот на клубот Валдај во Сочи на Црното Море, рече дека руските сили напредуваат по целата фронтова линија во Украина и дека речиси целиот НАТО, предводен од САД, сега се бори против Русија.
„Хартиен тигар. Што е следно? Ајде да се позанимаваме со тој хартиен тигар“, рече Путин. „Значи, ако се бориме против целиот НАТО, се движиме, напредуваме и сме самоуверени, и сме ‘хартиен тигар’, тогаш што е НАТО?“
„Ако некој сè уште сака да се натпреварува со нас во воената сфера, како што велиме, слободно, нека се обиде“, рече тој. „Руските контрамерки нема да чекаат долго.“