Свет
Казахстанскиот претседател со наредба до војската да пука без предупредување

Казахстанскиот претседател Касим-Џомарт Токаев изјави дека им наредил на безбедносните сили да пукаат без предупредување, јави Би-би-си.
Тоа е реакција на протестите кои неодамна избија во Алмати, најголемиот град во земјата, поради поскапувањето на енергенсите.
Би-би-си наведува дека и натаму се слушаат истрели во близина на главниот плоштад во Алмати.
Токаев додаде дека „20.000 бандити го нападнале главниот град“ и демонстрантите ги нарече „терористи“, иако не постојат докази за тоа.
Министерството за внатрешни работи на Казахстан соопшти дека во протестите биле убиени 26 „вооружени криминалци“ и 18 припадници на безбедносните сили.
Претседателот во обраќањето до јавноста отфрли секаква можност за преговарање со демонстрантите. „Какви преговори може да се водат со криминалци и убијци?“, запраша тој.
„Мораме да се справиме со вооружени и добро опремени бандити, локални и од надвор. Да бидам попрецизен, тоа се терористи. Мораме да ги уништиме и тоа ќе биде сторено брзо“, нагласи Токаев додавајќи дека мировни сили од Русија и соседните земји се дојдени во Казахстан привремено и на негово барање со цел да се обезбеди мирот.
Вакво насилство е невидено во земјата со која од советско време цврсто владее лидерот Нурсултан Назарбаев, чии политики продолжија и покрај тоа што се повлече од претседателската функција пред три години, со Токаев како негов наследник.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Поради гладување 90.000 жени и деца итно имаат потреба од медицинска интервенција во Газа

Секој трет жител на Појасот Газа со денови не добива храна, предупреди Светската програма за храна (WFP) на Обединетите нации. Во последното соопштение се наведува дека 90.000 жени и деца итно имаат потреба од медицинска интервенција поради тешка неухранетост.
Според Министерството за здравство во Газа, само вчера починале уште девет лица од глад, со што бројот на жртви од неухранетост од почетокот на конфликтот достигна 122.
Израел, кој го контролира влезот на сите залихи во Газа, повторува дека не постои блокада и ја обвинува Хамас за лошата распределба на ресурсите.
Меѓународната заедница, вклучувајќи ги Германија, Франција и Велика Британија, побара итно олеснување на влезот на помошта, а генералниот секретар на ОН Антонио Гутереш остро ја осуди „рамнодушноста и недостигот на човечност“ во глобалниот одговор на кризата.
Регион
Големи пожари беснеат на најмалку пет различни локација во Грција

Во источниот дел на областа Атика, поширокиот регоион на Атина, во северна Грција, на островите Евија и Китира, како и во јужниот дел на Пелопонез, попладнево се активни големи пожари, а од бројот 112 за итни случаи беа испратени низа пораки до жителите на зафатените области.
Во пожарот во централна Евија, изгореа две противпожарни возило, а четворица пожарникари со полесни повреди на рацете и очите и со респираторни проблеми биле префрлени во болница.
Во сите пожари, беа превентивно евакуирани жителите на населените места во непосредна близина на огнената стихија, откако од бројот 112 за итни случаи беа испратени соодветни пораки.
За Атика, Евија и за дел од Пелопонез за денеска имаше предупредување за екстремно голема опасност од пожари, категорија пет, што воедно е и највисоката категорија во прогнозите за опасност од пожари на Министерството за цивилна заштита и климатски кризи на Грција.
Свет
Најмалку 25 лица загинаа во текот на ноќта во нови напади на израелската армија врз Појасот Газа

Најмалку 25 лица загинаа во текот на ноќта во нови напади на израелската армија врз Појасот Газа, во време кога мировните преговори се во застој.
Според здравствени извори, голем дел од жртвите се убиени додека чекале хуманитарна помош во близина на граничниот премин Зиким со Израел. Меѓу загинатите има и четири лица од иста семејна зграда во градот Газа.
Организацијата на Обединетите нации предупреди на ризик од масовна глад во енклавата, и покрај тврдењата на Израел дека не ги блокира доставите на помош. Според ОН, големиот дел од помошта не може да стигне до населението поради воени блокади и грабежи.
Преговорите за прекин на огнот меѓу Израел и Хамас се прекинати, откако американските и израелските преговарачи се повлекоа од Катар. Израелскиот премиер Бенјамин Нетанјаху најави дека се разгледуваат „алтернативни опции“, додека Хамас смета дека повлекувањето било тактика на притисок.