Свет
Како реагираше светот на офанзивата на Хамас врз Израел
![](https://makfax.com.mk/wp-content/uploads/2023/10/napad-izrael-EPA.jpg)
Обединетите Нации повикаа на итен прекин на насилството во Газа, од каде што исламистичкото движење Хамас го изврши најголемиот напад врз Израел досега со најмалку 40 мртви, а нападите ги осудија ЕУ, западните лидери и Украина. Од друга страна, Русија и Арапскиот свет повикуваат на воздржаност, додека групите и државите блиски до Хамас ги поздравуваат.
Високиот комесар за човекови права на Обединетите нации, Волкер Туерк, беше шокиран од извештаите за илјадниците ракети истрелани врз Израел утрово и извештаите за држење на израелски цивили како заложници.
Најмалку 22 Израелци загинаа, а стотици се ранети во нападот на Хамас, според официјалните податоци.
„Цивилите никогаш не смеат да бидат цел“, рече Туерк, повикувајќи го Израел да преземе мерки за да избегне цивилни жртви во неговите воздушни напади врз Газа како одговор на нападот на Хамас.
„Повикувам на итен прекин на насилството и сите страни и клучните земји во регионот да се деескалираат за да се избегне понатамошно крвопролевање“, рече Туерк.
Портпаролот на Советот за национална безбедност на Белата куќа изјави дека САД „недвосмислено ги осудуваат“ нападите на палестинската исламистичка група Хамас врз израелските цивили и силно ја поддржуваат владата и народот на Израел, објави „Си-Ен-Ен“.
Советникот за национална безбедност на Белата куќа Џејк Саливан разговарал со неговиот израелски колега Цачи Ханегби и најави дека ќе остане во близок контакт со него.
Европската унија и бројните европски престолнини „најостро ги осудија“ нападите во зори врз Израел и нагласија дека Израел има право да се брани.
Русија повика на „воздржаност“, а Турција да се избегне ескалација.
Претседателката на Европската комисија, Урсула фон дер Лајен, јасно ги осуди нападите, кои таа ги нарекува тероризам и рече дека Израел има право да се брани.
„Европската унија изразува солидарност во овие тешки моменти“, изјави шефот на европската дипломатија, Жозеп Борел и нагласи дека тероризмот и насилството не решаваат ништо. Нападите ги осуди и претседателот на Европскиот совет, Шарл Мишел.
Русија ги повикува палестинската и израелската страна на итен прекин на огнот, на откажување од насилството и на неопходно воздржување, изјави портпаролката на руската дипломатија Марија Захарова.
Во саботата, украинскиот претседател Володимир Зеленски го осуди терористичкиот напад врз Израел и рече дека не смее да има сомнеж дека земјата има право да се брани.
Зборови на осуда упатија францускиот претседател Емануел Макрон, британскиот премиер Риши Сунак, шефицата на германската дипломатија Аналена Баербок и официјален Рим, кои порачаа дека Израел има право да се брани.
Шпанскиот министер за надворешни работи беше шокиран од, како што рече, исклучително сериозните терористички напади.
Нападот е апсолутно осуден од Холандија, рече премиерот Марк Руте, кој му се јави на својот израелски колега Бенјамин Нетанјаху.
Нападите најостро ги осудија Полска, Чешка, Хрватска, Грција и Албанија.
Арапскиот и муслиманскиот свет
Турскиот претседател Реџеп Таип Ердоган ги повика Израелците и Палестинците да „дејствуваат разумно“ и „да се воздржат од импулсивни акции, кои само ќе ги зголемат тензиите“.
Министерството за надворешни работи на Саудиска Арабија во саботата повика на „итен прекин на насилството меѓу Израел и Палестинците“, објави државната новинска агенција.
„Го следиме невидениот развој на настаните меѓу голем број палестински фракции и израелските окупаторски сили, што доведе до високо ниво на насилство на многу фронтови“, соопшти саудиското Министерство за надворешни работи.
Оман повикува и на максимална воздржаност, пренесува официјалната агенција. Оман ја повикува меѓународната заедница „итно да интервенира за да се запре ескалацијата и повторно да се воспостави владеење на меѓународното право“.
Друга земја од Персискиот залив, Катар, го обвини Израел за ескалацијата и повика на воздржаност. Министерството за надворешни работи на Катар ја повика меѓународната заедница да го спречи Израел да користи такви напади како изговор за да започне непропорционална војна против палестинските цивили во Газа.
Поддршка за Хамас
Воениот советник на врховниот лидер на Иран, ајатолахот Али Хамнеи, ја поздрави, како што рече, храбрата офанзива на Хамас против Израел.
„Ја поддржуваме оваа храбра операција и сигурни сме дека и фронтот на отпорот ја поддржува“, рече генералот на елитната воена формација на Револуционерната гарда Јахја Рахим-Савахи.
Проиранското шиитско движење Хезболах од Либан, кое има силно вооружено крило, го пофали и му честиташе на Хамас.
„Хезболах му честита на палестинскиот народ и неговите сојузници на јуначката и победничка операција“, се наведува во соопштението.
Дополнително, Хезболах наведува дека „командата на исламскиот отпор во Либан (…) одржува директен контакт со командата на палестинскиот отпор во земјата и во странство и постојано ги оценува настаните и текот на операциите“.
„Оската на отпорот“ е термин кој се користи за означување на палестинските, либанските, сириските и други движења кои се блиски до Иран и се противници на Израел.
„Тоа е и порака до арапскиот и муслиманскиот свет (…) особено до оние кои се залагаат за нормализација на односите со Израел“, рече Хезболах.
Обединетите Арапски Емирати (ОАЕ) и Бахреин го потпишаа Аврамскиот договор со Израел за нормализација на односите со посредство на поранешниот американски претседател Доналд Трамп.
Министерството за надворешни работи на ОАЕ повика на „максимална воздржаност и итен прекин на огнот за да се избегнат сериозни последици“.
Мароко и Судан исто така ги прекинаа непријателствата со Израел, а Саудиска Арабија преговара со Израел за започнување на процесот на нормализирање на односите.
Самех Шукри, министерот за надворешни работи на Египет, кој има дипломатски односи со Израел, разговараше со шефот на европската дипломатија, Жозеп Борел, за „сериозната ескалација на палестинско-израелско ниво“, изјави во саботата портпаролот на Министерството.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Европа
Барселона планира да забрани изнајмување станови на туристи
![](https://makfax.com.mk/wp-content/uploads/2021/05/barselona-turisti.jpeg)
Барселона денеска објави дека до 2028 година ќе го забрани издавањето станови на туристи, со што сака да го спречи растот на трошоците за домување и да им овозможи на граѓаните да живеат во свој град.
Левичарскиот градоначалник на градот, Жауме Колбони, рече дека до ноември 2028 година, Барселона ќе ги одземе лиценците на 10.101 станови кои моментално се лиценцирани за краткорочно изнајмување.
„Се справуваме со она што го сметаме за најголем проблем на Барселона“, рече Колбони на настанот на градската влада.
Краткорочниот бум на изнајмување во Барселона, најпосетуваниот град во Шпанија, остави некои граѓани да не можат да си дозволат кирија откако кириите се зголемија за 68 отсто, а цените на недвижниот имот за 38 отсто во изминатите 10 години, рече тој. Пристапот до домување стана двигател на нееднаквоста, особено за младите луѓе, додаде тој.
Во последните десет години, локалните власти воведоа ограничувања за краткорочно изнајмување на Канарските Острови, Лисабон и Берлин.
Социјалистичката министерка за домување на Шпанија, Изабел Родригез, рече дека ја поддржува одлуката.
„Станува збор за правење сè што е потребно за да се гарантира пристап до прифатливи станови“, објави таа на Икс.
Airbnb, платформата за изнајмување станови, не одговори на барањето за коментар.
„Колбони прави грешка што ќе доведе до сиромаштија и невработеност“, соопшти асоцијацијата за изнајмување на туристички станови во Барселона АПАРТУР, додавајќи дека забраната ќе доведе до зголемување на нелегалните изнајмувања на станови.
Одлуката ќе биде од корист за хотелите. Екстремно левичарската партија која владееше со Барселона од 2015 до 2023 година забрани отворање на нови хотели во најпопуларните области во градот, но Колбони навести дека може да ги ублажи ограничувањата.
Од хотелската асоцијација на Барселона не сакаа да ја коментираат веста.
Тие 10.000 станови ќе ги користат граѓаните или ќе завршат на пазарот под кирија или продажба“, рече градоначалникот.
Локалните власти најавија строги инспекции кога забраната ќе стапи на сила.
Во последниве години во Барселона не беше дозволена регистрација на нови туристички апартмани. Од 2016 година локалната власт нареди затворање на 9.700 диви туристички станови и речиси 3.500 станови повторно ги користат граѓаните за домување.
Европа
Русија: Треба да разговараме со САД, глобалната безбедност е загрозена, проблемите растат
![](https://makfax.com.mk/wp-content/uploads/2024/06/putin4-1.jpg)
Русија гледа итна потреба од безбедносни разговори со Соединетите Американски Држави, но тие мора да бидат сеопфатни и да го вклучуваат прашањето за Украина, соопшти денеска Кремљ. „Невозможно е да се извлечат поединечни делови од општиот комплекс на акумулирани проблеми, а ние нема да го сториме тоа“, рече портпаролот на Кремљ, Дмитриј Песков, на прашањето дали Москва е подготвена да разговара со Вашингтон за нуклеарните ризици.
„Отворени сме за дијалог, но за широк, сеопфатен дијалог кој ги опфаќа сите димензии, вклучително и сегашната димензија поврзана со конфликтот околу Украина, поврзана со директното учество на САД во овој конфликт“, рече Песков за новинарите. САД ги отфрлаат руските тврдења дека со вооружувањето на Украина станаа директен учесник во војната чија цел е да и се нанесе „стратешки пораз“ на Москва. Вашингтон вели дека какви било преговори за војната се во јурисдикција на Украина.
Руската позиција, како што ја претстави Песков, не е ништо ново, потсетува Ројтерс. Сепак, тој им рече на новинарите дека списокот на теми за кои Русија и САД треба да разговараат се зголемува. „Сè на сè, овој дијалог е многу неопходен. Неопходен е затоа што проблемите се натрупуваат, а има и многу тешкотии поврзани со глобалната безбедносна архитектура“, рече Песков.
Од перспектива на Вашингтон, рускиот претседател Владимир Путин, кој веќе трета година води војна во Украина, е одговорен за умножувањето на безбедносните проблеми.
Оваа недела Путин ја посети Северна Кореја, единствената земја која тестираше нуклеарно оружје во 21 век, и потпиша договор за заемна одбрана со нејзиниот лидер Ким Џонг Ун и рече дека можеби ќе му испрати руско оружје на Пјонгјанг како одговор на западното вооружување на Украина. .
Путин, исто така, во вторникот повтори дека размислува да ја ревидира руската доктрина за употреба на нуклеарно оружје. Најновиот договор за контрола на вооружувањето, кој го ограничува бројот на стратешки нуклеарни боеви глави што Русија и САД можат да ги распоредат, истекува во 2026 година.
Регион
(Видео) 11 загинати во пожари во Турција, и Грција се бори со огнот
![](https://makfax.com.mk/wp-content/uploads/2024/06/pozar-grcija.jpg)
Најмалку единаесет лица загинаа, а десетици се повредени во пожар со ниска вегетација што ветрот го прошири во неколку села на југоистокот на Турција, одземајќи животи на стотици животни, а со пожарите денеска се бори и Грција. Турскиот министер за здравство Фахретин Коча објави „единаесет смртни случаи и 78 повредени лица“, од кои пет морале да бидат примени на интензивна нега.
Коча претходно рече дека има „44 повредени, од кои десет лица во тешка состојба“, во оваа рурална област лоцирана меѓу градовите Дијарбекир и Мардин, во близина на сириската граница. На социјалните мрежи масовно се споделуваат фотографии од десетици кози, овци и магариња кои лежат во изгорената трева во претежно земјоделскиот и сточарскиот регион.
Според министерот за внатрешни работи Али Јерликаја, пожарот избувнал доцна во четвртокот поради палење на стрништа во област лоцирана на околу триесетина километри јужно од градот Дијарбакир, каде што термометарот преку ден се искачува над 40 степени. Пламените јазици се проширија со ветрот и брзо зафатија пет села.
Пожарот е ставен под контрола во текот на ноќта, но службите и денеска се на терен поради страв од повторно разгорување на пожарот, вели министерот.
И Грција во петокот се бори со неколку шумски пожари во јужниот дел на нејзиното копно, поттикнати од бурните ветрови. Десетици пожарникари со помош на осум авиони беа распоредени во регионите Ахаја и Илија и во близина на градот Краниди на полуостровот Пелопонез. На жителите на неколку села во овие области им било кажано да ги напуштат своите домови.
Шумските пожари се вообичаени во оваа медитеранска земја, но стануваат поразорни бидејќи летата стануваат потопли и суви, што научниците го поврзуваат со климатските промени.
„Брзината на ветерот често надминува 95 километри на час, што го спречува леталото да се приближи“, рече портпаролот на грчката противпожарна бригада Василис Ватракоганис на брифинг со новинарите.
„Сите сили за цивилна заштита денеска се во подготвеност“, додаде тој, бидејќи за неколку часа во земјата избувнаа околу 45 шумски пожари. Уште еден шумски пожар што накратко им се закануваше на домовите во крајбрежен град во близина на Атина беше ставен под контрола рано денеска, соопштија пожарникарите.