Свет
Канада почна со процесот за екстрадиција на директорката на „Хуавеј“
Канадското министерство за правда го почна процесот за екстрадиција во САД на Менг Ванжу, финансиска директорка на компанијата „Хуавеј“, која на 1 декември лани беше уапсена во Ванкувер, на барање на американските власти.
„Еден месец откако американското правосудство го објави обвинението против ‘Хуавеј’ и против директорката, канадското министерство издаде налог со што официјално почнува процесот на екстрадиција на Менг на САД“, соопшти канадската влада.
САД ја обвинија компанијата „Хуавеј“ и Менг дека не ги почитувале американските санкции за Иран, но и дека преку две подружници украле индустриска тајна на американската телекомуникациска компанија „Т-мобиле“.
Адвокатите на Менг оцениле дека обвинувањата од САД се политички мотивирани.
„Нашата клиентка тврди дека е невина и дека американскиот судски процес за екстрадиција е злоупотреба на процесното право“, навеле тие.
Канада претходно го одби барањето на Кина за ослободување на Менг.
Менг, која е ќерка на основачот на „Хуавеј“, беше ослободена со кауција на средината на декември во Ванкувер каде што има две резиденции.
Односите меѓу Кина и Канада се заладија по нејзиното апсење. Кина како одговор уапси двајца канадски државјани, а еден осуди на смртна казна поради шверц на дрога.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Поранешната противничка на Трамп: Ќе гласам за Трамп, Бајден е катастрофа
Поранешната американска амбасадорка во Обединетите нации, Ники Хејли, денеска објави дека републиканскиот кандидат Доналд Трамп може да смета на нејзиниот глас на претседателските избори во ноември.
Хејли на настан во Вашингтон рече дека не секогаш политички се согласува со Трамп.
„Но (американскиот претседател Џо) Бајден беше катастрофа и јас ќе гласам за Трамп“, рече таа.
Поранешниот американски амбасадор во ОН се откажа од трката за номинација на Републиканската партија во март и првично не сакаше да го поддржи Трамп. Хејли рече дека Трамп не треба да претпоставува дека ја има поддршката од нејзините гласачи, без оглед на нејзината лична одлука.
„Трамп би било мудро да допре до милионите луѓе што гласаа за мене и продолжуваат да ме поддржуваат, а не да претпоставува дека тие, едноставно, ќе застанат покрај него“, предупреди денеска Хејли.
Изборите во САД на 5 ноември ќе бидат реванш меѓу Трамп и Бајден, кои немаат вистинска конкуренција во нивните партии.
Регион
ОН гласаат за резолуцијата за геноцидот во Сребреница; Вучиќ: Морам да бидам таму
Попладнево во Њујорк, Генералното собрание на ОН треба да гласа за предложената резолуција со која се бара прогласување на 11 јули за меѓународен ден на сеќавање на геноцидот во Сребреница.
Србија силно се спротивставува на ова и почна голема дипломатска офанзива против резолуцијата.
Десетина земји се очекува да гласаат против резолуцијата, а неколку десетици членки на ОН се воздржани од гласање поради српската дипломатска офанзива, особено меѓу неврзаните земји, според дипломатски извори, пренесува словенечката новинска агенција СТА.
Предлогот за резолуција за едно од најголемите злосторства во Европа по Втората светска војна, меѓу другото, го осудува негирањето на геноцидот и глорификацијата на осудените за воени злосторства.
Србија и Република Српска, во која доминираат босанските Срби, постојано негираа дека се случил геноцид во Сребреница.
Резолуцијата ја предложија Германија и Руанда. Текстот беше спонзориран од уште 34 земји вклучувајќи ги сите поранешни југословенски републики, освен Србија и Црна Гора.
Во средата Собранието на Република Српска усвои соопштение во кое протестира против резолуцијата, а претседателот на тој ентитет, Милорад Додик, на мрежата „Икс“ напиша дека усвојувањето на резолуцијата ќе предизвика непоправлива штета, што ќе значи крај на Босна и Херцеговина.
Тој се заканува дека Република Српска ќе се одвои од Босна доколку резолуцијата биде усвоена.
Српскиот претседател Александар Вучиќ, со благослов на патријархот на СПЦ, пред гласањето отиде во Њујорк, каде што продолжува да лобира против резолуцијата, објави Радио Слободна Европа.
„Ќе одам во Њујорк затоа што некој треба да им даде одговор на оние што сакаат да ја обвинат Србија дека е геноцидна нација“, рече Вучиќ минатата недела.
Европа
Уапсен заменикот на моќниот генерал на Путин
Генерал-полковник Вадим Шамарин, началник на Главната управа за комуникации и заменик-началник на Генералштабот на вооружените сили на Валериј Герасимов, е уапсен во Русија. Тој е осомничен за примање поткуп од големи размери, пренесоа руските медиуми.
„Комерсант“ пишува дека куќата на Шамарин била претресена, а потоа бил одведен на распит. Ова е четврто апсење висок функционер во руската одбрана од април кога заменик-министерот за одбрана, Тимур Иванов, беше ставен во истражен затвор поради сомнение за примање поткуп.
Оттогаш уапсени се и генерал-полковник Јуриј Кузњецов, началник на Генералштабот во Министерството за одбрана, и генерал-мајор Иван Попов, поранешен командант на руската 58. армија. Низата апсења доаѓаат во време на големи промени во одбранбениот естаблишмент на Русија откако претседателот Владимир Путин го разреши Сергеј Шојгу од функцијата министер претходно овој месец заменувајќи го со Андреј Белоусов.
Инаку, во 2020 година беше уапсен Халил Арсланов, претходникот на Шамарин на позицијата началник на Главната управа за комуникации. Тогаш Арсланов беше обвинет за проневера на 6,7 милијарди рубли. Стануваше збор за набавка на телекомуникациска опрема по напумпани цени.