Свет
Канцеларот Шолц го разреши министерот за финансии, Линднер, ФДП стави крај на владејачката коалиција

Германската Слободна демократска партија (ФДП) ќе ги повлече сите свои министри од германската влада, откако канцеларот Олаф Шолц во средата го разреши министерот за финансии на партијата Кристијан Линднер.
Со ова, според германските медиуми, ФДП става крај на владејачката коалиција.
Шолц најави дека на 15 јануари во Бундестагот ќе побара гласање за доверба на владата и додаде дека нови избори би можеле да се одржат најдоцна до крајот на март 2025 година.
Спопред светските медиуми, Германија влегува во период на политичка неизвесност откако нејзината кревка трипартиска владејачка коалиција се распадна истиот ден кога Доналд Трамп победи на американските избори. Канцеларот Олаф Шолц, кој најави гласање за доверба во јануари, по кои најверојатно ќе следуваат предвремени избори во март, ќе се обиде да ги увери своите европски партнери на самитот во Будимпешта, стои во написите.
Шолц доцна вчера изјави дека ќе се обрати до конзервативниот опозициски лидер Фридрих Мерц, кој води во анкетите, за поддршка во усвојувањето на клучните економски и одбранбени закони. Крајот на неговата поделена трипартиска коалиција, која го лишува од владејачкото мнозинство, не може да дојде во полош момент за најголемата европска економија, која ќе се намалува втора година по ред, пишува француската новинска агенција АФП.
„Праниот крај на коалицијата ја остава Германија донекаде без кормило во она што може да биде исклучително турбулентно време веднаш откако Доналд Трамп победи на изборите во САД“, напиша аналитичарот на банката Беренберг, Холгер Шмидинг.
Но, Шмидинг рече дека предвремените избори и новото раководство на почетокот на 2025 година на крајот би можеле да помогнат бидејќи „постојаните внатрешни борби во рамките на сега веќе непостоечката трипартиска коалиција се претворија во голема пречка за растот“.
„Не можеме да си дозволиме да се расправаме уште една година. Германија е важна во Европа и ако владата не може да го исполни тоа, тогаш мора веднаш да направи простор“, рече пратеникот на ЦДУ Норберт Ротген по победата на Трамп и пред колапсот на коалициите.
Вчера лидерот на ЦСУ во јужната покраина Баварија, повика на итно гласање за доверба, предупредувајќи дека „не смее да има тактички одложувања“. Неодамнешните анкети даваат поддршка на сојузот ЦДУ/ЦСУ околу 32 отсто – повеќе од вкупната досегашна владејачка коалиција – СПД со 16 отсто, Зелените со 11 отсто и ФДП со само околу четири отсто, пренесуваат медиумите.
Екстремно десничарската Алтернатива за Германија (AfD) неодамна освои близу 20 проценти, но досега сите други партии ветија дека нема да соработуваат со неа. Според сегашните трендови, доколку победат конзервативците, сепак ќе им треба коалициски сојузник за мнозинството. Ова, според анализите, ги зголемува долгорочните изгледи за нивната лево-десна „голема коалиција“ со СПД.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Нетанјаху отпатува во Унгарија и покрај налогот за апсење

Израелскиот премиер Бенјамин Нетанјаху доцна синоќа отпатува за Унгарија и покрај налогот за апсење издаден против него од страна на Меѓународниот кривичен суд за воени злосторства во Газа, јавува Анадолија.
Нетанјаху „отпатувал во четиридневна посета на Унгарија, придружуван од неговата сопруга Сара“, објави израелскиот дневен весник „Једиот Ахронот“.
Се очекува тој да слета во главниот град Будимпешта во раните утрински часови, каде и официјално ќе започне неговата посета, додава весникот.
„Хјуман рајтс воч“ ја повика Унгарија да го уапси Нетанјаху доколку стапне на нејзина територија.
„Унгарија треба да му одбие влез на израелскиот премиер Бенјамин Нетанјаху или да го уапси доколку влезе во земјата“, соопшти во вторникот организацијата за човекови права со седиште во Њујорк.
Кабинетот на Нетанјаху претходно ја најави неговата посета на Унгарија оваа недела, на покана на унгарскиот премиер Виктор Орбан.
Меѓународниот кривичен суд издаде налози за апсење во ноември минатата година за Нетанјаху и поранешниот министер за одбрана Јоав Галант под обвинение за воени злосторства и злосторства против човештвото во Газа.
Организацијата за човекови права Амнести интернешнал исто така ја повика Унгарија да го уапси Нетанјаху доколку влезе во земјата и да го предаде на Меѓународниот кривичен суд.
Израел се соочува со обвиненија за геноцид пред Меѓународниот суд на правдата поради неговите воени акции во Газа, каде што повеќе од 50.000 луѓе беа убиени од нападот на палестинската група Хамас на 7 октомври 2023 година.
Свет
Би-би-си: Воведувањето царини е најголемата коцка во политичката кариера на Трамп

Политичките ставови на Доналд Трамп се менуваа со децении, но една работа остана иста – од 1980-тите, тој тврди дека царините се најдобриот начин за зајакнување на американската економија. Сега тој реши со овој потег да го стави на линија својот претседателски мандат и политичката кариера.
Актуелниот американски претседател најави воведување големи царини за увоз од голем број земји, вклучително и американски сојузници, конкуренти и противници.
Во говорот што беше мешавина од славење и самопофалба, Трамп потсети на неговата долгогодишна поддршка за царините и критиките за договорите за слободна трговија како НАФТА и Светската трговска организација.
Тој рече дека очекува отпор од „глобалистите“ и „посебните интереси“, но ги повика Американците да му веруваат на неговите инстинкти. „Запомнете, сите предвидувања на нашите противници за трговијата во последните 30 години беа целосно погрешни“, рече Трамп.
Царини до 50 отсто за „најлошите престапници“
Трамп најави дека ќе воведе царини до 50 отсто за „најлошите престапници“. 53 отсто одат за Кина, 20 отсто за Европската Унија и Јужна Кореја, а основната стапка за сите земји ќе биде 10 отсто. Канада засега нема да добие дополнителни царини, но нема да добие ниту олеснување.
Во својот втор мандат, опкружен со советници кои го делат неговиот светоглед и со републиканско мнозинство во Конгресот, Трамп е во позиција конечно да го спроведе она што тој го нарекува „трговска политика насочена кон Америка“. Според него, токму таквите политики ги направија САД богата нација пред повеќе од сто години и ќе го прават тоа повторно.
„Со години, чесните американски граѓани мораа да гледаат одстрана како другите земји стануваат богати и моќни, често на наша сметка“, рече Трамп. „Денес го менуваме тоа. Денес ќе ја направиме Америка повторно голема – и поголема од кога било досега“, додаде тој.
Економски ризик без преседан
Но, економските експерти предупредуваат дека потегот на Трамп може да има катастрофални последици. Тие велат дека високите царини ќе се прелеат на американските потрошувачи преку повисоки цени и може да предизвикаат глобална рецесија.
Поранешниот главен економист на Меѓународниот монетарен фонд, Кен Рогоф, изјави за Би-би-си дека шансите САД, најголемата светска економија, да влезе во рецесија сега се зголемени на 50 отсто.
„Тој само што фрли нуклеарна бомба врз глобалниот трговски систем“, рече Рогоф. „Последиците од царините од ова ниво на увозот во САД се едноставно запрепастувачки“, додаде тој.
Од сојузник во противник
Потегот на Трамп, исто така, се заканува да ги влоши односите со сојузниците. САД се обидуваат да ги зајакнат врските со Јапонија и Јужна Кореја во последниве години како противтежа на Кина. Но, сега овие три земји најавија дека заедно ќе реагираат на американската трговска политика.
Ако успее, Трамп ќе го преобликува глобалниот економски поредок што самите САД помогнаа да се воспостави по Втората светска војна. Ветува дека ќе го оживее американското производство, ќе генерира нови приходи и ќе ја намали зависноста од глобалните синџири на снабдување кои пропаднаа за време на пандемијата на Ковид.
Тоа е амбициозен план и многумина го сметаат за целосно нереален. Но, Трамп, кој опсесивно сака да остави длабока трага во историјата, го гледа ова како можеби неговата најголема можност. Во својот говор тој ден го нарече „ден на американското ослободување“.
Историски ден со неизвесен исход
Сепак, едно е сигурно, доколку Трамп ја спроведе својата најава до крај, тоа ќе биде историски пресврт во американската трговска политика. Прашање е само дали ќе остане запаметен како успех или економски неуспех.
Иако целиот говор беше триумфален и исполнет со самодоверба, малку сомнеж се провлече на крајот.
„Тоа ќе биде ден кога, се надевам, за неколку години ќе погледнете наназад и ќе кажете: знаете што, тој беше во право“, рече Трамп.
Свет
Јапонија ги повикаа САД да ги повлечат царините

Крајно жалосно е што владата на САД ја објави својата одлука да наметне реципрочни тарифи, иако ние изразивме загриженост на различни нивоа и ги повикавме САД да не преземаат унилатерални мерки, изјави портпаролот на владата Јошимаса Хајаши.
„Ние сме сериозно загрижени за тоа дали тарифната мерка е во согласност со правилата на Светската трговска организација и трговскиот договор помеѓу Јапонија и САД“, додаде портпаролот.
Трамп најави нови општи тарифи од 10% за поголемиот дел од увозот во САД.
Секретарот за трговија на Јапонија, Јоџи Муто, му соопштил на секретарот за трговија на САД, Хауард Лутник, дека тарифниот пакет на САД ќе им отежне на јапонските компании да инвестираат на американскиот пазар и на крајот ќе и наштети на најголемата светска економија.
Запрашан од домашните новинари за можноста за одмазда, Муто одговорил само дека Јапонија ќе мора да го направи она што е во нејзин национален интерес, не навлегувајќи во детали.