Свет
Кина ја испорачува првата серија на домашно масовно произведени големи цивилни беспилотни летала

Серија големи цивилни беспилотни летала (UAVs) излегоа од производната линија во Кина на 20 јануари.
Три такви авиони им се испорачани на клиентите за употреба во разни области, како што се заштитата на земјоделското и шумското земјиште и воздушниот транспорт, пишува „Ксинхуа“.
Моделот на UAV, наречен HY100, е развиен од Ursa Aeronautical. Станува збор за беспилотен авион со фиксни крила, максимална тежина на полетување од 5,25 тони и носивост до 1,9 тони. Авионот има максимален дострел од 1.800 километри, автономија на летот до 10,6 часа и може да лета стабилно на височина од четири метри подолг временски период.
Во споредба со другите видови беспилотни летала, големите беспилотни летала имаат поголема носивост, поширок оперативен опсег и пофлексибилни надморски височини на летот, што им овозможува да ги надополнат другите авиони на мала височина, како што се помалите дронови.
„На пример, кога се користи за прскање со пестициди, HY100, со распон на крилата од повеќе од 18 метри, може да покрие до 240.000 mu (околу 16.000 хектари) во еден ден“, рече Ју Јанг, генерален директор на Ursa Aeronautical.
Големо беспилотно летало е летало чија максимална тежина при полетување надминува 150 килограми. Има широк опсег на апликации, вклучувајќи заштита на земјоделски и шумски области, транспорт на стоки, испорака од воздух, мисии за спасување во итни случаи и пренос на воздушни комуникациски преноси.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Инциденти по протестот во Белград: Петпати фрлија солзавец, но луѓето бришат солзи и не се откажуваат, летаат јајца и шишиња по полицијата

Голема толпа народ не се повлекува од улиците на Белград иако студентскиот протест, преку кој испратија порака за предвремени парламентарни избори, заврши. Полициски кордони има насекаде и се обидуваат да ја потиснат масата луѓе. Граѓаните на многу места фрлаат со шишиња, лименки, камења и јајца по полицијата, се жалат дека се чувствува солзавец во воздухот, но велат дека нема да се откажат.
„Бевме пред кордонот полиција, во првиот ред. Петпати фрлија солзавец, но луѓето бришат солзи и не се откажуваат. Доста е страв, нема понатаму. Ова е нивен крај, не наш. Остануваме до крај“, вели за српската телевизија „Н1“ студентка која на протестот е со мајка си и не сака да си замине.
„Спуштете ги штитовите“ извикуваат граѓаните и не сакат да отстапат. Ставаат маски на лицата и пренесуваат повик „да не се откажуваме, се додека сме мирни, ништо не можат“.
Студентскиот протест на кој беа пренесени пораките за предвремени избори заврши мирно, а инцидентите почнаа во моментот кога студентите ги соблекоа елеците.
Регион
(Видео) Студентите на протестот во Белград ќе развеат знаме „какво што не се очекува“

Студентскиот протест во Белград почна со огромен број луѓе кои се уште се слеваат кон плоштадот Славија. Студентите за вечерва најавија дека ќе развеат знаме „какво што досега не е видено“. Откога почна протестот тие на социјалните мрежи објавија кусо видео од последните подготовки за изнесување големо знаме на улица со најава дека „тоа ќе биде знаме кое не сте го очекувале“.
Biće to zastava koju niste ocekivali pic.twitter.com/qeFNGlGmHD
— Žaklina Tatalović (@zaklina_prva) June 28, 2025
Протестот е предвидено да заврши во 21 часот кога истекува рокот кој студентите го дадоа на власта за распуштање на Народното собрание распишување предвремени парламентарни избори како и растурање на протестот во Пионерскиот парк каде некои студенти на контрапротест три месеци кампуваат и бараат продолжување на универзитетската година. За се што ќе се случува по 21 часот, студентите кажаа дека не се надлежни, а претседателот на Србија, Александар Вучиќ, попладнево рече дека очекува насилство, токму во периодот од 21 до 22 часот.
Регион
Плоштадот Славија во Белград се преполни, реки луѓе доаѓаат од сите страни на видовденски протест

Под слоганот „Се гледаме на „Видовден“ попладнево плоштадот Славија во Белград, Србија се преполни луѓе. Српските медиуми јавуваат дека реки народ се уште доаѓаат кон плоштадот од сите страни на државата.
Студентите, поддржани од огромен број граѓани имаат две барања од властите. Првото барање е распуштање на Народното собрание и распишување предвремени парламентарни избори до 21 часот денес, а второто барање е да прекине протестот на некои од студентите кои бараат продолжување на универзитетската година и три месеци кампуваат во Пионерскиот парк во центарот на Белград.
Студентите кои го организираат протестот најавија дека тој ќе трае три часа, треба да заврши во 21 часот и се огласија за ненадлежни за се што ќе се случува по 21 часот.
Претседателот на Србија, Александар Вучиќ, денес изјави дека очекува насилство на протестот кое ќе почне меѓу 21 и 22 часот.