Свет
Кирби: Преговорите за Газа не пропаднаа, во Каиро е постигнат напредок

Портпаролот на Белата куќа за национална безбедност Џон Кирби денеска ги демантираше информациите дека преговорите за прекинот на огнот во Газа, кои се одржуваат оваа недела во Каиро, се на работ на колапс и додаде дека е постигнат напредок, иако разговорите главно биле предводени од израелски и египетски преговарачи.
Кирби исто така истакна дека разговорите во Каиро продолжуваат денеска и дека директорот на ЦИА Вилијам Барнс ќе учествува во тие разговори, пренесува Тајмс оф Израел.
Тој додаде дека разговорите за примирјето во Појасот Газа се конструктивни, и дека е неопходно сите страни да се обединат за да работат на имплементација на предложениот договор.
Кирби им рече на новинарите дека милитантите на Хамас треба да учествуваат во разговорите, на кои во четвртокот присуствуваа преговарачи од Израел, САД, Египет и Катар, пренесува Ројтерс.
„Ние сме во Каиро. Тие се во Каиро. Ни треба Хамас да учествува и треба да разговараме за најважните детали (од договорот). И на тоа сме фокусирани овде во наредните денови за време на викендот“, рече Кирби, пренесува Танјуг.
Минатиот петок Белата куќа поднесе, како што го опиша „конечен предлог за премостување“ на разликите меѓу Израел и Хамас, што Тел Авив го прифати, додека претставниците на палестинските власти ја критикуваа понудата, но сè уште официјално не ја отфрлија.
Американскиот државен секретар Ентони Блинкен претходно оваа недела рече дека страните ќе мора да одржат последователни разговори за финализирање на спроведувањето на договорот, дури и ако Хамас го прифати предлогот.
И покрај ова, Хамас не учествува во новата рунда разговори во Каиро оваа недела, а Кирби не посочи дека постои можност страните наскоро да го финализираат договорот.
Израелскиот премиер Бенјамин Нетанјаху инсистира на новото барање што го упати минатиот месец да му се дозволи на Израел да ги задржи своите сили во коридорот Филаделфија за да спречи шверц на оружје од Египет во Газа.
Каиро и Хамас се противат на таа позиција, а САД се обидоа да унапредат алтернативни решенија за спречување на шверцот без задржување на ИДФ на границата меѓу Египет и Газа, но засега нема индикации дека Тел Авив е подготвен да преговара за ова прашање, пренесуваат светските медиуми.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Илон Маск – првиот полубилионер во светот

Илон Маск, директорот на компанијата „Тесла“, е првиот човек во историјата со богатство од повеќе од 500 милијарди долари (околу 425 милијарди евра).
Богатството на Маск накратко достигна 500,1 милијарда долари во попладневните часови на 1 октомври, по њујоршко време, за пред малку да падне на нешто над 499 милијарди долари, според листата на милијардери на Форбс.
Покрај „Тесла“, вредностите на другите компании на Маск исто така се зголемија, како што се стартапот во областа на вештачката интелигенција xAI и компанијата SpaceX.
Сето ова дополнително го зајакнува статусот на Маск како најбогат човек во светот, далеку пред конкурентите во глобалниот технолошки сектор.
Втор најбогат човек во светот моментално е Лари Елисон, основачот на технолошката компанија „Оракл“, чие богатство се проценува на околу 350,7 милијарди долари.
Елисон накратко го престигна Маск минатиот месец, кога акциите на „Оракл“ скокнаа за повеќе од 40 проценти, по оптимистичките деловни прогнози во областа на вештачката интелигенција.
Огромното богатство на Маск е главно поврзано со неговиот удел од над 12 проценти во „Тесла“, чии акции значително пораснаа оваа година.
Во среда, на затворањето на берзата во Њујорк, акциите на „Тесла“ пораснаа за повеќе од 3,3 проценти, а од почетокот на годината забележаа раст од повеќе од 20 проценти.
Инвеститорите позитивно реагираат на фактот дека Маск во последно време повеќе се посветува на своите компании, а помалку на политиката.
Неодамна, тој беше цел на критики за неговата работа со администрацијата на Трамп, првенствено со Одделот за владина ефикасност, кој беше задолжен за намалување на владините трошоци и бројот на вработени во јавниот сектор.
Маск, кој е и сопственик на социјалната мрежа Икс, често јавно ги искажува своите ставови за теми како што се имиграцијата и Програмата за разновидност, еднаквост и вклучување (DEI), што исто така предизвикува големо внимание.
Тој сега е целосно посветен на „Тесла“, изјави Робин Денолм, претседател на Управниот одбор на „Тесла“, во септември.
Управниот одбор, исто така, објави бонус од една милијарда за Маск ако постигне многу амбициозни цели во следните десет години.
За да го постигне ова, тој би морал да ја зголеми вредноста на „Тесла“ осум пати, да продаде милион роботи базирани на вештачка интелигенција, дополнителни 12 милиони автомобили и да исполни голем број други барања.
Минатиот месец, Маск објави дека купил акции на „Тесла“ во вредност од околу една милијарда долари, што многу инвеститори го протолкуваа како знак на доверба во иднината на компанијата.
Сепак, во последните години, „Тесла“ се соочи со сериозна конкуренција, првенствено од кинескиот гигант BYD, како и со предизвици поврзани со трансформацијата во компанија што се занимава со вештачка интелигенција и роботика.
Фото: принтскрин
Свет
Орбан: Цврсто ќе ја бранам позицијата на Унгарија за Украина

Унгарскиот премиер Виктор Орбан денес изјави дека на самитот во Копенхаген „цврсто ќе стои зад унгарската позиција“ за Украина, посочувајќи дека лидерите на ЕУ сакаат да финансираат испораки на оружје и да го забрзаат пристапувањето на Украина во Унијата.
„Копенхаген, втор ден. Ситуацијата е сериозна. На маса има отворени предлози за војна. Тие сакаат да ѝ ги предадат средствата од ЕУ на Украина. Тие се обидуваат да го забрзаат пристапувањето на Украина со секакви правни трикови. Тие сакаат да ја финансираат испораката на оружје“, рече унгарскиот премиер на социјалните мрежи и нагласи дека „цврсто“ ќе стои зад унгарската позиција, објави Ројтерс.
По вчерашниот неформален самит на лидерите на ЕУ со фокус на заедничката одбрана и поддршката за Украина, денес во Копенхаген ќе се одржи самит на Европската политичка заедница (ЕПЗ), каде што ќе се дискутира за безбедноста, трговијата со луѓе и миграцијата, со учество на околу 40 шефови на држави или влади.
Фото: принтскрин
Свет
Израел објави фотографии од активистите: Пловат кон Израел, ќе ги депортираме во Европа

Израел објави дека активистите од флотилата, која Израел ја нарекува „Хамас-Сумуд“, пловат безбедно и мирно кон Израел, каде што ќе започне нивната постапка за депортација во Европа.
„Сите се безбедни и во добра здравствена состојба“, објави израелското Министерство за надворешни работи. Грета Тунберг е, исто така, на една од фотографиите.
Hamas-Sumud passengers on their yachts are making their way safely and peacefully to Israel, where their deportation procedures to Europe will begin. The passengers are safe and in good health. pic.twitter.com/pzzitP5jN8
— Israel Foreign Ministry (@IsraelMFA) October 2, 2025
Само еден од 44-те бродови во флотилата сè уште плови кон Газа. Според флотилата, 40 бродови биле пресретнати од израелски војници, два брода за логистичка поддршка претходно отстапиле од својот курс, додека бродот што влегол во територијалните води кај Газа не се поместил со часови.
Индекс.хр објави дека бродот „Ширин“, кој им обезбедува правна помош на бродовите во флотилата, вчера морал да отстапи од својот курс и денес е во мирување. Капетан на бродот е хрватската адвокатка Морана Миљановиќ. Според флотилата, израелските војници не се качиле на овој брод.
Исто така, сите преноси во живо од бродовите на флотилата се исклучени.