Свет
Колку чини животот на еден Авганистанец?

Во март 2014 година, американската армија му плати на Авганистанец 1.000 долари, затоа што го убила неговиот син (цивил). Тоа се случило за време на воена операција, во близина на границата со Иран.
Шест месеци подоцна, друг авганистански татко добил 10.000 долари за убиеното детето, кое настрадало во друга американска операција.
За време на американските операции спроведени во областа Кундуз изведени минатиот ноември, 68-годишниот Хаџи Алах Дад, изгубил дваесет свои роднини, вклучувајќи брат и снаа. Но, тој не добил ништо од САД, кои им оставиле на авганистанските власти да одредат и да му платат надомест.
Речиси 16 години по влегувањето во Авганистан, Вашингтон се уште нема стандардизиран процес за исплата на надомест за убиства и ранување на илјадници цивили во земјата, покажуваат податоците на владата објавени во средата од агенција Ројтерс, која ги добила по службен пат, врз основа на законот за пристап до информации.
Во обид да им се спротивстават на Талибанците, САД во 2005 година почнаа да им плаќаат на семејствата на убиените Авганистанци, бидејќи тоа истото го правеле непријателите.
Но, пристапот им е произволен, а активисти тврдат дека системот е неправеден и збунувачки за сиромашните и необразовани локални жители.
Меѓународното и националното право не го обврзува Вашингтон да плаќа надомест, но земјата тоа прави од педесеттите години на минатиот век, веднаш по избувнувањето на Корејската војна.
Роднини на загинати ирачки цивили исто така добивале пари. Портпаролот на Пентагон изјави дека командантите на терен ги одредувале обесштетувањата, бидејќи тие можеле да ја направат најдобрата оценка за инцидентите.
Таа се базира на “културните норми на регионот, совети од авганистанските партнери и околностите околу конкретниот настан”, прецизира тој.
Во периодот од 2013 и 2016 година, вкупно 1,2 милиони долари им биле исплатени на авганистански семејства за смртта на најмалку 101 лице и ранување на 270 други Авганистанци, покажуваат документите со кои располага “Ројтерс”.
Речиси сите биле цивили, а пет од исплатите биле кон членови на владата.
Димензиите на надоместоците се разликуваат дури и при случаи кои си слични по обемот и по карактерот.
Портпаролот на авганистанските власти тврди дека на име бенефиции за смрт исплаќала по 1.500 долари. Со толкава сума се офајдиле 100.000 Авганистанци од Кундуз. За ранување по 750 долари добиле 50.000 луѓе.
Еден од најпознатите случаи во кои САД платиле надомест, беше по воздушниот удар врз уништената болницата на “Лекари без граници” сместена во Кундуз, при што загинаа 42 лица, а беа повредени 37 цивили.
Во 2015 година Инцидентот предизвика реакции во целиот свет и го привлече личното внимание на тогашниот претседателот Барак Обама.
За овој инцидент САД платија по 3.000 долари на повредените и 6.000 за убиените.крај/мф/кс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Орбан ја нарече Парадата на гордоста одвратна и обвини дека Брисел стои зад неа

Премиерот на Унгарија, Виктор Орбан, остро ја осуди Парадата на гордоста што вчера се одржа во Будимпешта, нарекувајќи ја „одвратна и срамна“. Во објава до своите поддржувачи, тој го обвини Брисел дека стои зад организацијата на настанот, кој, според него, прераснал во антивладин протест.
„Брисел издаде наредба дека треба да има Парада во Будимпешта. Нивните марионетски политичари ја извршија наредбата“, напиша Орбан во порака до затворената онлајн група на своите приврзаници.
Орбан порача дека парадата е јасен показател за тоа што би се случувало во Унгарија доколку неговата партија ФИДЕС не беше на власт. Тој тврди дека, иако на Парадата имало многу луѓе, тие не можат да се споредат со 3,7 милиони учесници на референдумот за родова еднаквост во 2022 година.
„Од вчера, знаеме уште повеќе со сигурност дека на овие луѓе не треба да им се дозволи да го преземат кормилото на Унгарија. И ние нема да им дозволиме“, истакна Орбан.
Премиерот го осуди и визуелниот дел од Парадата, коментирајќи дека на сцената имало „шоу на ‘драг’ кралици“, „мажи во високи потпетици“ и „брошури за хормонска терапија“. Според него, тоа не е прашање на гордост, туку на срам.
Во своето обраќање Орбан ја поврза Парадата и со други горливи теми како миграцијата, намалувањето на комуналните трошоци и ставовите кон Украина и војната.
На крајот, тој испрати порака: „Се бориме за вистината! Борба против лагите!“
Регион
Приведени 77 лица по протестите, 48 полицајци повредени, Вучиќ вети дека нема помилување за насилство

Претседателот на Србија, Александар Вучиќ, денеска порача дека нема да потпише никакво помилување или аболиција за оние кои учествувале во насилствата по студентските протести во Белград. Тој најави дека ќе следуваат нови апсења, бидејќи, како што рече, сѐ уште се врши идентификација на осомничените.
„Ова не е крај, лицата се идентификуваат, на тоа работи БИА“, изјави Вучиќ, додавајќи дека Србија не може да се победи со насилство: „Неа не можете да ја победите со насилства, таа не запре и нема да застане“.
Тој оцени дека повиците на крајот од протестот, особено изјавата „имате зелено светло“, претставуваат директен повик за граѓански конфликти и напади врз полицијата.
„Ги повикувам надлежните обвинителства да си ја работат својата работа, да не се преправаат дека се неспособни и наивни. Доаѓа време на одговорност, почитувани граѓани“, додаде Вучиќ.
На заедничката прес-конференција, министерот за внатрешни работи Ивица Дачиќ информираше дека по протестот се приведени 77 лица, од кои 38 се задржани, а меѓу нив има и едно малолетно лице.
„Против 35 лица ќе бидат поднесени кривични пријави, а против 26 лица ќе се води прекршочна постапка“, изјави Дачиќ, додавајќи дека се повредени 48 полицајци, од кои еден со тешки повреди на главата, а уништена е и значителна количина заштитна опрема.
Премиерот на Србија, Ѓуро Мацут, остро го осуди насилството и побара сите страни да се воздржат од дополнително разгорување на тензиите.
„Србија е демократско општество во кое мислењата мора да се изразуваат на мирен и цивилизиран начин, без загрозување на безбедноста на граѓаните и јавниот ред и мир“, изјави Мацут.
Тој им се заблагодари на припадниците на полицијата и безбедносните служби за брзата и професионална интервенција.
Своја реакција имаше и претседателката на српското Собрание, Ана Брнабиќ, која обвини дека студентите на протестот упатиле повик за граѓанска војна.
„Блокаторите не го завршија својот митинг на Видовден со зборовите ‘Да живее Србија’, туку со морничав повик за убивање на Србија – монструозен и отворен повик за граѓанска војна. Памти Србијо“, напиша таа на мрежата Икс.
Блокадери свој скуп на Видовдан нису завршили речима – Живела Србија. Завршили су језивим позивом на убиство Србије, монструозним и отвореним позивом на грађански рат. Памти Србијо. pic.twitter.com/IiOiU3A0Kl
— Ana Brnabic (@anabrnabic) June 28, 2025
Свет
Италијанец снимал деца на Истра со камери скриени во пенкала

Истарската полиција заврши кривична истрага против 67-годишен италијански државјанин, осомничен за сериозно кривично дело поврзано со злоупотреба на техничка опрема и нарушување на приватноста на малолетни лица.
Според соопштението на Полициската управа на Истра, инцидентот се случил на 26 јуни, околу 15 часот, кога гостин во туристички објект забележал лице како недозволено снима малолетници. Лицето било задржано до пристигнување на полициски службеници, кои веднаш постапиле согласно законските надлежности.
По судска наредба, биле извршени претреси на неколку уреди со скриени камери, вклучувајќи техничка опрема со интегрирани снимачки механизми, мемориски уреди, мобилен телефон и возилото на осомничениот. Полициската управа информира дека се пронајдени материјали кои ќе бидат предмет на понатамошна истрага.
Осомничениот е уапсен и вечерта на 27 јуни предаден во притворската единица на Полициската управа на Истра со поднесена кривична пријава.