Свет
Лавров: Блискиот исток е на работ на голема регионална војна

Министерот за надворешни работи на Русија, Сергеј Лавров оцени дека Блискиот Исток е на работ на голема војна.
„Блискиот исток повторно е на работ на голема регионална војна и наша заедничка одговорност е да го спречиме тоа да се случи“, рече Лавров во Ријад на седницата на Стратешкиот дијалог на Советот за соработка Русија-Заливот, пренесува РИА Новости.
Министерот изјави дека неспособноста на светската заедница да ги запре борбите во Појасот Газа доведе до нагло влошување на воено-политичката ситуација на целиот Блиски Исток.
Лавров посочи дека без решавање на палестинско-израелскиот проблем Блискиот исток нема да може стабилно да се развива и додаде дека Русија соработува со сите страни, пренесува Танјуг.
За возврат, премиерот и министер за надворешни работи на Катар, Мохамед бин Абдулрахман Ал Тани, за време на својот говор укажа на потребата од воведување прекин на огнот во Појасот Газа.
Тој чекор го нарече клучен фактор за воспоставување траен мир на Блискиот Исток, поради што земјите треба да соработуваат.
Лавров, кој вчера пристигна во Ријад, веќе имаше средба со генералниот секретар на Советот, Јасем Ал Будеиви, како и со министерот за надворешни работи на Саудиска Арабија, Фајсал бин Фархан.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Млад човек извлечен жив од урнатините пет дена по разорниот земјотрес: бројот на загинати во Мјанмар се искачи на 2.886

Бројот на загинати во разорниот земјотрес во Мјанмар се искачи на 2.886, а 4.639 лица се повредени, а 373 се уште се водат како исчезнати, соопшти денеска информативната служба на владејачката воена хунта.
Исто така, беше објавено дека 26-годишен хотелски работник бил спасен денеска од урнатините на урнатиот хотел во мјанмарската населба Најпидав, пет дена по земјотресот со јачина од 7,7 степени според Рихтеровата скала што ја погоди земјата, јави Ксинхуа.
Две лица останаа заробени под урнатините на хотелот, а спасувачките тимови од мјанмарската и турската противпожарна служба успешно извлекоа еден преживеан на безбедно, соопшти информативниот тим на владата на Мјанмар.
Операцијата во хотелот започнала околу 15 часот по локално време во вторникот, а мажот бил спасен околу 00:30 часот по локално време денеска, се вели во соопштението.
Во тек се операции за лоцирање и спасување на останатите затрупани лица, се додава во соопштението.
Европа
Зеленски објави колку заработил лани: приходите му се зголемени во однос на 2023 година

Украинскиот претседател Володимир Зеленски објави декларација за имотот, приходите, трошоците и финансиските обврски на неговото семејство за 2024 година.
Системот на задолжителни електронски изјави за имот за јавни службеници беше воведен во 2014 година како дел од борбата на Украина против корупцијата. Откако беше суспендиран на почетокот на војната, Зеленски потпиша закон во октомври 2023 година со кој се вратија задолжителните декларации, пишува Киев Индипендент.
Според последните податоци, приходот на семејството Зеленски во 2024 година бил 15.286.193 гривни (368.556 долари), вклучувајќи 8.585.532 гривни (207.000 долари) од продажба на државни обврзници. Останатите приходи се состојат од претседателската плата, банкарските камати и приходите од издавање на сопствен недвижен имот.
„Зголемувањето на приходите на семејството на претседателот на Украина во однос на претходната година се должи на продолжувањето на целосната исплата на киријата“, соопшти прес-службата.
„Немаше други значајни промени во имотот, недвижниот имот или возилата на семејството на претседателот минатата година“, додаваат тие.
Зеленски и членовите на неговото семејство пријавиле приход од 316.700 долари во 2023 година.
Свет
Кина ги продолжува воените вежби околу Тајван, бродовите се многу блиску до островот

Војската на Кина денеска го започна вториот ден од вежбите околу Тајван и за прв пат им го даде кодното име Strait Thunder-2025A, велејќи дека се фокусирани на усовршување на способностите за блокада на островот и изведување прецизни напади.
Вежбите следат по зголемувањето на кинеската реторика против тајванскиот претседател Лаи Чинг-те, кого Кина го нарече „паразит“ во вторникот, а доаѓаат по посетата на американскиот секретар за одбрана Пит Хегсет на Азија за време на која тој постојано го критикуваше Пекинг.
Кина, која го смета демократскиот Тајван за своја територија, постојано го осудува Лаи како „сепаратист“. Лаи, кој победи на изборите и ја презеде функцијата минатата година, ги отфрла тврдењата на Пекинг за суверенитет и вели дека само народот на Тајван може да одлучи за својата иднина.
Кинеската команда соопшти дека вежбите се одржуваат во централните и јужните области на Тајванскиот теснец. Некои од тајванските острови се на само неколку километри од Кина.
Висок тајвански безбедносен функционер изјави за Ројтерс дека повеќе од 10 кинески воени бродови утринава се во „зоната на одговор“ на Тајван и дека кинеската крајбрежна стража учествува во вежби за „малтретирање“.
Соединетите држави, најважниот меѓународен поддржувач на Тајван и главен снабдувач со оружје и покрај недостатокот на формални дипломатски врски, ги осудија вежбите.
Јапонија и Европската унија исто така изразија загриженост.