Свет
Ледениот џин, најголемата санта мраз во светот почна да се движи по 30 години
Најголемата санта мраз во светот, „А23а“ почна да се движи по 30 години заглавување во Веделовото море и има волумен од приближно 1.100 кубни километри и тежи нешто помалку од милијарда тони, што е повеќе отколку што се мислеше.
Научниците дојдоа до големината на ледениот брег со комбинирање на неговата претходно позната површина од 3.900 квадратни километри со новооткриената бројка на нејзината дебелина, која е нешто повеќе од 280 метри, пишува Би-Би-Си.
„А23а“ беше измерен со мисијата Криосат-2 на Европската вселенска агенција, која носи радарски висиметар кој може да насети колку од сантата е над површината на водата, а потоа, користејќи информации за густината на мразот, можно е да се одреди големината на делот што е под вода.
Сега податоците на Европската вселенска агенција CrioSat-2 го потврдуваат она што научниците претходно го претпоставуваа – дека „ледениот џин“ има еден дел кој е значително поголем од останатите, а кој, според експертите, во 2018 година се протегал на 350 метри под површината на водата.
Сателитските снимки покажуваат дури и површински пукнатини кои се отворале директно над делот што служел како сидро со децении, а кои настанале како резултат на силен судир со морското дно.
Во годините што следеа, „А23а“ постепено ја губеше масата за на крајот да се ослободи и да почне да се движи. Ледениот брег стигна до врвот на Антарктичкиот Полуостров, од каде се претпоставува дека ќе го продолжи патувањето кон Јужниот Атлантик.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Русија има сила повторно да го нападне Киев, изјави Зеленски за АФП
Претседателот на Украина, Володимир Зеленски во интервју за Агенцијата Франс прес (АФП) изјави дека не верува оти Русија има сила повторно да го нападне Киев.
Тие немаат сила за голема офанзива против главниот град, како што имаа на почетокот на инвазијата, посочи Зеленски додавајќи оти главни цели на Кремљ се Харков и Донбас.
Тој ги обвини западните земји што му забраниле да ја нападне Русија со нивното оружје.
„Русите можат да не нападнат на наша територија, тоа е најголемата предност што ја има Русија, но ние не можеме да направиме ништо со западното оружје на нивните вооружени системи лоцирани на руска територија. Немаме право“, вели Зеленски.
Според него, Западот се плаши и од руски и од украински пораз и оваа ситуација ја нарече апсурдна.
„Ние сме во апсурдна ситуација кога Западот се плаши дека Русија ќе ја изгуби војната. А во исто време тие не сакаат Украина да ја изгуби. Затоа што конечната победа на Украина ќе доведе до пораз на Русија и конечна победата на Русија ќе доведе до пораз на Украина“, истакна Зеленски.
Регион
Пленковиќ, хрватскиот премиер кој доби трет мандат најави прва седница за понеделник
Откако хрватскиот Сабор вчера ја поддржа 16. Влада на Република Хрватска, а третата предводена од лидерот на Хрватската демократска заедница (ХДЗ) Андреј Пленковиќ, тој во изјава за медиумите рече дека првата седница на новата Влада ќе биде во понеделник и најави продолжување на посветената работа во интерес на хрватскиот народ.
„Благодарам на мнозинството во хрватскиот Сабор што ни ја укажа довербата да станеме Влада на Република Хрватска по трет пат и ние, како што правевме претходните осум години, посветено ќе работиме во интерес на хрватскиот народ, сите наши сограѓани, економијата, врската меѓу татковината и иселениците Хрвати и да спроведеме програма врз основа на која ја добивме довербата на хрватските гласачи“, рече Пленковиќ откако Собранието гласаше за неговата трета Влада
Тој им се заблагодари на сите партнери кои ја поддржаа Владата.
Пратениците во хрватскиот Сабор вчера гласаа за доверба на новата влада на премиерот Андреј Пленковиќ.
За доверба на Владата гласаа 79 пратеници, против беа 61 пратеник, а еден беше воздржан.
Свет
Убиени тројца странски туристи и еден Авганистанец
Вчера од вооружени лица во централен Авганистан се убиени тројца странски туристи и еден Авганистанец, а четворица странски државјани и тројца Авганистанци се ранети, соопшти талибанското Министерство за внатрешни работи.
Според светските агенции не е позната националноста на туристите, ниту кој го извршил нападот за кој што се уапсени четири лица.