Свет
Либискиот командант Калифа Хафтар вели дека неговите сили презеле контрола во земјата
Либиската национална армија (ЛНА), предводена од маршалот Калифа Хафтар, ја презеде контролата врз владата на земјата, рече командантот на ЛНА во видеообраќањето до нацијата доцна во понеделникот, пренесува „Скај њуз Арабија“.
„Генералната команда на вооружените сили го презема управувањето со земјата и го најавува раскинувањето на спогодбата од Скират. И покрај големата одговорност, ние ја прифаќаме волјата на народот и мандатот што тие го делегираа“, рече тој.
Хафтар вети дека ЛНА ќе се обиде да воспостави постојани граѓански институции во согласност со волјата на народот.
„Луѓето мора да имаат контрола над својата судбина и да ја изберат својата иднина со демократски средства. Од првиот ден нашата цел беше да ја заштитиме волјата на либискиот народ“, рече Хафтар.
Тој тврди дека спогодбата од Сикрат со посредство на ОН ја ставила земјата во опасност, но сега е дел од мрачното минато.
Спогодбата од Сикрат, позната и како Либиски политички договор, беше потпишана во Скират во Мароко во декември 2015 година. Таа се заснова на мировниот план на ОН, кој предвидува создавање Влада на национален договор и Претседателски совет. Двете тела се со седиште во Триполи и ги води Фајез ал-Сараџ.
На 19 јануари во Берлин се одржа меѓународна конференција на високо ниво за Либија, на која присуствуваа најмалку десет шефови на држави и влади.
Конечното соопштение на конференцијата вклучуваше повик за прекин на огнот, како и повик странските држави да се воздржат од интервенирање во внатрешните работи на Либија, истовремено предлагајќи создавање единствена влада и почнување реформи за враќање на државноста која беше срушена од страна на НАТО пред речиси 10 години. Конфликтните страни исто така се согласија да формираат специјална комисија за набљудување на прекинот на огнот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Премиерката на Бангладеш: Сопствениците на фабрики да се откажат од луксузот заради вработените
Премиерката на Бангладеш Шеиха Хасина за време на своето обраќање по повод празникот Први мај ги повика сопствениците на текстилните фабрики и другите фабрики од Бангладеш да ги подобрат условите за работа на своите вработени со тоа што ќе се откажат од дел од својот луксуз.
„Сакам сопствениците (фабриките) да посветат посебно внимание на работниците, намалувајќи го малку нивниот луксуз, бидејќи работниците ви дадоа простор да водите луксузен живот со зголемување на производството со нивната напорна работа“, рече Хасина.
Таа, исто така, ги предупреди работниците да ги игнорираат повиците за штрајк бидејќи „на тој начин работниците понекогаш всушност си нанесуваат штета себеси, на своите семејства, на земјата и на сопствениците на фабриките“, пренесува агенцијата БСС.
Свет
Уривање на дел од автопат во Кина: Најмалку 24 лица загинаа, 30 се повредени
Најмалку 24 лица загинаа, а 30 се повредени при уривање на дел од автопат на југот на Кина, во провинцијата Гуангдонг, јавија кинеските медиуми.
„Осумнаесет автомобили паднаа по падината откако се урна дел од автопатот долг 17,9 метри околу 2 часот по полноќ“, се вели во соопштението на властите во градот Мејџоу во провинцијата Гуангдонг, пренесува АП.
Според американската агенција, околу 11:45 часот по локално време под урнатините биле пронајдени 18 автомобили.
Свет
Блинкен им порача на Израел и Хамас дека е време за прекин на огнот
Државниот секретар на Соединетите Држави (САД) Ентони Блинкен се состана со израелските лидери на 1 мај, за време на посетата на Израел, а во таа прилика му порача на претседателот на земјата дека „е дојдено времето“ за договор за прекин на огнот во војната во Газа.
Ова е седма посета на Блинкен од почетокот на војната меѓу Израел и Хамас – палестинска група прогласена за терористичка организација од страна на САД и Европската Унија уште од октомври.
Блинкен се обидува да постигне договор кој би ги ослободил заложниците кои ги држат милитантите на Хамас во замена за прекин на борбите. Како дел од договорот се очекува да бидат ослободени и палестинските затвореници.