Свет
Лукашенко: Би му ги отворил очите на Трамп
Претседателот на Белорусија, Александар Лукашенко, изјави дека средбата со Доналд Трамп би била „исклучително корисна“ за американскиот лидер, бидејќи, како што вели тој, би му ги „отворила очите“ за клучните глобални прашања, првенствено за односите меѓу САД и Русија и ситуацијата во Украина.
„За разлика од сите што трчаат околу него, јас би му ги отворил очите за многу работи. Вклучувајќи ги односите меѓу САД и Русија, особено за конфликтот во Украина. И, секако, за позицијата на Белорусија“, рече Лукашенко во интервју за „Тајм“, чие снимање го објави агенцијата БелТА.
Белорускиот претседател откри и дека се пошегувал на средбата со американските претставници дека „на Американците им недостасува диктатор“. „Ми одговорија дека имаат доволно свои. Реков дека размислувам за себе – би имал многу да му кажам на нивниот претседател“, додаде Лукашенко.
Изјавата дојде откако Лукашенко се сретна во Минск со специјалниот претставник на американскиот претседател, Кит Келог, кој стана највисокиот американски функционер што ја посети Белорусија во последните години.
Во интервју за „Тајм“, Лукашенко ја поддржа „цврстата политика на Трамп кон Европа“, наведувајќи го како пример извозот на украинско жито. Според него, Трамп сакал да транспортира жито од Одеса преку Полска и да го испрати до европските пристаништа, но не му е дозволено да го стори тоа бидејќи се плаши од појавувањето на тоа жито на европскиот пазар.
Белорускиот лидер изрази подготвеност да организира трилатерална средба меѓу Владимир Путин, Доналд Трамп и Володимир Зеленски во Минск, со оценка дека двајцата претседатели ќе бидат задоволни од изборот на белоруската престолнина како преговарачка платформа.
Тој, исто така, го пофали потпретседателот на САД, Венс, нарекувајќи го „пристоен човек“ кој би можел да стане нов американски лидер, додавајќи дека се надева дека ќе ја продолжи политиката на Трамп кон ЕУ.
Лукашенко ги повика Американците да го „покренат“ Трамп за да го охрабри Зеленски барем да се согласи на „воздушно примирје“, предупредувајќи дека светските односи драстично ќе се променат во следната деценија и дека решенијата треба да се бараат врз основа на сегашната реалност.
Фото: принтскрин
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Зеленски: Кина и помага на Русија да ги заобиколи санкциите
Украинскиот претседател Володимир Зеленски изјави дека Кина префрла машини за производство на оружје во Русија, повикувајќи го Пекинг да престане со таквата поддршка и да го искористи своето влијание за да ја охрабри Москва да склучи мир.
Зборувајќи на состанокот во Киев со холандскиот министер за надворешни работи Давид ван Вил, Зеленски потсети дека претходно добил уверенија од кинескиот претседател Шји Џјинпинг дека Кина нема да испорача оружје на Русија.
„Моите пораки се многу едноставни. Имавме телефонски разговори со Џјинпинг. Тој ме увери дека оружјето нема да им се продава на Русите. Сепак, гледаме дека Кина и обезбедила машини за производство на оружје на Руската Федерација.
Гледаме дека Кина помага да се заобиколат санкциите. Гледаме дека има кинески платеници кои се бореле против украинската армија“, го цитираше Зеленски украинската државна новинска агенција Укринформ.
Зеленски нагласи дека Пекинг треба да изврши притисок врз Москва да ја запре својата агресија, наместо да ги поддржува напорите што ја продолжуваат војната.
Коментарите дојдоа откако американскиот претседател Доналд Трамп изјави дека планира да разговара за војната на Русија против Украина со Џјинпинг за време на нивниот претстоен состанок во Јужна Кореја на 30 октомври.
Трамп рече дека Шји би можел да има значително влијание врз рускиот претседател Владимир Путин и додаде дека ќе го повика кинескиот лидер да престане да купува руска нафта.
Кина негираше дека ѝ обезбедува таква помош на Русија, но се соочува со зголемен надзор од Западот поради нејзината улога во снабдувањето со технологии за двојна употреба поради тековните санкции.
Фото: принтскрин
Свет
(Видео) Ураганот „Мелиса“ ја погоди Јамајка, жителите добиваат драматична порака: „Последна шанса за бегство“
Ураганот „Мелиса“, вториот најмоќен ураган во историјата на Атлантикот, ја погоди Јамајка, носејќи катастрофални ветрови и обилни врнежи од дожд. Националниот центар за урагани (NHC) издаде драматични предупредувања до жителите, повикувајќи ги веднаш да побараат засолниште.
„Мелиса“ е ураган од категорија 5, со ветрови што достигнуваат брзина од 300 км/ч и централен притисок од 892 милибари. Островот го погоди во утринските часови, а метеоролозите предупредуваат дека дождот ќе се спушти по планините како „воден лизгач“, предизвикувајќи сериозни поплави во градовите и местата.
Catastrophic flooding and storm surge from #HurricaneMelissa in Alligator Pond, Manchester, Jamaica. pic.twitter.com/GD6aOY4YGB
— Joint Cyclone Center (@JointCyclone) October 28, 2025
Јамајканската влада веќе евакуираше околу илјада луѓе и ги смести во засолништа бидејќи земјата се соочува со директен удар од една од најмоќните бури во својата историја. Министерката во кабинетот на премиерот Абка Фиц-Хенли нагласи дека се очекува значителна штета на инфраструктурата.
🌪️ 🇯🇲Impactantes imágenes desde Kingston, Jamaica muestran los estragos del huracán Melisa , que avanza por el Caribe con fuerza devastadora.
🙏 Solidaridad con las familias afectadas.#Huracan #Melissa
pic.twitter.com/JTjQQVIBdQ— Mónica Saade (@MonicaSaadeX) October 28, 2025
На жителите им беше советувано да се држат подалеку од брегот и да бараат засолниште во цврсти згради, подалеку од дрвја и надворешни ѕидови, и доколку е можно да ги заштитат главите со душек или кацига.
Првичните снимки што се појавија на социјалните мрежи покажуваат разорни налети на ветер и обилни дождови додека ураганот минува покрај копното на Јамајка. Метеоролозите предупредуваат дека ефектите од бурата ќе траат со денови, а жителите се повикуваат да бидат исклучително внимателни.
„Мелиса“ се засили и продолжува да се движи кон североисток, што значи дека другите карипски земји би можеле да го почувствуваат влијанието на ураганот во наредните часови.
Свет
Франција распореди нова верзија на интерконтинентални ракети на подморници за нуклеарно одвраќање
Франција распореди нова верзија на интерконтинентални ракети на подморници, за таканаречено нуклеарно одвраќање, објавија денес Министерството за вооружени сили и ArianeGroup.
„Третата верзија на стратешката балистичка ракета M51 (M51.3), која е лансирана од морето, влезе во оперативна употреба, што претставува голем чекор во модернизацијата на океанската компонента на француското нуклеарно одвраќање“, се вели во соопштението на министерството.
Таа ракета е опремена со нови нуклеарни боеви глави (TNO-2).
Со ова пуштање во употреба, завршува речиси 12-годишниот процес на модернизација.
„Таа ракета е поефикасна во однос на дострелот, прецизноста и способноста за пенетрација“, се додава во соопштението.
Тие ќе бидат распоредени на сите четири француски подморници со балистички ракети, од кои барем едната е сè уште скриена на дното на океанот.
Фото: принтскрин

