Свет
Луѓе скокале од прозорци, некои добиле и срцев удар: 11 жртви во новите земјотреси во Сирија и Турција

Во синоќешните земјотреси во Турција и Сирија загинаа најмалку 11 лица, јавија денеска локалните медиуми, додека се чекаат официјални податоци за бројот на жртвите.
Најмалку шест лица загинаа, а речиси 300 се повредени во двата земјотреса на југоистокот на Турција, пишува денеска турскиот весник „Хуриет“. Според тој весник, повредени се најмалку 294 лица, од кои 18 се во тешка состојба.
Турската управа за итни случаи и природни катастрофи соопшти дека земјотреси со јачина од 6,4 и 5,8 степени според Рихтеровата скала ја погодиле синоќа провинцијата Хатај и биле проследени со најмалку 32 последователни потреса. Потресите се почувствувани и во Сирија, Кипар, Грција, Египет, Израел и во Либан.
Во вчерашниот земјотрес во Сирија загинаа пет лица во неколку градови, објавија арапските ТВ-станици. Како што наведува „Ал Арабија“, четири лица загинале вчера во Сирија во стампедо предизвикано од паниката предизвикана од земјотресот во градовите Алепо и Тартус, а уште една жена го загубила животот во Латакија, јави „Скај њуз Арабија“.
Некои луѓе имале и срцев удар. „Скај њуз Арабија“ објави дека луѓето скокнале од прозорците од страв да не бидат затрупани под урнатините, пренесува ТАСС.
Медиумите засега не известуваат исто за бројот на повредени во вчерашниот земјотрес во Сирија. „Скај њуз“ објави дека повеќе од 100 луѓе се повредени во Латакија, а телевизијата „Ал Хадат“ јавува дека 470 луѓе се повредени во цела Сирија, вклучувајќи ги и областите под контрола на опозицијата.
Според сеизмолозите, станува збор за последователен потрес по разорниот земјотрес на 6 февруари, во кој животот го загубија повеќе од 47.000 луѓе во Сирија и Турција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Загина српски воен падобранец

Припадник на 63-та падобранска бригада, виш водник прва класа Милан Станковиќ, почина вечерва во Воената болница во Ниш од повредите здобиени при скок со падобран на воениот аеродром „Михајло Петровиќ“ во Ниш, соопшти Министерството за одбрана на Србија.
Во соопштението се наведува дека по приземјувањето, Станковиќ бил итно реанимиран и пренесен во болница, каде што, и покрај брзата реакција и напорите на лекарите, им подлегнал на повредите околу 19 часот.
Надлежните органи пристигнаа на местото на настанот. Истрагата е во тек. Началникот на Генералштабот на српските вооружени сили нареди формирање комисија за утврдување на околностите на вонредниот настан.
Српски Телеграф пишува дека Станковиќ е роден на 25 декември 1983 година и дека е во српската армија од 2005 година. Зад себе остави сопруга и две деца. Министерот за одбрана Братислав Гашиќ и началникот на Генералштабот на српската армија, генерал Милан Мојсиловиќ, испратија телеграми со сочувство до семејството на починатиот Станковиќ.
Европа
Човек на Трамп: Предлогот на Путин е апсурден

Кит Келог, специјалниот претставник на американскиот претседател Доналд Трамп за Украина и Русија, го отфрли предлогот на рускиот претседател Владимир Путин за тридневен прекин на огнот. Келог истакна дека Вашингтон бара долгорочно примирје.
Коментирајќи го напредокот на мировните преговори во последните денови, тој изрази верување дека САД „се во прилично добра позиција кога станува збор за Украинците“. „А тридневно примирје е апсурдно“, нагласи тој, осврнувајќи се на предложеното примирје од 8 до 10 мај.
Тој додаде дека Трамп се залага за сеопфатен прекин на огнот „на море, во воздух и на копно“ што ќе трае најмалку 30 дена. „И потоа можеме да го продолжиме“, изјави тој.
„Кога ќе погледнете на сè околу што Украинците се подготвени да соработуваат, сега е до Русите, до Путин. Имаме една страна, ни треба друга страна. И мислам дека сме блиску“, продолжи тој.
Путин најави уште едно примирје кое ќе започне на полноќ на 8 мај и ќе трае до полноќ на 11 мај. Италијанската премиерка Џорџа Мелони изјави дека тридневното примирје објавено од Кремљ не е доволно, туку дека е потребен праведен и траен мир.
Британската одбранбена разузнавачка агенција верува дека тридневниот прекин на огнот што го објави Путин на Денот на победата има за цел да ја прикаже Русија како отворена за преговори и да ги ограничи украинските напади со долг дострел.
Свет
Израелски министер: Војната нема да заврши сè додека стотици илјади луѓе не ја напуштат Газа

Израелскиот министер за финансии, Безалел Смотрич, изјави денес дека Израел нема да ја заврши војната во Појасот Газа сè додека стотици илјади Палестинци не ја напуштат енклавата.
„Ќе ја завршиме оваа кампања кога Сирија ќе биде уништена, Хезболах ќе биде тешко поразен, Иран ќе биде лишен од својата нуклеарна закана, Газа ќе биде исчистена од Хамас и кога стотици илјади жители на Газа ќе избегаат во други земји, нашите заложници ќе бидат вратени, некои во своите домови, а некои во гробовите на Израел“, рече Смотрич за време на говорот во населбата Ели во централниот Западен Брег.
Тој изјави дека ова не се само цели на владата, туку и консензус на израелскиот народ и војниците. Смотрич апелираше до премиерот Бенјамин Нетанјаху да „направи сè за да ја зајакне безбедноста на Израел“ и го предупреди да не „ја пропушта оваа можност“.
Израелската војска го обнови нападот врз Газа на 18 март, прекршувајќи го договорот за прекин на огнот и размена на затвореници со палестинската милитантна група Хамас од 19 јануари.
Над 52.300 луѓе, претежно жени и деца, се убиени во Газа во израелската офанзива од октомври 2023 година, која започна по нападот на Хамас врз Израел на 7 октомври 2023 година, во кој беа убиени 1.300 луѓе.