Свет
Маж избоден со нож во вратот во Франција: случајно се удрил во напаѓачот додека поминувал

Уапсен е мажот што избоде човек во вратот во францускиот град Лион. Член на семејството на напаѓачот го пријавил напаѓачот во полиција откога го препознал кога видеото од нападот станало вирално на интернет, а нападот се случил кога жртвата случајно налетала на него во метро-станица.
Полицијата го уапсила напаѓачот вчеравечер во неговиот дом во областа Венисие, јавуваат француските медиуми.
Претседателот на Метрополис Лион, Бруно Бернард, вчера вечерта на социјалната мрежа Х објави дека осомничениот е уапсен. „По инцидентот, го баравме лицето што го нападна со нож нашиот корисник на метрото по судирот. Овој страшен напад веднаш ги активира нашите служби, а снимката од надзорната камера веднаш ја проследивме во полиција. Лицето штотуку беше уапсено“, напиша тој.
Бернард исто така ѝ се заблагодари на националната полиција за брзите напори во истрагата на инцидентот. „Нашите мисли се со оние што беа жртви на овој чин“, додаде тој.
Инцидентот се случил во неделата, веднаш откога напаѓачот се симнал од возот на метро-станицата Гилотиер во Лион. На снимката од надзорната камера се гледа како тој излегува од платформата и се упатува кон скалите кога друг маж случајно се судри со него.
Се чини дека тие накратко размениле неколку зборови пред напаѓачот да го брка и да му забие нож во вратот. Потоа мирно се оддалечил, а жртвата ја ставила раката на раната и збунето гледала наоколу, очигледно не знаејќи дека штотуку е избодена.
Напаѓачот веднаш побегнал од местото, а полицијата интензивно трагала по него. Во меѓувреме, итните служби на самото место му укажале помош на оштетениот по што тој бил пренесен во болница.
Очевидец изјавил за Frontières дека е чудо што човекот го преживеал нападот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Унгарија: Нема да поддржиме продолжување на санкциите против Русија и Белорусија

Унгарија нема да поддржи продолжување на санкциите на Европската унија против руски и белоруски правни и физички лица, бидејќи, како што изјави министерот за надворешни работи Петер Сијарто, треба да се даде простор на мировните преговори меѓу САД и Русија, пренесува Anadolu.
Зборувајќи во Вашингтон, Сијарто го критикуваше Брисел за донесување „избрзани одлуки“ кои, според него, го отежнуваат постигнувањето мир. Тој, исто така, ја обвини ЕУ дека не ги почитува сопствените обврски кон Унгарија кога станува збор за енергетската безбедност.
„Нема да се согласиме да ги продолжиме санкциите во понеделник“, рече Сијарто. Тој истакна дека Европската комисија не го исполни своето ветување да ја вклучи Унгарија во преговорите за продолжување на транзитот на украинскиот гас, туку наместо тоа ги покани само Словачка и Украина.
„Тие веќе прекршија една од четирите гаранции“, предупреди тој. Унгарија исто така се спротивставува на предлогот на ЕУ за доделување 20 милијарди евра помош за Украина, тврдејќи дека пакетот не придонесува за мир, туку само ја зајакнува преговарачката позиција на Киев.
„Нема да го поддржиме трошењето на парите на европските даночни обврзници за продолжување на војната“, рече унгарскиот министер. Тој посочи дека изборот на Доналд Трамп ја промени глобалната политичка динамика во корист на мирот, но дека европските либерали, како што вели, се обидуваат да ги блокираат овие напори.
„Никогаш не сме биле поблиску до решение, бидејќи директните преговори меѓу САД и Русија повторно ја разгореа надежта за мир“, заклучи тој. Во рамките на посетата на САД, Сијарто денеска разговараше со американскиот министер за финансии Скот Бесент.
Свет
Папата Франциско го продолжува опоравувањето од пневмонија

Папата Франциско денеска го продолжи опоравувањето од пневмонија, појадувајќи во кревет во болница и работејќи со своите помошници.
Портпаролот на Ватикан, Матео Бруни, изјави дека тестовите на крвта во средата покажале „благо подобрување“ во здравствената состојба на 88-годишниот папа.
Тој беше примен во болницата Гемели во Рим на 14-ти февруари откако се влоши нападот на бронхитис. Лекарите во вторникот констатирале пневмонија, покрај инфекција на респираторниот тракт. Папата зема комбинација од антибиотици и кортизон за она што лекарите го дијагностицираа како астматичен бронхитис.
Кардиналот Џанфранко Раваси претходно во текот на денот ја коментираше можноста за оставка на прашањето дали Франциско би можел да одлучи да ги следи стапките на папата Бенедикт Шеснаесетти и да се повлече ако премногу се разболи.
„Нема сомнеж дека ако папата се најде во ситуација кога неговата способност да има директен контакт со народот е загрозена, тогаш мислам дека тој би можел да одлучи да поднесе оставка“, рече Раваси.
Кога беше избран папата Франциско, тој напиша писмо со оставка во случај здравствените проблеми да го спречат да ги извршува своите должности.
Свет
Сијарто: Нападите врз нуклеарните централи во Украина се „неприфатливи“

Нападите врз нуклеарните централи во Украина се „неприфатливи“, а мирот е најдобра гаранција за нивно избегнување, изјави унгарскиот министер за надворешни работи Петер Сијарто по денешниот телефонски разговор со генералниот директор на Меѓународната агенција за атомска енергија (МААЕ) Рафаел Гроси.
Како што наведе, Гроси оценил дека иако нападот на централата во Чернобил со право предизвика загриженост во Унгарија, објектот може да издржи многу поголемо влијание.
„Затоа, ниту по инцидентот, ниту оттогаш нема закана од нуклеарна катастрофа. Сепак, се согласивме дека нападите врз нуклеарните централи се неприфатливи и дека нуклеарната безбедност мора да биде загарантирана“, напиша Сијарто на Фејсбук.
Сијарто, исто така, истакна дека двете страни силно ги поддржуваат напорите на САД за ставање крај на војната во Украина.
– Мирот е гаранција дека во иднина може да се избегнат провокации и напади врз нуклеарни постројки – нагласи шефот на унгарската дипломатија, пренесува МТИ.
Тој им се заблагодари на персоналот на МААЕ кој во воени услови ја гарантира безбедноста на украинските нуклеарни централи.