Свет
Макрон:Европа не треба да биде вазал на САД
Францускиот претседател Емануел Макрон се најде на удар на критики од двете страни на Атлантикот откако рече дека Европа не треба да стане вазал и дека мора да избегне да биде вовлечена во каков било конфликт меѓу САД и Кина околу Тајван, пишува „Гардијан“.
Макрон ова го изјави во интервју по тридневната официјална посета на Кина. Макрон за „Ехо“ и „Политико“ изјави дека Европа треба да биде трета сила во светскиот поредок, по САД и Кина. Тој, исто така, оцени дека мешањето во кризата поврзана со Тајван ќе биде стапица за Европа, која ќе биде вовлечена во кризи кои не се нејзини, што ќе ја спречи да изгради стратешка автономија.
„Целта на разговорите во Кина беше да се консолидираат заедничките пристапи во однос на војната во Украина“, рече Макрон.
Политико објави дека Елисејската палата ги проверила цитатите на Макрон пред објавувањето како услов за доделување на интервјуто и инсистирал да се отстранат деловите каде Макрон зборувал „уште поискрено“ за Тајван и за стратешката автономија на Европа.
Американскиот републикански сенатор Марко Рубио изјави за Политико дека ако Макрон зборува за цела Европа, тогаш САД треба да размислат да ја фокусираат својата надворешна политика на задржување на Кина и да ја остават Европа да се бори во војната во Украина.
„Волстрит журнал“ во уводникот наведува дека бесполезните коментари на францускиот претседател би можеле да го поткопаат американското и јапонското одвраќање против Кина во Западниот Пацифик, истовремено охрабрувајќи ги американските политичари кои сакаат да ги намалат американските обврски во Европа.
Еден член на Европскиот парламент (ЕП) нагласи дека францускиот лидер не зборувал во име на ЕУ, туку во име на Франција. Пратеникот рече дека руската инвазија на Украина ја доведе во прашање способноста на Европа да стане трета сила во глобалниот поредок, како што предлага Макрон.
Германскиот пратеник од десниот центар, кој е член и поранешен претседател на комисијата за надворешна политика на Бундестагот, Норберт Ретген, рече дека Макрон со својата идеја за европскиот суверенитет, кој го дефинира во демаркација, а не во партнерство со САД , се повеќе се изолира во Европа.
Пратеникот во Европскиот парламент Рајнхард Бутикфер ја опиша посетата на Макрон на Кина како „целосна катастрофа“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Израелскиот амбасадор во ОН до специјалната известувачка: „Вие сте вештерка, се обидувате да нѐ проколнете“
Седницата на Третиот комитет на Генералното собрание на Обединетите нации се вжешти откако израелскиот амбасадор во ОН, Дани Данон, остро ја нападна специјалната известувачка Франческа Албанезе поради нејзиниот извештај во кој Израел се обвинува за кршење на човековите права и за меѓународната поддршка што ја добива.
„Госпоѓо Албанезе, секојпат кога се обидувате да го проколнете Израел со лаги и клевети, вашите клетви не успеваат. Вие сте вештерка, а овој извештај е уште една страница во вашата книга на волшепства“, изјави Данон обраќајќи ѝ се преку видео-врска.
Албанезе не можеше лично да присуствува на седницата, бидејќи САД ѝ воведоа санкции и ѝ ја укинаа визата во јули, со образложение дека вршела „нелегитимен притисок врз Меѓународниот кривичен суд“ за постапки против американски и израелски функционери.
Во најновиот извештај, Албанезе остро го критикува Израел, но и обвинува повеќе држави — меѓу нив САД, Велика Британија, Германија и Унгарија — дека се соучесници поради дипломатска или воена поддршка на Израел.
Канада, Австралија и Нов Зеланд се обвинети дека ги „ослабуваат“ резолуциите на ОН што го критикуваат Израел, додека Франција, Италија, Хрватска и Грција се спомнати затоа што му дозволиле на премиерот Бенјамин Нетанјаху да користи нивен воздушен простор и покрај налогот за апсење од Меѓународниот кривичен суд.
Извештајот ги споменува и неколку арапски и муслимански земји, меѓу кои Египет, Јордан, Катар, Саудиска Арабија, Турција, Индонезија, Пакистан и ОАЕ, поради поддршка на мировниот план на Доналд Трамп, кој, според Албанезе, „олеснува нов облик на окупација“.
Свет
Кралот Чарлс му ги одзема титулите на принц Ендру и го сели од кралската резиденција
Британскиот крал Чарлс официјално покрена постапка за одземање на сите титули и почести на принцот Ендру, како и негово селење од резиденцијата „Ројал лоџ“, јави Си-Ен-Ен.
Одлуката уследи по нови реакции во јавноста поради поврзаноста на Ендру со осудениот сексуален преступник Џефри Епштајн и објавувањето на мемоарите на Џуфре, која го обвини принцот за сексуално злоставување додека била тинејџерка, обвинение што тој го негира.
Во соопштение на Бакингемската палата се наведува дека „Неговото Височество денес започна формална постапка за одземање на стилот, титулите и почестите на принц Ендру“ и дека тој отсега ќе биде познат како Ендру Маунтбатен Виндзор.
Палатата потврди дека Ендру ќе мора да се исели од резиденцијаа и да се пресели во приватен престој, додека неговите ќерки, принцезите Евгенија и Беатрис, ги задржуваат своите титули.
Во изјавата се нагласува дека „кралското семејство останува со мислите и најдлабокото сочувство со жртвите и преживеаните на сите облици на злоупотреба“.
Јавноста со остри реакции го коментира случајот, особено по откритијата дека Ендру за резиденцијата платил симболичен износ и плаќал минимална кирија, иако од 2019 година не е активен член на кралското семејство.
Свет
Саграда Фамилија официјално стана највисока црква во светот
Познатата барселонска базилика Саграда Фамилија од денес е и официјално највисоката црква во светот, откако беше поставен новиот дел од централната кула, пренесе „Гардијан“.
Делото на Антонио Гауди сега се издига на 162,91 метар, со што ја надмина катедралата во германскиот Улм, висока 161,53 метра. Во следните месеци се очекува кулата на Исус Христос да ја достигне својата крајна висина од 172 метра.
Темелите на базиликата се поставени во 1882 година, а Гауди починал пред да го види проектот завршен.
Последните децении работите се забрзани благодарение на милионите туристи што ја посетуваат црквата; минатата година ја разгледале 4,9 милиони луѓе, а приходите од билетите целосно се користат за финансирање на изградбата.
Комплетното завршување на Саграда Фамилија се очекува околу 2035 година, а 2026 ќе се одбележи 100-годишнината од смртта на Гауди со низа културни настани.

