Улиците на иранската престолнина денес беа претежно пусти поради израелските напади, јавуваат странските медиуми.

Повремено автомобили или мажи на скутери минуваа покрај затворените продавници откако американскиот претседател Доналд Трамп предупреди дека сите треба „веднаш да се евакуираат“.

Израел, повторувајќи ја тактиката што често ја користи во Газа, исто така ги повика жителите на југозападен Техеран да ги напуштат своите домови за да можат да напаѓаат воени цели.

Комбинацијата од овие закани предизвика масовен егзодус од Техеран.

Иранските медиуми известуваат за големи сообраќајни метежи и застој на патиштата што водат северно од градот.

Хрватскиот министер за надворешни и европски работи, Гордан Грлиќ Радман, најави евакуација на хрватски дипломати од Израел и Иран.

„Со оглед на тоа што и други земји ги евакуираат своите дипломати и претставништва од Техеран, одлучено е дека ќе го евакуираме и амбасадорот и персоналот на амбасадата од Техеран преку безбедни гранични премини што ги користат други дипломати. Таква евакуација ќе се спроведе и за амбасадата, односно за вработените од Тел Авив“, изјави Грлиќ Радман за новинарите по владина седница.

На прашањето кога ќе започне евакуацијата од Тел Авив, тој рече дека министерството е во постојан контакт со амбасадорот и вработените.

„Видовте што му се случи на колега во станбена зграда каде што неговиот стан беше целосно уништен. Таа ужасна експлозија се случи на три метри од него. Генерално е чудо што воопшто преживеал толку разорна експлозија“, рече Грлиќ Радман.

Министерот зборуваше за хрватскиот конзул Ивица Сертиќ и неговата сопруга Катица, кои беа лесно повредени во првиот ирански одговор на израелскиот напад. Тие поминаа со гребнатини и посекотини. Нивниот стан беше целосно уништен.

Министерот, исто така, нагласи дека се работи на евакуација, односно репатријација на хрватските граѓани од Израел и Иран.

„Со оглед на фактот дека воздушниот сообраќај е затворен или во голема мера ограничен, главно се користат копнени патишта и комуникација преку безбедни земји, како што се Египет и Јордан“, објасни тој.

Членовите на семејствата на британскиот персонал во Амбасадата во Тел Авив и во Конзулатот во Ерусалим се привремено повлечени.

Амбасадата и Конзулатот остануваат отворени, но овој потег ги отсликува чекорите преземени од другите дипломатски мисии додека борбите продолжуваат.

Американската амбасада во Ерусалим е затворена барем до петок, според соопштението на Стејт департментот.