Свет
Малата Емили го прослави својот деветти роденден во рацете на Хамас, татко ѝ не губи надеж: „Ќе славиме кога ќе се врати дома“

Емили Хенд, девојката за која првично се мислеше дека е убиена, но нејзиното семејство неодамна доби информација дека, најверојатно, е киднапирана и е во рацете на Хамас, денес го прослави својот 9-ти роденден далеку од најблиските.
Емили била киднапирана од својот кревет во кибуцот Бери додека била во посета на пријател на 7 октомври кога Хамас ненадејно го нападна Израел.
„Ќе славиме кога таа ќе си дојде дома. Потоа ќе направиме голема забава со подароци, балони и торта и ќе бидат поканети сите нејзини пријатели“, рече таткото на Хенд.
Томас испратил и директна порака до Хамас, кој ја држи ќерка му.
„Тие не се војници, тие се само деца. Ве молиме, пуштете ги“, рече тој.
Тој едвај ги задржа солзите во пресрет на нејзиниот роденден признавајќи дека сè уште не може да замисли низ што поминува таа.
Тој ветил дека кога ќе се врати дома, нема да ја прати на училиште барем една година.
„Ќе ѝ го подариме светот, само среќни времиња“, рече тој и истакна дека само сака Емили да се врати дома.
Интервјуто што го даде татко ѝ во времето кога се мислеше дека таа е мртва го обиколи светот. Тој тогаш рече дека му олеснило мислејќи дека таа е мртва, а не е во рацете на Хамас, но подоцна рече дека жали за тие зборови.
Денес тој само сака повторно да ја прегрне ќерка си.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Русин со УСБ полно со податоци избегал во Франција, пронајден во тешка состојба

Рускиот дезертер и поранешен воен лекар Алексеј Жилјаев, кој на новинари им предал база на податоци од Главната воено-медицинска управа на руското Министерство за одбрана, е хоспитализиран во Франција во тешка состојба, јави Радио Москва.
Според извор запознаен со случајот, Жилјаев не може да оди и го загубил помнењето, а неговите пријатели и познаници го барале со месеци, откако му се загубила секоја трага. Причината за неговата состојба сè уште не е позната, но лекарите ја исклучиле можноста за труење.
Пред исчезнувањето, Жилјаев активно истапувал во медиумите. Раскажал дека кон крајот на 2023 година доброволно заминал во војната откако на железничка станица во Санкт Петербург видел група воени инвалиди. Како студент по медицина, почувствувал дека мора да ги искористи своите знаења на фронтот, иако тврдеше дека „секогаш бил против режимот“ и учествувал на протестите на Навални.
Во август 2024 година добил неофицијално отсуство и повеќе не се вратил во единицата. Се поврзал со претставници на организацијата „Идите шумом“, кои му помогнале да избега во Франција, каде што побарал азил.
Портпаролот на организацијата, Иван Чувиљаев, потврдил дека тие му помогнале при бегството: „Не би рекол дека приказната беше нешто посебна — повеќе типична. Имаше долгови, кредити, му било непријатно отворено да зборува за тоа. Потоа беше пратен во евакуациска група, таму се нагледал ужаси, разви јасен посттрауматски стрес. Нашите психолози работеа со него“, изјавил Чувиљаев.
Жилјаев од Русија изнесол УСБ со база на податоци од Главната воено-медицинска управа, која содржи информации за 166.000 пациенти што поминале низ воените болници во Русија и на анектираниот Крим.
Како што објаснил, податоците се пренесуваат преку затворен систем за размена, наречен ЗСПД, кој користи стандарден електронски протокол (SMTP и POP3). Новинарите на Радио Слободна Европа ја потврдиле автентичноста на базата.
Засега нема докази дека Жилјаев бил нападнат.
Свет
Специјалци вежбале, па по грешка упаднале во училиште и ги исплашиле децата: „Мислеа дека се статисти кои добро глумат“

Полициска вежба во чешкиот град Варнсдорф заврши како вистински фијаско, откако специјалците влегоа во погрешно училиште, предизвикувајќи паника меѓу учениците и професорите.
Според чешките медиуми, полицијата организирала симулација на апсење на вооружен напаѓач во областа Дечин. Планот бил акцијата да се одвива во зградата на поранешно основно училиште, но полицајците грешка влегле во соседната гимназија.
Во таа гимназија никој не бил известен за вежбата – ниту вработените, ниту учениците, пренесува порталот Novinky.
„Полицајците ѕвонеле на вратата, а кога домарот им отворил, едноставно влетале внатре. Професорите и учениците беа шокирани, не знаеја што се случува. Полицајците, пак, мислеа дека се работи за статисти кои добро глумат. Дури по неколку минути сфатија дека нешто не е во ред, а потоа командирите им јавија дека влегле во погрешна зграда“, изјавил градоначалникот на Варнсдорф, Јан Шимек.
Откако сфатиле дека се во грешно училиште, специјалците ја напуштиле гимназијата и преминале во објектот каде што првично требало да се одржи вежбата.
Заменик-градоначалникот Јири Сухарда објаснил дека во истиот комплекс се наоѓаат повеќе образовни институции – гимназија, градинка и поранешно основно училиште.
„Првата единица едноставно ги помешала објектите. Сè се разјасни брзо, полицијата реагираше коректно и веднаш се извини. Не е пријатно, но има и полоши ситуации“, изјавил Сухарда.
Инцидентот го потврдила и чешката полиција, наведувајќи дека се работи за човечка грешка.
„За време на вежбата, екипата влезе во зграда која не беше дел од сценариото. Директорот на полициската управа во Дечин веднаш стапи во контакт со раководството на училиштето и се извини за непријатноста што можела да ја предизвика ситуацијата,“ изјавил портпаролот Камил Марек.
Свет
Медведев остро по санкциите на Трамп: Тоа е чин на војна против Русија

Поранешниот руски претседател Дмитриј Медведев изјави дека американскиот претседател Доналд Трамп е на воен пат, коментирајќи ги новите санкции што ги воведе американскиот претседател врз Русија.
Медведев изјави дека САД се противник на Русија и дека „миротворецот“ Трамп сега целосно се впуштил во воен пат против Русија.
„Ако некој од бројните коментатори сè уште имаше илузии, еве ги. САД се наш противник, а нивниот зборлест „миротворец“ сега целосно се впушти во воен пат против Русија. Да, тој не секогаш активно се бори на страната на Киев на Бандера, но ова сега е негов конфликт, а не сенилниот Бајден! Секако, тој ќе каже дека не можел а да не биде под притисок во Конгресот итн. Ова не ја менува главната поента: донесените одлуки се чин на војна против Русија. А сега Трамп е целосно се приклешти кон лудата Европа“, напиша Медведев на Телеграм.
Медведев истакна дека патот на Русија до победата е уништување на Украина, а не склучување бесмислени договори.
Трамп воведе санкции врз двете најголеми руски нафтени компании. Роснефт и Лукоил, како и десетици нивни подружници.
Санкциите дојдоа еден ден откако пропаднаа плановите за самит меѓу Трамп и рускиот претседател Владимир Путин.