Свет
Мајка во САД си го убила бебето: го удрила, па му ставила памук во устата
Тинејџерка е обвинета дека го убила својот син. Го удрила, а потоа му ставила пет памучни топчиња во грлото, пишуваат светските медиуми.
Парис Мајо, која сега има 19 години, а за време на инцидентот имала само 15 години, е обвинета за убиство на новороденчето Стенли Мајо, кога го ставила во канта, во домот на нејзините родители во авенијата Спрингфилд, Рос-он-Вај, Херефордшир во март 2019 година.
Бебето, според извештаите, било убиено кратко по раѓањето.
Џонас Ханкин, тужителот, изјави во петокот пред судот во Ворчестер дека Стенли претрпел фрактура на черепот, најверојатно предизвикана од стапалото на неговата мајка што го удрила по главата, пред да му стави памук во устата. Две парчиња памук биле пронајдени длабоко во грлото.
Медицинскиот доказ од педијатар, прочитан на судот, потврдил дека Стенли живеел најмалку два часа по раѓањето.
„Постојат недвосмислени докази за најмалку два удари во главата или повреда на страничниот дел од главата“, се вели во извештајот.
Мајо, чии родители биле дома и не знаеле за раѓањето, била уапсена и интервјуирана двапати за смртта на нејзиното бебе, прво во 2019 година, а потоа во 2021 година.
Ханкин рече: „Нејзе ѝ беше кажано дека патологот открил дека памукот бил заглавен длабоко во грлото на бебето, и ја прашале дали таа го направила тоа“.
Мајо тврдела дека забележала течност или крв што доаѓа од устата на детето и дека се обидувала да помогне и да го впие со ставање памук во устата на бебето.
„Не се сеќавам дека ставив пет парчиња таму и не му ги пикнав прстите во грлото и не ги ставив таму“, кажала таа.
„Бев во паника и едноставно не знаев што друго да правам и тоа беше првото нешто што ми падна на памет, но не ги турнав таму долу, можеби ме фати паника“, додала таа.
Медицинските експерти, по обдукцијата, исто така заклучиле дека постојат „класични знаци дека детето е родено живо“ со докази за воздух во неговите бели дробови и покрај тврдењата на неговата мајка, дека кога се родил нејзиниот син тој не мрдал и не дишел.
„По апсењето на обвинетата, полицаецот слушнал дека таа кажала: „Го мразам плачот на новороденото бебе“, соопшти судот.
Мајо негира дека го извршила злосторствотo. Судењето, кое се очекува да трае шест недели, продолжува, стои во написите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Отровната риба-змеј може да се сретне во Грција, Хрватска, Црна Гора и Албанија, секој пат сценариото е слично
Рибата „dragon“ или како што кај нас ја нарекуваат риба пајак или змеј риба е една од опасностите заедно со медузите кои демнат во морето на неколку локации кои традиционално во текот на сезоната ги посетуваат туристи од регионот.
При убодот, испушта отров, предизвикувајќи силна болка.
Оваа отровна риба може да се сретне на бреговите и островите на Грција, Хрватска, Црна Гора и Албанија, а секој пат сценариото е идентично – убодот се случуваше во плиткото каде што практично е невидлива.
Се крие во песок и чакал, долга е околу 10 сантиметри и има остри црни боцки на грбните перки. Поради својот карактеристичен изглед и бои, оваа отровна риба делува како камелеон бидејќи совршено се асимилира во својата околина. Она што е важно да се наведе е дека рибата змеј, односно рибата пајак, не е предатор и не напаѓа, туку средбата со отровните боцки се случува откако ќе ја згазите, а таа инстинктивно ги активира како одбранбен механизам.
Поради оваа причина капачите се советуваат да бидат внимателни при влегување во вода, особено на плажите на кои и претходно имало убоди.
Кога ќе наидете на нејзините боцки, иако болката е интензивна, важно е да останете присебни. Најпрво, додека убодот е уште свеж, најдобро е стапалото да се натопи во топла вода, односно во вода на температура чија топлина можете да ја издржите. Овој процес се спроведува поради фактот што колку е потопла водата, толку е послаб ефектот на отровот бидејќи отровот е термолабилен.
Важно е после овој третман да добиете прва помош од лекар во форма на инјекција или антибиотици.
По убодот покрај болка се јавува и главоболка, чувство на гушење, мачнина, тешко дишење, болка во пределот на срцето, зголемено потење. Исто така, постојат некои индикации дека инфаркт може да се случи кај срцеви пациенти.
Советите на експертите од областа на морската биологија како и медицинските работници се откако ќе ве убоде змеј риба, да не го покривате местото, да го виткате со завој или да го затворате болното место.
По лекувањето, според оние кои имале средби со оваа риба, болката понекогаш продолжува и во наредните денови.
„Пред неколку години ја згазнав на Олимпик Бич во Грција, многу лошо искуство. Таа испушти многу силен отров што ме остави во несвест. Веднаш по убодот отидов кај доктор кој ми даде инекција на местото на убодот, во стапалото“, напиша Србин во група на Фејсбук посветена на Грција.
Уште полошо искуство доживеала жена чиј син згазнал на риба змеј во Јадранот.
„Мојот син имаше лошо искуство на Јадранот на 15 години. Го убоде додека ја симнуваше од јадицата, не знаеше дека тоа е таа риба… Отокот беше ужасен, болката беше неподнослива, веднаш моравме да одиме на доктор“, пишува таа.
Свет
Никола Саркози го критикуваше повикот на Макрон за предвремени избори, предупредува на „хаос“
Поранешниот француски претседател Никола Саркози го критикуваше актуелниот претседател Емануел Макрон за распишувањето предвремени избори за парламентот, оценувајќи дека тоа претставува голем ризик за земјата и за претседателот.
Саркози, кој беше претседател на Франција од 2007 до 2012 година, во интервју за „Журнал ди диманш“ изјави дека одлуката на Макрон може да ја турне земјата во „хаос“ од кој ќе биде тешко да се излезе, пренесува Еурактив.
Зборувајќи за лидерите на десницата, Саркози оцени дека лидерот на Националното собрание, Џордан Бардела е неискусен и дека ќе мора да го компензира недостатокот на искуство, бидејќи никогаш не бил во позиција да раководи со нешто и дека Ерик Чиоти, кој неодамна беше сменет од функцијата претседател на Републиканската партија (ЛР), требаше повеќе да се консултира со сопартијците.
Свет
Четири лица загинаа во одрон во кинеската провинција Фуџијан
Четири лица загинаа, а две се водат за исчезнати во лизгање на земјиште во кинеската провинција Фуџијан, на југоистокот на земјата, јавува кинеската државна телевизија CCTV.
Обилните дождови кои започнаа во неделата попладне предизвикаа лизгање на земјиштето во кое се урнаа 378 куќи, пренесува Ројтерс.
Локалните власти ангажираа служби за итни случаи, а метеоролошката служба ги окарактеризираше врнежите како „екстремни“.