Украинскиот претседател, Володимир Зеленски, денес во Берлин ќе разговара со германскиот канцелар Фридрих Мерц, соопшти германската влада, како дел од дипломатските напори за ставање крај на војната во Украина.

Мерц ќе го пречека украинскиот претседател со воени почести напладне во среда, се вели во соопштението на владата.

„Фокусот на посетата ќе биде поддршката на Германија за Украина, како и напорите за постигнување прекин на огнот“, се додава во соопштението.

Украинските и руските претставници се состанаа овој месец на првите директни разговори откако Москва започна инвазија на својот сосед во 2022 година, под притисок од американскиот претседател Доналд Трамп да ја заврши војната.

Но, разговорите не доведоа до договор за прекин на огнот, а Русија изврши три последователни воздушни напади во текот на викендот.

Додека Трамп покажа колеблива поддршка за Украина во последните месеци, Германија би можела да игра сè поважна улога како најголем воен и финансиски поддржувач на земјата по САД.

Мерц, конзервативец кој ја презеде функцијата овој месец, вети дека ќе преземе поголема водечка улога во обезбедувањето поддршка за Украина од неговиот претходник, социјалдемократот Олаф Шолц.

Тој ја посети Украина со други европски лидери неколку дена откако стана канцелар, а во понеделник го поддржа правото на Украина да лансира ракетни напади со долг дострел на руска територија – за разлика од претпазливата реторика на Шолц по ова прашање.

Претседателот на САД, Доналд Трамп, вчера изјави дека Канада може да се приклучи на планираниот американски противвоздушен одбранбен штит, познат како „Златна купола“, или со плаќање 61 милијарда долари или со приклучување кон САД.

„И кажав на Канада, која навистина сака да биде дел од нашиот фантастичен систем „Златна купола“, дека ќе ги чини 61 милијарда долари ако останат посебна, но нееднаква нација, но ќе ги чини НУЛА ДОЛАРИ ако станат нашата сакана 51-ва држава. Тие ја разгледуваат понудата!“, напиша Трамп на својата социјална мрежа Truth Social.

Неговите коментари дојдоа кратко откако канадскиот премиер Марк Карни изјави за Си-Би-Си дека сака да потпише голема европска одбранбена иницијатива до 1 јули и да стане дел од европскиот план за вооружување „Реарм Европа“, потег насочен кон намалување на зависноста на земјата од САД за оружје и муниција.

Карни постојано ги отфрла потезите на Трамп Канада да стане 51-ва земја. На неодамнешната средба со Трамп во Овалната соба, тој рече дека Канада не е на продажба.

Минатата недела, Трамп откри повеќе детали за неговиот проект од 175 милијарди долари, велејќи дека ќе биде оперативен пред крајот на неговиот мандат во 2029 година и ќе биде способен да пресретнува беспилотни летала и ракети од каде било во светот, па дури и од вселената.

Трамп ја започна иницијативата „Златна купола“ кратко по преземањето на функцијата во јануари. Системот ќе биде моделиран според израелската „Железна купола“, но прилагоден на американските услови и интегриран со постојната одбранбена инфраструктура.

Заменик-претседателот на Советот за безбедност на Русија, Дмитриј Медведев, се огласи по острите пораки на американскиот претседател, Доналд Трамп, за Русија и претседателот Владимир Путин.

„Што се однесува до зборовите на Трамп за тоа како Путин си игра со оган и како навистина лоши работи ѝ се случуваат на Русија, знам само едно навистина лошо нешто – тоа е трета светска војна. Се надевам дека Трамп го разбира ова!“, напиша Медведев на Телеграм.

Трамп рече дека рускиот претседател не разбира дека многу лоши работи ќе ѝ се случеа на Русија без него.

„Она што рускиот претседател Владимир Путин не го разбира е дека, да не бев јас, многу навистина лоши работи веќе ќе ѝ се случеа на Русија; мислам, навистина лоши. Тој си игра со оган“, напиша Трамп на мрежата Truth Social.