Свет
Момчињата јавно зборуваа за времето минато во пештерата, пиеле дождовница и се молеле за да избегнат негативни мисли

Дванаесетте момчиња и нивниот фудбалски тренер кои од тајландската пештера беа спасени од страна на спасувачки тимови на вчерашната прес-конференцијата опишаа како биле пронајдени.
Целата приказна почна на 23 јуни, кога момчињата по тренингот се одлучиле да ја посетат пештерата Там Луанг. По девет дена пребарување, сите 12 млади фудбалери и тренерот беа пронајдени.
Момчињата на возраст меѓу 11 и 16 години и 25-годишниот фудбалски тренер исчезнаа откако се одлучиле да го истражуваат десет километри долгиот пештерскиот комплекс Там Луанг во провинцијата Чанг Раи во северниот дел на Тајланд. Во текот на девет дена тие не јаделе ништо, само пиеле дождовница и се молеле, објави Би-би-си.
„Одевме нормално, но откако влеговме во пештерата, сфативме дека сме заглавени“, изјави на пресот тренерот на екипата „Диви свињи“, Екапол ‘Аке’ Чантавонг.
„Одевме додека не дојдовме до сува песочна точка, каде што останавме да спиеме. Во близина имаше извор на вода. Сакавме сами да излеземе, а не само да чекаме да нè спасат“, опиша Чантавонг. Како што минувале деновите, момчињата почнале да губат сила, но никогаш не се откажале.
Тие оделе наоколу и се обидувале да најдат излез. На тој начин се бореле со негативните мисли.
„Не размислувавме за храна бидејќи така гладот ќе го чувствуваме уште повеќе. Пиевме само вода која капеше од камењата, а во еден момент се онесвестив“, се сеќава едно од момчињата, 11-годишниот Чанин Вибулрунгуанг.
Спасувачите пристигнале навечер. Адул Сам-он, исто така едно од момчињата, моментот на пристигнувањето на британските нуркачи ги опиша како „чудо“.
„Седевме на камен и слушнавме како некои луѓе зборуваат. Тренерот ни рече да молчиме и да ги слушаме“, рече Сам-он, единствениот член од тимот што зборува англиски.
„Зедов фенерче и со брзање се упатив кон нуркачите. Кога се сретнавме, ги поздравив. Бев вџашен кога сфатив дека се Англичани. Тие ме прашаа колку сме, на што им кажав дека мојот мозок е блокиран по девет дена минати во пештерата. Математиката во тој момент не функционираше во мојата глава“, откри 14-годишниот Сам-он.
На прес-конференцијата тренерот на фудбалскиот тим откри дека момчињата биле шокирани кога дознале за смртта на спасувачот, Самарна Пунана, кој почина во текот на операцијата за спасување.
„Момчињата се чувствуваа дека е нивна вина смртта на спасувачот, но тој ја работел својата работа и, за жал, го жртвуваше сопствениот живот“, изјави тренерот Чантавонг и откри дека момчињата извесен период ќе поминат во будистички храм во чест на загинатиот спасувач.
Нуркачите до децата и тренерот нуркале низ тесни премини. Исто така, беше откриено дека момчињата не излегувале по одреден редослед, туку доброволно. Биле извлечени на воени носила. Сите биле во добра физичка состојба и било сеедно кој прв ќе излезе, откри докторот Пак Лохаршун на прес-конференцијата.
Момчињата велат дека нивните лекари им дозволиле да го гледаат финалето на Светското првенство во фудбал, а едно од нив откри дека повеќето навивале за Хрватска.
Психијатрите препорачаа момчињата и нивните семејства да избегнуваат контакт со медиумите барем еден месец.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Песков: Путин верува дека секоја средба со Зеленски мора да биде добро подготвена

Русија не го отфрла предлогот претседателот Владимир Путин да се сретне со украинскиот претседател Володимир Зеленски, но таа мора да се базира на претходно договорени услови.
„Путин верува дека секоја средба на највисоко ниво мора да биде добро подготвена и да ги потврди резултатите постигнати на професионално ниво“, изјави денес портпаролот на Кремљ, Дмитриј Песков.
„Во моментов, дипломатското ниво не е многу активно“, продолжи Песков. Тој се осврна на вчерашната изјава на Фридрих Мерц кога германскиот канцелар рече дека повеќе не очекува средба меѓу Путин и Зеленски.
Претседателот на САД, Доналд Трамп, минатата недела за време на состанокот во Белата куќа со Зеленски и европските лидери сугерираше дека таква средба би можела да се одржи во следните две недели.
„Нашиот интерес и подготвеност за такви преговори остануваат“, рече Песков пред патувањето на Путин во Кина задутре.
Портпаролот на Кремљ рече дека Русија ги доставила сите свои барања за прекин на конфликтот во писмена форма. Москва, исто така, бара Киев да ги предаде анектираните територии на Русија.
Свет
Турција ги прекинува сите комерцијални и економски врски со Израел

Турција одлучи целосно да ги прекине сите комерцијални и економски врски со Израел и да го затвори својот воздушен простор за израелски авиони, изјави денес турскиот министер за надворешни работи Хакан Фидан.
Според „Џерусалем пост“, економските последици од овој потег сè уште не се познати, но заобиколувањата поради затворениот воздушен простор би можеле да го продолжат времето на патување на летовите од Израел до земји како Грузија и Азербејџан за речиси два часа.
„Турција веќе објави прекин на економските односи со Израел во минатото, но врските продолжија“, изјави израелски функционер за „Џерусалем пост“.
Овој потег следува по извештаите дека турските пристанишни власти почнале неформално да бараат од агентите за превоз да обезбедат писма со кои потврдуваат дека бродовите не се поврзани со Израел и не превезуваат воена или опасна стока наменета за таа земја.
Според извештаите од извори од бродарството, пристанишната канцеларија усно им наложила на пристанишните агенти да обезбедат писмени гаранции, но не е издадено официјално писмо во врска со ова. Овој потег е продолжение на мерките на Турција против Израел откако минатата година ја прекина трговијата со таа земја поради војната во Појасот Газа, чија годишна вредност изнесуваше околу 6 милијарди евра.
Регион
Уапсена е мајката која го оставила бебето во Белград: било заврзано во кеса

По наредба на Вишото јавно обвинителство во Белград, полицијата ја уапси А.С. (2006), мајка за која постои сомнение дека го оставила своето седумдневно бебе покрај контејнер во Земун, пренесува „Блиц“.
Жената според медиумот е обвинета за обид за тешко убиство.
Бебето го пронашол случаен минувач околу 8:20 часот утрово. Било завиткано во крпи и врзано во кеса.
Според Маја Миладиновиќ, жената што го пронашла бебето, новороденчето тивко плачело, дека нејзиниот крик звучел како „мјаукање“.
– Го шетав кучето како секое утро по улицата Дунавска во Земун кога забележав дека нешто се движи зад контејнерот. Мислев дека лази, но кога се приближив видов дека е бебе. Бебето едвај дишеше и беше сино – вели таа.
Според неа, бебето било завиткано во пешкир.
Како што објави „Блиц“, детето било оставено зад контејнерот, меѓу грмушки и на куп ѓубре.
Екипата за итни случаи го транспортирала бебето во породилиштето во Земун, пишува Танјуг.
Фото: принтскрин