Свет
НАТО ќе го мониторира Црното Море по провокацијата во теснецот Керч
НАТО ќе продолжи да го проценува своето присуство во регионот на Црното Море каде што бродовите на алијансата спроведуваат рутински патроли и вежби, изјави портпаролката на НАТО, Оана Лунгеску, за „Анадолија“.
Таа рече дека веќе има големо присуство на НАТО во Црното Море и дека нивните бродови годинава поминале 120 дена во областа, во споредба со 80 дена во 2017 година.
„Неколку сојузници ја спроведуваат воздухопловната политика на НАТО во регионот, а сојузниците, спроведуваат редовни разузнавачки летови над Црното Море. Имаме и мултинационална бригада под водство на Романија со седиште во Крајова. Три членки на НАТО – Бугарија, Романија и Турција – се приморски држави со свои национални способности распоредени во регионот на Црното Море”, додаде Лунгеску.
Нејзините забелешки дојдоа откако портпаролот на рускиот претседател, Дмитриј Песков, изјави дека Кремљ го смета барањето на Порошенко НАТО да ги распореди своите бродови до Азовското Море за аспект од неговата стратегија за провоцирање на Русија со цел да добие поддршка пред иборите идната година. Според Песков, сè се сведува на изборните и домашните политички интереси на претседателот Порошенко.
Изјавата на Песков следи по интервјуто на Порошенко за „Билд“ во кое рече дека Киев се надева оти НАТО ќе ги испрати своите бродови до теснецот Керч каде што Русија заплени три украински брода кои влегоа сво руските територијални води на 25 ноември.
Британскиот адмирал, лорд Алан Вест, од своја страна, предупреди дека ако НАТО направи таков потег, може да ги зголеми тензиите во регионот по инцидентот во Керч.
„Мора многу внимателно да размислите за распоредувањето на силите близу до Русија. Ако испратиме огромни сили на НАТО, тоа ќе се смета за агресивен став, но би можеле да имаме ограничен број бродови кои се грижат за слободата на навигацијата”, истакна тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
За Зеленски доаѓањето на Трамп претставува надеж, Путин отворен за дијалог
Украинскиот претседател Володимир Зеленски изјави дека доаѓањето на Доналд Трамп за претседател на САД претставува надеж за решавање на многу проблеми, вклучително и глобални, пренесува Anadolu.
Со полагањето заклетва во Капитол, Трамп денеска и официјално стана 47-ми претседател на САД, а Зеленски на социјалните мрежи објави честитка и специјална порака.
„Денес е ден на промени и ден на надеж за решенија за многу проблеми, вклучувајќи ги и глобалните. Претседателот Трамп е секогаш одлучувачки, а неговата декларирана политика на мир преку моќ дава можност да се зајакне американското лидерство и да се постигне траен и праведен мир, а тоа е најважно“, рече Зеленски.
Тој му посака успех на Трамп на функцијата.
„Очекуваме активна и заемно корисна соработка. Заедно сме посилни и можеме да обезбедиме поголема безбедност, стабилност и економски раст и на светот и на нашите земји“, рече Зеленски.
Во изјавите за време на изборната кампања, како и по неговата изборна победа, Трамп рече дека ќе стави крај на војната меѓу Русија и Украина.
И Путин му честиташе на Трамп
Кремљ денеска објави и порака од рускиот претседател Владимир Путин, кој рече дека Русија е отворена за дијалог со администрацијата на Трамп за Украина.
Во соопштението се наведува дека Путин денеска одржал состанок со членовите на рускиот Совет за безбедност, на кој разговарале за ситуацијата на Блискиот Исток и Украина, како и за односите меѓу Русија и САД.
„Отворени сме за дијалог со новата американска администрација за украинското прашање. Најважниот елемент овде е решавање на основните причини за кризата. Краткорочен прекин на огнот или пауза за повторно вооружување на воените сили за продолжување на конфликтот не доаѓа предвид, долгорочниот мир да се постигне врз основа на почитување на легитимните интереси“, рече Путин.
Свет
Трамп: Бајден помилува луѓе виновни за многу тешки злосторства
Американскиот претседател Доналд Трамп во својот говор го критикуваше потегот на сега веќе поранешниот претседател Џо Бајден непосредно пред да ја напушти Белата куќа за превентивно да помилува неколку политички фигури и членови на неговото семејство.
„Тој помилуваше луѓе кои беа многу, многу виновни за многу тешки злосторства“, рече републиканецот во својот втор говор по неговата инаугурација, осврнувајќи се конкретно на членовите на истражниот комитет на Конгресот кои ја осудија неговата улога во нападот на Капитол на 6 јануари 2021. Трамп додаде дека помилувањата на Бајден се срамни.
Непосредно пред да му ја предаде власта на Трамп, Бајден, во обид да спречи можна лична одмазда, превентивно помилува избрани функционери и државни службеници, како и пет членови на неговото семејство, настојувајќи да ги заштити од можна одмазда на Трамп.
Откако неговиот републикански наследник вети дека ќе им се „одмазди“ на своите политички противници, 82-годишниот демократ во заминување одлучи да ги заштити луѓето на црната листа на Трамп од „неоправдани и политички мотивирани правни дејствија“.
Меѓу нив се поранешниот претседател на Здружениот Генералштаб, генерал Марк Мили, поранешниот архитект на стратегијата за Ковид-19 на администрацијата на Бајден, Ентони Фаучи, и луѓе кои учествуваа во комисијата задолжена за истрага на нападот на Капитол на 6 јануари 2021 година, како и полициски службеници кои дадоа исказ пред истата комисија.
Бајден помилува и пет членови од неговото семејство, велејќи дека сака да ги спречи да бидат цел на „неосновани и политички мотивирани истраги“.
Меѓу помилуваните се и неговите двајца браќа Џејмс и Френсис. На листата се и Сара, сопругата на Џејмс Бајден, сестрата на Бајден, Валери и нејзиниот сопруг Џон.
Свет
Зеленски му честита на Трамп за враќањето во Белата куќа
Украинскиот претседател Володимир Зеленски денеска му честиташе на Доналд Трамп за враќањето на претседателството на Соединетите држави.
Зеленски укажа на решителноста на Трамп и нагласи дека политиката „мир преку сила“ што ја најави дава можност да се зајакне американското лидерство и да се постигне траен и праведен мир.
„Овој век се оформува токму сега, и сите ние мора да работиме заедно за да го направиме голем и успешен век за демократските земји, а не за оние кои сакаат да пропаднеме“, нагласи тој на платформата Х.