Свет
Најмалку 20 Палестинци убиени во нападите на Израел врз Појасот Газа

Најмалку 20 Палестинци се убиени, а повеќе од 69 се повредени од вторникот во нападите на Израел врз Појасот Газа, објави „Скај њуз Арабија“. Според ТВ-каналот, жител на Појасот Газа е убиен кога израелски авиони нападнале мотоцикл во областа Зејтун на југот на крајбрежната енклава. Министерството за здравство на Појасот Газа претходно објави дека 12 лица загинале, а 50 се повредени.
Палестинските групи и израелската војска разменуваат напади во последните два дена по убиството на Баха Абу ал-Ата, командантот на вооруженото крило на бригадите „Ал-Кудс“ на палестинскиот Исламски џихад, заедно со неговата сопруга.
Оттогаш врз израелската територија од Појасот Газа се лансирани околу 250 проектили и минофрлачки гранати. Бомбардирањето сè уште продолжува со кратки паузи, а израелските воздухопловни сили изведуваат масовни напади врз воени инсталации на Исламскиот џихад и други групи. Во овие напади беа убиени 12 Палестинци, вклучително и тројца активисти од движењето Хамас, кое ја контролира енклавата.
Исламскиот џихад претходно вети дека ќе се одмазди за убиството на својот водач најавувајќи мобилизација на своите милитанти. Другите групи, што се членови на т.н. заеднички штаб за отпор во Газа, исто така го поддржаа ветувајќи дека нивниот одговор ќе нема граници.
Каиро, кој традиционално дејствува како посредник секојпат кога тензиите се зголемуваат во секторот, наводно се обидува да ја запре ескалацијата. Специјалниот координатор на ОН за блискоисточниот мировен процес, Николај Младенов, ќе отпатува во Каиро од Тел Авив за да разговара за ситуацијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Русија до Западот: Тврдоглаво игнорирате додека режимот во Киев се обидува да ја спаси кожата на Зеленски

„Тврдоглаво се обидувате да игнорирате како темелно корумпираниот режим во Киев се обидува да ја спаси кожата на украинскиот претседател Володимир Зеленски, доведувајќи ја во прашање иднината на својата земја. За тоа детално ќе разговараме на посебниот состанок што го побаравме за 31 јули, каде што предлагаме фокусирање на акциите што ја поткопуваат потрагата по дипломатски пат за решавање на украинскиот конфликт – вклучително и обидите да се попречи директниот руски-украински преговарачки процес во Истанбул“, изјави заменикот на рускиот амбасадор во ОН, Дмитриј Пољански, на седницата на Советот за безбедност, обраќајќи им се на претставниците на западните земји, пренесува ТАСС.
Според него, Русија подолго време и доследно предлага решавање на украинската криза по дипломатски пат.
„Но вас тоа не ве задоволува – сè додека сте подготвени да продолжите да се борите против Русија преку рацете на Украинците. А фактот што ги има сè помалку – воопшто не ве вознемирува“, предупреди рускиот дипломат.
Русија и Украина во мај и јуни одржаа две рунди преговори, по што следуваше размена на заробеници и предавање на телата на загинатите украински војници. Двете страни исто така разменија нацрти меморандуми за решавање на конфликтот.
Свет
Eрдоган: Работиме на средба меѓу Путин и Трамп во Истанбул, тоа ни е целта

Турскиот претседател Реџеп Таип Ердоган изјави дека оваа недела би можел да оствари телефонски разговори со рускиот претседател Владимир Путин и со американскиот претседател Доналд Трамп, со цел да ја испита можноста за организирање лидерска средба во Истанбул, на која би се разговарало за конфликтот во Украина.
„Со телефонски разговори со Путин и Трамп оваа недела ќе видиме дали можеме да ги собереме во Истанбул, тоа ни е целта“, изјави Ердоган за новинарите, откако руските и украинските делегации се сретнаа во Истанбул.
Третата рунда разговори меѓу Москва и Киев во Истанбул се одржа во средата и траеше околу 40 минути.
Првата рунда преговори, одржана на 16 мај, заврши со договор за размена на заробеници по формулата „1.000 за 1.000“, како и со договор обете страни да подготват меморандуми за надминување на кризата, потсетува „РТ Балкан“.
По втората средба, на 2 јуни, страните размениле нацрти на меморандуми за мирно решение, како и договор за размена на тешко ранети воени заробеници и тела на загинати.
Москва на Киев му предала и неколку илјади тела на загинати.
Свет
Осудени тинејџерите што го избодеа Келијан 27 пати во автобус во Лондон

Двајца тинејџери се осудени на најмалку 15 години затвор за бруталното убиство на 14-годишниот Келијан Бокаса, кој беше избоден дури 27 пати со мачети во автобус во Лондон. Еден од напаѓачите, денес 16-годишен, се смеел додека му се изрекувала пресудата, пренесува „Скај њуз“. Убиството се случило на 7 јануари во Вулич, југоисточен Лондон. Убиците се идентификувани како Мосавар Зази (16) и Колин Чабиква (15).
Судијата Марк Лукрафт ги осуди двајцата на доживотен затвор, со можност за условен отпуст дури по 15 години и 110 дена. Тој истакна дека камерите за надзор забележале дека напаѓачите се смееле за време на нападот. Смртта на Келијан ја нарече „бесмислена загуба на уште еден млад живот“.
Мари Бокаса, мајката на убиениот Келијан, изјави дека убијците го уништиле нејзиниот цел свет. Себеси се опиша како „скршена душа на која ѝ се смени животот засекогаш оној ден кога животот на детето ѝ го одзеде друго дете“.
„Се прашувам што се случило со тие две деца што довело до толку страшен чин на насилство. Не можам да си замислам како некој може да биде толку гневен. Тоа што го направија е ужасно, и можеби никогаш нема да дознаам што ги натера на тоа“, рече таа. „Тој момент на насилство можеби траеше неколку секунди, но последиците се вечни.“
Келијан на денот на убиството се наоѓал на горниот кат од автобусот околу 14:30 часот, кога му се приближиле обвинетите со оружје. Обвинителот Том Литл изјави дека е јасно дека нападот не бил спонтан, туку планиран, и дека обвинетите знаеле дека Келијан се наоѓа во автобусот.
„Му се приближија и речиси веднаш двајцата извадија мачети и го нападнаа,“ рече судијата на рочиштето. „Избоден е вкупно 27 пати пред да излезат од автобусот.“ Итните служби пристигнале брзо, но Келијан починал кратко по пристигнувањето на лекарите.
Обвинетите ја признаа вината за убиство и за поседување оружје. Една од мачетите била фрлена во реката Темза, но полицијата подоцна ја пронашла.
Главната инспекторка Сара Ли упати сочувство до семејството на жртвата, откако обвинетите ја признаа вината.
„Бруталниот и бесмислен напад врз Келијан остави длабоки последици врз неговите пријатели, пошироката заедница и сите што неуморно работеа на идентификување, апсење и процесуирање на виновниците. Се надевам дека семејството на Келијан ќе најде некаква утеха во оваа пресуда, но знам дека остануваат длабоко нажалени – бидејќи изгубени се три млади животи“, изјави таа.