Свет
Најмалку 30 мртви во Јапонија, уништени многу куќи, 45 илјади дома без струја

Во силниот земјотрес што ја погоди централна Јапонија на Нова година загинаа најмалку 30 луѓе, а потрагата по преживеани под урнатините продолжува. Најмалку 45 илјади дома се без струја.
Сè уште не е јасно колкава е штетата ден по земјотресот.
Тоа беше најсилниот земјотрес во регионот во повеќе од четири децении, според Американскиот геолошки институт.
Куќите беа уништени, избувнаа пожари и војниците беа испратени да помогнат во спасувачките операции, изјави за медиумите владиниот портпарол Јошимаса Хајаши.
Јапонскиот премиер Фумио Кишида доцна во понеделникот рече дека им наредил на тимовите за пребарување и спасување да направат сè што може за да спасат животи, иако пристапот до погодената област е тежок поради блокираните патишта.
Земјотресот доаѓа во чувствителен период за јапонската нуклеарна индустрија, која се соочи со жестоко противење од некои локални жители откога земјотресот и цунамито во 2011 година предизвикаа катастрофа во нуклеарната централа „Фукушима“.
Јапонија минатата недела ја укина оперативната забрана наметната на најголемата нуклеарна централа во светот „Кашивазаки-Карива“, која е надвор од функција од цунамито во 2011 година.
Агенцијата за нуклеарна регулација соопшти дека не се потврдени никакви неправилности во нуклеарните централи по должината на Јапонското Море.
Силен земјотрес ја погоди централна Јапонија во понеделникот уништувајќи згради и принудувајќи ги жителите на некои крајбрежни области да се засолнат на повисоките места. Прелиминарниот земјотрес со јачина од 7,6 степени предизвика бранови високи околу еден метар по должината на западниот брег на Јапонија и бреговите на соседна Јужна Кореја.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Воз во Русија налета на експлозив поставен под шините

Во рускиот Белгородски регион воз налета на експлозивна направа, предизвикувајќи експлозија, објави гувернерот Вјачеслав Гладков на својот канал Телеграм.
„Според прелиминарните информации, возот налетал на експлозивна направа поставена под шините“, напиша тој.
Повредени нема, но оштетена е контактната мрежа на железничката пруга.
Железничкиот сообраќај е привремено во прекин. Сите служби за итни случаи се на терен.
Свет
Трамп бара имиња на странските студенти кои студираат на „Харвард“: Сакаме да знаеме од каде се

Американскиот претседател, Доналд Трамп, изјави дека неговата администрација сака имиња и земји на сите странци кои студираат на Харвард, сугерирајќи дека странските земји, особено оние кои се непријателски настроени кон САД, треба да придонесат за финансирање на образованието на нивните студенти.
„Зошто Харвард не соопшти дека речиси 31 отсто од нивните студенти се од странски земји, и додека некои од нив воопшто не се пријателски расположени кон Соединетите држави, тие не плаќаат ништо за образованието на своите студенти, ниту пак имаат намера да го направат тоа“, напиша Трамп на „Тру соушал“.
Тој истакна дека неговата администрација сака да знае кои се и од каде се странските студенти и додаде дека Харвард „не е многу отворен“.
„Ги сакаме тие имиња и земји“, рече Трамп.
Според податоците на Харвард, во оваа учебна година 27 отсто од студентите доаѓаат од странство, а најмногу се од Кина, Канада, Индија, Јужна Кореја и Велика Британија.
Во учебната 2024-2025 година на Харвард беа запишани 6.793 студенти на додипломски и магистерски студии од 147 земји.
Странските студенти немаат право на какво било федерално финансирање, според делот за финансиска помош на веб-страницата на Харвард, додавајќи дека колеџот има свои пари за стипендии, кои се достапни за странски студенти.
Свет
Малта ќе ја признае Палестина следниот месец

Премиерот на Малта, Роберт Абела, денеска најави дека Малта ќе ја признае државата Палестина следниот месец.
Соопштението дојде за време на политички настан на кој Абела ги покрена локалните и глобалните прашања, со посебен фокус на хуманитарната криза во Газа, пренесува „Малта тудеј“.
„Не можеме да ги затвориме очите пред оваа човечка трагедија која секој ден се влошува“, весникот го цитираше малтешкиот премиер Абела осврнувајќи се на израелското бомбардирање на Газа, во кое загинаа речиси 54.000 Палестинци.
Абела рече дека овој потег е морална одговорност и дека Палестина ќе биде признаена по конференцијата на 20 јуни.